Read SEBR SÕNGO, 1998 Maan-kʋʋr sebre 5 Bible Online

Maan-kʋʋr sebre 5 - SEBR SÕNGO, 1998 bible

Maan-kʋʋr sebre 5

¹Fo yãenda bũmb ne f nifu bɩ bũmb n lʋɩ f tʋbrẽ la b kosa foo Soaala-Wẽnd yʋʋr yĩnga la b naag n kãab-f kãab wẽnga tɩ f wa togs sɩda, bãng tɩ f maana yel-wẽnde la f tʋka taale f zugu, fo sã n pa sak n togs sɩdã.

²Ned sã n ka bãnge n sɩɩs bũmb ning fãa sɩɩsg sẽn kisi, wala we-rũnga, wala yir-dũnga, wala rũm-kɩdse sẽn ki, la yaa rũms sɩɩsg sẽn kisi, nin kãng rat t'a pa rata, a rẽgmame n dogl yell a zugu.

³Ned sã n ka bãnge n sɩɩs ninsaal rẽgdo, sẽn ya rẽok ninga sɩɩsg sẽn kis fãa, a sã n wa bãng t'a sɩɩs-a lame, wakat kãng tɛka a lebgda rẽgdo la yell doga a zugu.

⁴Ned sã n ka maan gũusgu n yaag a noor n wẽen yaare, wẽeneg sẽn na n lɛɛg n wã-a, bɩ sẽn na n wã a taaba, bɩ ned sẽn minim n wẽen yaar bũmb fãa poorẽ, yẽ soab sẽn bãng t'a wẽena yaar wakat ning fãa, a lebga rẽgdo tɩ yell be a zugu.

⁵Ned ninga sẽn dogl yell a woto a zug tog n wilga neba fãa a kongre.

⁶A yel-wẽnda dolb yĩnga, a na n kõo Soaala-Wẽnd rũng sɛdga, bʋ-sɛdg bɩ pe-sɛdga. Maan-kʋʋda na n maana a sẽn tog n maan bũmb ninga tɩ beegda paam sugri.

⁷Ned sã n ka tõe n paam pe-yãanga bɩ bʋ-yãanga, yaa wal a yiibu bɩ malwal a yiibu la a na n tall n wa kõ Soaala-Wẽnde n dol a yel-wẽna. Wall a ye bɩ malwall a ye kʋʋda yel-wẽna sugr kosg yĩnga, a to wã kʋʋda yũ-noog maoongo.

⁸A rengd n kɩsa maan-kʋʋdã a sẽn na n kʋ a soab yel-wẽna dolb yĩnga. Maan-kʋʋda gãta walla yublã n take la a pa tõsgd-a ye.

⁹La a yãkda zɩɩma n mes maan-kugra zugu la a tãoos walla zɩɩm maan-kugra sɛɛga: yaa yel-wẽnd sugr kosg maoongo.

¹⁰Wallã bɩ malwallã a to wã, maan-kʋʋda regd-a lame n maan yũ-noog maoongo wala sẽn zoe n wilgã. Maan-kʋʋda sã n maan a sẽn tog n maan bũmb ning fãa n kos sugrã la sugra paamda.

¹¹Ned sã n ka tõe n paam wal a yi bɩ malwal a yi, a sẽn na n wa ne bũmb ninga, Soaala-Wẽnd taoore, a yel-wẽnda sugr kosg yĩnga: yaa zom wũmbla. B basda kaama ne tɩdara taale, tɩ yaa yel-wẽnd dolb maoongo.

¹²A na n talla zoma n wa maan-kʋʋda nengẽ tɩ yẽ yãk pʋ-tẽer nekr pʋɩɩr ne nug koore la a na n ning-a-la bugmẽ tɩ bugma naag-a ne kũuna taabã n dɩ Soaala-Wẽnd yĩnga. Yaa sugr kosg maoongo.

