Read SEBR SÕNGO, 1998 Maan-kʋʋr sebre 22 Bible Online

Maan-kʋʋr sebre 22 - SEBR SÕNGO, 1998 bible

Maan-kʋʋr sebre 22

¹Wẽnnaam yeela a Moyiiz

²t'a wilg a Aarõ ne a kamba tɩ b sã n pa rat n paoog-ma, bɩ b lak b mens wakat kẽere ne maanda rɩɩbo, maand niyns Israyɛl kamba sẽn wat n kõt-ma, maam b Soaala-Wẽnde.

³Yeel-b woto: Zamaan woo zamaana, yãmb buuda ned da saag n dɩ kũun niynsi a Israyɛl kamba sẽn kõt Wẽnnaama, a sã n ne tɩ b rɩɩb wata ne m paoogre. Sẽn saaga n dɩ, bɩ b kʋ a soaba. Yaa maam n gome, maam, yãmb Wẽnnaam!

⁴A Aarõ yageng sẽn bẽed yĩng bãaga bɩ sẽn kɩrsd a yĩng rẽgdo, da saag n dɩ rɩɩb ning Israyɛl kamba sẽn wat n kõt Wẽndã t'a ka reng n pek a meng ye. Boto me ne ned ning fãa sẽn lebg rẽgdo, a sẽn sɩɩs kũum yĩnga, bɩ yell a to sẽn be a zug yĩnga t'a mi tiiri.

⁵Le yaa a sẽn sɩɩs-a rũng ning Wẽnd sẽn ka reegd a soab maoongo; le yaa a sẽn sɩɩs nin dẽgdo, a rẽgda sẽn ya-a a soab fãa.

⁶Ned ning sẽn rẽgem a meng woto paada ne a rẽgd n ta zaabre la sã ka wĩndg n lʋɩ la a soo koom, a ka tõe n dɩ rɩ-sõma wã ye.

⁷Zĩig sã n sobge t'a paam n peke, a tõe n dɩɩme tɩ yaa a rɩɩb la rẽ.

⁸A ra wãb rũng sẽn ki bɩ rũng a to sẽn yõke, n wa rẽgem a meng ye. Maam la yãmb Wẽnde, rũnda la beoogo.

⁹B reeg rɩɩba noy kãensã n da wa tʋk yel-wẽnd b zug ye tɩ ka rẽ b na kɩ, tɩ yaa maam b Wẽndã n welg b toore.

¹⁰Sẽn ka-a maan-kʋʋd ka tõe n sɩɩs rɩ-sõng ye; sãan sã n sig maan-kʋʋda, a pa tõe n sɩɩs rɩ-sõng ye. Sẽn be-a maan-kʋʋd zakẽ n tʋmd n deegd yaood, yẽ me ka tõe n dɩ ye.

¹¹Maan-kʋʋda sẽn da a soab ne ligdi, yẽ soab toe n dɩɩme; wala rakõor sẽn dog a zakẽ: yaa b zu-soab rɩɩbo.

¹²Maan-kʋʋd bi-pugl sã n yi kãadem ne ned sẽn ka maan-kʋʋda, a ka tõe n le rɩ wẽnd doog rɩɩb maan-kʋʋdba bal sẽn tõe n dɩ wã ye.

¹³A sã n lebg pʋg-kõore, bɩ b sã dig-a lame, la a sẽn ka tar kamb yĩnga, a lɛɛg n wa be-la a ba zakẽ, wala a yãadmẽ, a tõe n dɩ-la a ba rɩɩbo, ne a sẽn ka maan-kʋʋdã.

¹⁴Ned sã yĩd n dɩ maan-kʋʋd dɩɩbo, b saagd-a-la yaoodo, la a lebd n paasa yaooda pʋɩɩr a nu soaba.

¹⁵B da saag n dɩ yaare dɩ-sõma niyns a Israyɛl sẽn yãk n kõ Soaala-Wẽnd ye.

¹⁶B sã n dɩ yaare, yaa yelle la b rogend b zugu, la yaa bũmb sẽn tog ne rolbo tɩ yaa maam a Wẽnde n welg dɩ-kãens toore. B yaa rɩ sõma.

¹⁷Wẽnnaam yeela a Moyiiz

¹⁸t'a wilg a Aarõ ne a kamba la a Israyɛl dooga zãng woto: «A Israyɛl biig bɩ sãan sẽn nok-a, sã n dat n kʋ yũ-noog maoongo, yaa pʋleng bɩ yamleoog maoongo,

¹⁹a sõng tɩ rũnga yɩ raoogo, n ya sõmbo, loalga, pesgo, bɩ bʋʋga.

²⁰[72†] Da wa-y ne rũng sẽn tar bãnd ye tɩ maoonga ka na n deeg ye.

²¹Ned sã n wat ne rũnga, bedr bɩ bilfu, n na n kʋ yamleoog lagem-n-dɩ maoongo, bɩ tũu ne pʋlengo, Wẽnd ka tõe n deeg maoongã, rũnga sã n tar bãnd ye.

²²Da kõ Soaala-Wẽnd rũng sẽn ya zoang ye, kar-keok ye, kar-fiung ye, sẽn tar ãbr ye, sẽn tar dasempʋɩɩg ye, sẽn tar nodr sẽn kaood mɛt ye. B ra saag n dɩgl rũng a woto buud neong maan-kugra zug ye tɩ ka tõe n yɩ Soaala-Wẽnd dɩɩb ye.

²³Sã n ya rũng sẽn ya rɩgre bɩ sẽn ka sõma zãnga, f tõe n yõk-a lame n kʋ yamleoogo maoongo, a ya bedr bɩ bilfu; sã n ya pʋleng pidsgu yĩnga, ka tõe ye.

²⁴Da kõ-y Soaala-Wẽnd rũng sẽn toose bɩ sẽn kɩsge, ba sã n ka tũ ne ninsaal daab ye. Y meng da wa ne kũun a woto buud y tẽngẽ ye.

²⁵Da sak-y tɩ sãan wa ne kũun a woto buud n kõ Soaala-Wẽnd ye. Rũng sẽn kɩsg tara bãnde la Soaala-Wẽnd ka reegd b maoong ye.

²⁶Wẽnnaam yeela a Moyiiz:

²⁷Naafo bɩ pesgo, bɩ bʋʋg sã n doge, b kamba paada ne b ma dasem a yopoe. Daar a nii daarã, Soaala-Wẽnd tõe n deega b maoongo.

²⁸Da naag-y n kʋ nag-yãanga, pe-yãanga, bɩ bʋ-yãang ne b biig, raar a ye ye.

²⁹Y sã n kʋʋd pẽgr maoong maam, Naaba-Wẽnd yĩnga, bɩ y modg tɩ maoonga yɩ Soaala-Wẽnd sẽn tõe n deege.

³⁰B wãbda rũnga zãnga, maoonga raare, beoog ka vẽegd-a ye. Maam la yãmb Wẽnde, rũnna la beoogo!

³¹Deeg-y m noya la y tũ ba tɩ maam la y Wẽnnaam!

³²Da sãam-y m yʋʋr ye, modg-y tɩ m paam pẽgr Israyɛl kamba sʋka. Maam n welg yãmb sõmblem welegre.

³³Yaa maam n yiis yãmb Ezipt tẽnga n na n yɩ yãmb Wẽnnaam, rũnna la beoogo.»