Read SEBR SÕNGO, 1998 Maan-kʋʋr sebre 23 Bible Online

Maan-kʋʋr sebre 23 - SEBR SÕNGO, 1998 bible

Maan-kʋʋr sebre 23

¹Soaala-Wẽnd yeela a Moyiiz

²t'a taas Israyɛl kamba noy kãensa: «Naaba-Wẽnd tara b kibs bɛda la b ra-sõma. Ad-m ra-moonesã, d sẽn na n seg taaba raare.

³ [73†] Yãmb na n tʋma rasem a yoobe, a yopoe raarã, y na n vʋʋsa zãnga. Ra-kãng yaa m segb ra-sõngo, y ka tõe n tʋm fɩ. Y sẽn be zĩig ning fãa, na n yɩɩ vʋʋsg daare, Soaala-Wẽnd yĩnga.

⁴Ad dasem niyns a Israyɛl kamb sẽn na n tigim taab yʋʋmd pʋgẽ tɩ yɩ kibsa la Soaala-Wẽnd daare.

⁵ [74†] Pipi kiuugã piig la a naas daare, zĩ-sobdo, yaa Pak sɩngre, m waoogr yĩnga.

⁶Kiu-kãng piig la a nu daarã na n yɩɩ kibs Soaala-Wẽnd yĩnga, bur sẽn ka ning bɩll kibsa. Dasem a yopoe pʋgẽ, y na n wãba bur sẽn ka ning bɩlle.

⁷Pipi raarã yaa ra-sõngo, y kõn tʋm tʋʋmd ye.

⁸[75†] Dasem a yopoe wã pʋgẽ, beoog sẽn vẽege, y na n kõo Soaala-Wẽnd b rɩɩbo. Daar a yopoe soaba yaa kibsa, y kõn tʋm tʋʋmd ye.»

⁹Soaala-Wẽnd yeela a Moyiiz

¹⁰t'a togs Israyɛl kamba woto: «Y sã n wa kẽ tẽng ning m sẽn kõt yã, tigsgu sã n ta, bɩ y tall y pipi ka-gĩndã n wa kõ maan-kʋʋda.

¹¹Maan-kʋʋda reegd-a lame n kõ Soaala-Wẽnde, n kos tɩ b me reeg-a.

¹²Ka-gĩnda kũun daare, y na n paasa pe-bil sẽn ta yʋʋmde la sẽn ka tar bãnde, n kʋ yũ-noog maoongo, Soaala-Wẽnd yĩnga.

¹³Sẽn ket yɛsa, yaa zom moena a yi sẽn nag ne kaam tɩ b na n yãk n yõog bugum n noog Soaala-Wẽnd sũuri; wa-y ne rãam me bilfu.

¹⁴Da rɩ-y buri, da wãb-y ka-sẽedem; da rɩ-y kood rẽenga, y sã n ka reng n kõ Soaala-Wẽnd ye. La rẽ yaa noor y kamb sẽn na n deeg, b sẽn be zĩig ning fãa, zamaan woo zamaana.

¹⁵Kibsa poore, yãmb sẽn tall y ka-gĩnda n wa kõ Soaala-Wẽndã poore, a yɩ tɩ zaame, sõd-y dasem pis-naas la a wɛ.

¹⁶Dɩlla dasem pis-nu daare, yẽ me le yaa kibs tɩ y na n tall kũun a taaba n wa kõ Soaala-Wẽnde.

¹⁷Y sẽn kẽed tẽng ning fãa, ad-y sẽn na n wa ne kũun ning n kõ Soaala-Wẽnde, na n yɩɩ bur a yiibu sẽn wẽ ne zom moen a yiibu, bur sẽn ning bɩlle. Dẽ la y kood rẽeng bũmbu y sẽn na n tall n wa kõ Wẽnnaam.

¹⁸Y sẽn na n paas bũmb ninga, yaa pe-bi a yopoe sẽn ta yʋʋmde la sẽn ka tar bãnde. Sẽn pʋgde yaa loalga la pe-raad a yɩ, yũ-noog maoong yĩnga. Rãam la kũun a taab me naagdame. Y yõogd-b lame tɩ b yũ-noogã dʋ n ta Soaala-Wẽnde n noog b sũuri.

¹⁹Y na n kʋʋ boɛɛg yel-wẽnd sugr kosg yĩnga; pe-bi wã sẽn ta yʋʋmdã kʋʋda lagem-n-dɩ maoongo.

²⁰Maan-kʋʋda tata Soaala-Wẽnd taoore n tees b kũuna: pe-bi a yiibã la kood rẽemsa burã. Yaa rɩ-sõma sẽn kõ Soaala-Wẽnde, la maan-kʋʋdbã n na n dɩ-ba.

²¹[76†] Badaar na n yɩɩ tigsga, tigsg sẽn na n yɩ sõngo; y kõn tʋm tʋʋmd badaar ye, woto me yaa noor y kamba yĩnga, b sẽn be zĩig ning fãa.