¹³Maan-kʋʋda maanda a sẽn tog n maan bũmb ning fãa n kos sugri tɩ beegda sɩd paam sugri. Maan-kʋʋda meng sẽn deegd bũmb ning wala a pʋɩɩre, wẽnda a sẽn deegde, sã n ya kood la b wa ne.

¹⁴Soaala-Wẽnd yeela a Moyiiz t'a wilg woto:

¹⁵Ba ned sã n yĩd n maan wẽnga, n kʋ rũnga, Soaala-Wẽnd noor sẽn gɩd rũms niyns maanda kʋʋbo, yẽ soab rẽgma a menga. Ad-a sẽn na n maane: a wa maneg a yellã Soaala-Wẽnd taoore ne pesgo sẽn ya sõmb zãnga, t'a ligda me zem bũmbu, sã n na n da-a ne ligd ning sẽn sõt wẽnd doogẽ wã. Maoonga na n yɩɩ sugr kosg maoong la b na n kʋ.

¹⁶A sã n wa ne rũng sẽn ka zem bũmbu, yaa bõne la wẽnd dooga rɩ yã. A na n yaoo woto: ligd ning maan-kʋʋdba sẽn saagd pesgã, pʋɩta a nu la pʋɩɩr a nu soaba la a lebd n bao n paas n kɩse. Maan-kʋʋda kʋʋda rũnga maoongo la a maanda a sẽn tog n maan n kos sugri neda yĩnga, tɩ sugra yaool n paam, Soaala-Wẽnd nengẽ.

¹⁷Neda sã n maama yel-wẽnde t'a maana bũmb Wẽnnaam noora sẽn gɩdge, yell be-la a zugu, ba sã n tũu ne yĩdgu.

¹⁸A na n baoo a wubrẽ, pe-raoog sẽn ya sõmb zãnga la sẽn sek yel-wẽnd sugr kosg maoongo. Maan-kʋʋda sã n maan a sẽn tog n maan fãa n kos sugri, beegda paamda a beegra sugri, beegra sã n sɩd tũu ne yĩdgu la bãngr kaoolgo.

¹⁹Dẽ yaa yell manegr maoongo t'a sɩd da tʋka Soaala-Wẽnd beegr a zugu.

²⁰Soaala-Wẽnnaam yeela a Moyiiz t'a taas woto:

²¹Ad Soaala-Wẽnd beegra sẽn tõe n beeg to-to yɛsa: f maana bũmb sẽn wa ne f tũud-n-taaga bõne. Yaa waa f sã n ka togs f tũud-n-taaga sɩda bobell poorẽ, bɩ a sẽn peng foo bũmb poorẽ, bɩ f sẽn zuk bũmb poorẽ, bɩ f sẽn zãmb f to poorẽ.

²²Leb n yaa f sã n yagd zirẽ, bũmb sẽn menem tɩ f lɛɛg n yãende n ket n wẽenẽ tɩ f pa yãend ye. Yaa paas zirẽ wã yagb wẽnem ne wẽenego.

²³Sẽn maana woto maana wẽng n tʋkd yell a zugu la a tog n lebsa a sẽn zukã, a sẽn deeg tɩ yɩɩd a sẽn da tog n deegã, bobellã bɩ bõn-menemdgã a sẽn lɛɛg n yãendã.

²⁴Ad-b sẽn na maan kast zirẽ soabã: bũmba na n saaga ligdi la b na n yaoolg-a-la ligda pʋɩɩr a nu soaba n paase t'a kɩse n ka kees bũmbu, b sẽn na n wilg-a a kongra raare.

²⁵A na n wa kõo Soaala-Wẽnde, a yel-wẽnda dolb yĩnga, pe-raoogo sẽn ka tar bãnde, a sẽn yiis a wubrẽ, la sẽn ta yel-wẽnd dolb maoong rũnga.

²⁶[5†] Maan-kʋʋda na n kosa sugr beegda yĩnga, la a yella sẽn yɩ a soab fãa na paama sugri.