Read SEBR SÕNGO, 1998 Maan-kʋʋr sebre 19 Bible Online

Maan-kʋʋr sebre 19 - SEBR SÕNGO, 1998 bible

Maan-kʋʋr sebre 19

¹Soaala-Wẽnd yeela a Moyiiz

²[40†] t'a yeel a Israyɛl kamba fãa woto: «Yɩ-y sõma tɩ maam, y Wẽnda, yaa sõngo.

³[41†] Bɩ ned kam fãa zoe a ba la a ma nifu la a reeg vʋʋsga noore. Maam la yãmb Wẽnnaam rũnda la beoogo.

⁴ [42†] Da teeg-y wẽn-yaalsa ye, da bʋʋg-y yõak bɩ sẽyã t'a kud bɩ a zug wẽn-naand n kõ-y ye. Maam la yãmb Wẽnnaam.

⁵Yãmb sã n dat n kʋ laafi kosg maoongo bɩ y tũ m sẽn wilgã tɩ m na reeg y maoong.

⁶Maoonga dɩɩb rɩta a raare, bɩ a vẽkẽmbeoogo. Sẽn ket da-yɩten-daarã fãa tog n yõoga bugmẽ.

⁷Y sã n dɩ-a da-yɩten-daarã, bãng-y tɩ yaa rɩɩb sẽn sãame, a rẽgemda a rɩta bala.

⁸Sẽn kɩɩsa n dɩ, tʋka yell a zugu, a paooga Soaala-Wẽnd ne b sõmblem. Nin kãng tog n yiisa buudẽ.

⁹Y sã n wa ta y tẽngẽ wã, y sã n wa na n tigs y koodo, bɩ y ra saag pʋʋga zãng ye, da wʋk-y sẽn lʋɩ tẽnga ye.

¹⁰[43†] Da pʋg-y n tõs y bugsuntundu biisi sẽn kees b willẽ bɩ sẽn dʋʋg tẽng ye. Bas-y-b tɩ b yɩ naong-rãmb la sãamb dɩɩbo. Maam la yãmb Wẽnnaam!

¹¹ [44†] Ned da saag n zuk a to bũmb ye, n yag zirẽ ye, n wẽd a to ye.

¹²[45†] Da wẽen mam yʋʋr n togs sẽn ka sɩd ye, ka rẽ f sãamda Wẽnnaam yʋʋre. Maam la Naaba-Wẽnde!

¹³ [46†] Da rɩ f to paoong zaalem ye, da zu-a ye. Tʋʋm-tʋmd yaood da pa f nengẽ n vẽeg beoog ye.

¹⁴[47†] Da kãab wʋng beed ye, da gãneg bẽdg zoang taoor ye; zoe Naaba-Wẽnd nifu. Yaa maam la Soaala, y Wẽnnaam!

¹⁵ [48†] Da bʋ-y kegre, da yɩ-y bʋgsg tɩ loog ne nin-bõones ye la ra zoe-y nin-bɛda nif ye. Bʋ f saam-biig ne zemsgo.

¹⁶Da rõd f saam-biig ye, da rogl f to zug bũmb sẽn sek a kʋʋb ye. Maam la yãmb Wẽnnaam!

¹⁷ [49†] Da kisg f to, f sũurẽ ye. Wilg f saam-biig a kongre n da wa rɩ a yel-wẽnd taal ye.

¹⁸[50†] Da rok f sũur ye, da tug beem ne f buuda kamb ye. Nong f to wala f menga. Maam la yãmb Wẽnnaam!

¹⁹ [51†] Deeg-y m noya. Rũms a yi sã n ka buud a ye, bɩ f ra bas b tɩ b rʋ ye. Pʋʋg a ye pʋgẽ, bɩ f ra bʋd kood buud toɛ-toɛ ye. Da yeelg fuug sẽn sẽ ne pɛɛl buud sẽn ya toor ye.

²⁰F sã n yo ne paga sẽn ya roog biiga a zu-soaba sẽn nan ka yao bɩ a nan ka yiis-a a soolmẽ, sɩbgr tog n sɩbgame. B ka na n yiis yõor ye, tɩ paga yaa roog biiga.

²¹Raoa na n waa ne yell manegre maoong, sɛka roog noore. Rũnga na n yɩɩ pe-raoogo.

²²Maan-kʋʋda sã n deeg rũngã n kos sugri, Soaala-Wẽnd taoore, wakat kãng la a soab na n tɩlg ne a rẽgdo.

²³Yãmb sã n wa kẽ m sẽn kãab y tẽng ninga n sel y tɩ-rɩts buud fãa, ges-y-b wa rẽgdo. Yʋʋm a tãab pʋgẽ, b sẽn ya rẽgda yĩnga, yãmb ka na n dɩ-b ye.

²⁴Yʋʋmd a naas soaba marsã, b maanda Wẽnd pẽgr pʋʋsg kibsa n dɩk-b n kõ Soaala-Wẽnde.

²⁵Yʋʋmd a nu soaba tɛka y tõe n dɩ-b lame, y tõe n tigsa b biisi tɩ y paoong fɩɩge. Maam la yãmb Wẽnnaam!

²⁶ [52†] Da rɩ-y bũmb ne a zɩɩm ye, da bʋg-y bagr ye, da sok-y kɩɩms ye.

²⁷Da kok-y y zug ye, da kok-y y toɛɛng ye.

²⁸[53†] Ned sã n ki bɩ y ra bog y meng n wilg y sũ-sãang ye. Da kɩɩs-y y yĩng ye. Yaa maam la yãmb Wẽnnaam!

²⁹ [54†] Da paoog f bi-pugl n bas-a ne yoaadb ye; woto tẽnga tõr kõn zãag ne Naaba-Wẽnd ye.

³⁰[55†] Reeg-y m vʋʋsga noore, waoog-y m waoogra do-sõngã. Maam la Naaba-Wẽnde!

³¹ [56†] Da sogs-y kɩɩms ye, da pʋg-y yam dãmb ye. Da pʋg-y bagb ye, tɩ b na n dẽgem-y lame. Maam la y Wẽnnaam!

³²Ned zug sã n pelge, bɩ f waoog-a; ned sã n kʋʋle, ning-a sʋka. Yɩ ned sẽn zoet Wẽnd nifu. Yaa maam la Wẽnnaam!

³³Sãan sã n nok yãmba, bɩ y ra tall-a toog ye.

³⁴[57†] Sãan sa n nok yãmba, bɩ ges-a wa tẽnga biiga n nong-a wala y menga, tɩ yãmb me yɩɩ sãamb Ezipt tẽnga. Yaa maan la yãmb Wẽnnaam!

³⁵Da bʋ-y bʋ-kɛg ye, da mag-y mag yoodo n woog bũmb zɩslem, a woglem, a zulum ye.

³⁶[58†] Mag-y ne bõn-magdi sẽn ya sõma n paam tɩ zɩslem zemse, tɩ peoog yɩ peoogo, la yʋʋr yɩ yʋʋre. Yaa maam la yãmb Wẽnnaam sẽn yiis yãmb Ezipt tẽnga!

³⁷Reeg-y m noya la m dog-n-mikã; tũ-y-b neere. Maam la a yãmb Wẽnnaam!»