²² [77†] Y sã n wa ta y tẽngẽ wã, y sã n wa na n tigs y koodo bɩ y ra saag y pʋʋga zãng ye; da wʋk-y sẽn lʋɩ wã ye, bas-y rẽ tɩ naong rãmb la sãamb wa tõog n yiisi. Yaa maam la yãmb Wẽnnaam rũnda la beoogo!»

²³Soaala-Wẽnd yeela a Moyiiz

²⁴t'a togs Israyɛl kamba woto: «Kiuug a yopoe soaba, a pipi daarã na n yɩɩ vʋʋsg daare, y yĩnga. Na n yɩɩ tẽeg n kils Soaala-Wẽnd daare, n kils-b ne noor la tõntõodo. Y na n boola taaba, n tigim taaba.

²⁵Badaare y ka na n tʋm tʋʋmd ye la y na n waa ne yũ-noog maand n kõ Soaala-Wẽnde.»

²⁶Wẽnnaam yeela a Moyiiz t'a taas woto:

²⁷«Kiuug a yopoe soaba, daar piig soaba, na n yɩɩ sugr kosg da-kãsenga. Y na n tigma taab badaare, y na n loe y noore la y na kʋʋ yũ-noog maoong n kõ Naaba-Wẽnde.

²⁸Badaare y ka na n tʋm ye, badaar yaa sugr kosg da-kãsenga, tɩ y na n ta n kudg kãntɩɩga n paam pekre, y Wẽnnaama taoore.

²⁹Sɩda, ned ning fãa sẽn zãgsa a noor loees badaare, b yiisd-a-la buudẽ.

³⁰Ned ning sẽn tʋma tʋʋmd badaare, mam meng m toore n yiisd-a a buud sʋka.

³¹Da tʋm-y tʋʋmd ye; dẽ yaa noor sẽn kõn teem abada, y kamb yĩnga, b sẽn be zĩig ning fãa.

³²[78†] Na n yɩɩ vʋʋsg daare wala raar a yopoe raarã. Loe-y noore, la kiuuga daar a wɛ soaba zaabre, n ta a vẽkẽmbeoogo zaabre, da tʋm-y ba fɩ.»

³³Soaala-Wẽnd yeela a Moyiiz

³⁴t'a wilg Israyɛl kamba woto: «Kiuug a yopoe soaba, a piig la a nu daare, bɩ y sɩng Sẽgd kibsa. Y na n maana kibs Soaala-Wẽnd yĩnga la a na n kaoosa dasem a yopoe.

³⁵Pipi daarã, kibsa mooneg daarã, yaa ra-sõngo, y ka tõe n tʋm tʋʋmd ye.

³⁶[79†] Dasem a yopoe pʋgẽ, y kõta Soaala-Wẽnd b yũ-noog maoongo, la a nii daarã, yẽ me le yaa tig-raaga tɩ y na n wa ne y kũun Soaala-Wẽnd yĩnga. La sẽn ya tigsg daarã, y ka tõe n tʋm ye. Kibsa na n baasa baraare, yaa vʋʋsg daare.

³⁷Woto la Soaala-Wẽnd kibs bɛda, b ra-moonesã. Badaare y wat n kõo Soaala-Wẽnd y yũ-nood maando, y yamleoog kũuni, y laafi kosg maando, y maand sẽn tũnug ne zom la rãam la wala sẽn wilgã, raar fãa ne a rẽnna.

³⁸La ra yĩm-y a yopoe raarã, vʋʋsga raarã kũuni, y yamleoog kũuni bɩ y pʋleng pidsgu kũuni y sẽn tog n wa kõ Soaala ye.

³⁹Kiuug a yopoe soaba, a piig la a nu daare, y sã n wa tigs y koodo, bɩ y sɩng kibs Soaala-Wẽnd yĩnga dasem a yopoe pʋgẽ. Pipi daarã la daar a nii soaba yaa vʋʋsg daare.

⁴⁰Pipi daarã, y na n baoo tɩ-sõma biisi, koms vãado, tɩɩs sẽn tar vãad wʋsgo, kʋɩlg noor yɩlse, n naag taab n yɩɩnd y sũ-noog yɩɩla la y kilsd Soaala-Wẽnde. Na n yɩɩ woto dasem a yopoe tõre.

⁴¹Yʋʋmd pʋgẽ yaa rasem a yopoe la y na n kɩdem woto Soaala-Wẽnd yĩnga. Dẽ yaa noor sẽn kõn tedg abada. Ya kiuug a yopoe soaba pʋgẽ la y na n kɩdem y sũ-noogo.

⁴²Dasem a yopoe pʋgẽ, y na n gãanda sẽgdẽ.

⁴³Woto y yagensa na bãnge tɩ m sẽn wa n yiis Israyɛl kamb Ezipt tẽnga, sẽgd n yɩ b roto. Woto la yãmb Wẽnda raabo.»

⁴⁴La a Moyiiz wilga Israyɛl kamba b sẽn tog n maan bũmb ninga Soaala-Wẽnd kibs bɛda raare.