Read SEBR SÕNGO, 1998 Zeremi 1 Bible Online

Zeremi 1 - SEBR SÕNGO, 1998 bible

Zeremi 1

¹Sebr kãnga wilgda a Zeremi sẽn togs la a sẽn maane. A Zeremi yaa a Ilkiya biiga, maan-kʋʋdba buud neda, sẽn da be Anatot, a Bẽnzame soolmẽ.

²[1†] Soaala-Wẽnd sẽn gom ne a Zeremi wakatã la woto: Yɩɩ Zɩɩda dĩma a Amon biiga a Zoziyas wakato. A naama yʋʋma sẽn waa n ta piig la a tãabo.

³[2†] B goma ne-a yɛsa, Zɩɩda dĩma a Zoziyas biig a Zoakim wakato. N paas Zɩɩda dĩma a Zoziyas biig a Sedesiyas wakato. A Sedesiyas rɩɩ naam yʋʋm piig la a ye la kiis a nu. Kiuug a nu soaba pʋgẽ la b wʋk Zerizalɛɛm dãmb n kẽng yembdo.

⁴Soaala-Wẽnd goma ne maam n yeele:

⁵«Mam da zoe n mii fo tiiri tɩ m nan pa yag foo f ma pʋgẽ ye. Mam da zoe n welga foo toore m tʋʋmd yĩnga tɩ f ma nan ka rog foom ye. M da yãk-f lame tɩ f yɩ m no-rɛɛsa bu-zẽmba tẽngẽ.»

⁶Tɩ mam leoke: «Katõ! Soaala-Wẽnde! Ad-y m paood ne m gom kʋʋng sʋka.»

⁷Tɩ Soaala-Wẽnd leok-ma: «Da sak n yet tɩ fo yaa yãaga n paoodẽ ye. Ad foo n tog n kẽng mam sẽn na n tʋm foom neb niyns nengẽ, n wilg-ba m sẽn yet tɩ f wilg-b bũmb ning fãa.

⁸Da zoe neba rabeem ye, tɩ mam bee ne foom, n na n yiis foom yell fãa pʋgẽ.» B sẽn togs maama la woto.

⁹Soaala-Wẽnd yaool n tẽega b nugu, n sɩɩs mam noore n yeel maam: «Ade, yaa foom n na n togs m koeesã.

¹⁰Rũnna m kõt-f-la tʋʋmde m tʋmd-f-la bu-zẽmba tẽnsẽ: tɩ f võ la f tus n lubi, tɩ f sirg zãng la f pãb n wã, tɩ f me la f sele.»

¹¹Soaala-Wẽnd le goma ne maam n yeele: «Bõe la f ne Zeremi?» Tɩ m leoke: «M nee tɩɩg willi, tɩɩg ning sẽn yãgd ne puud wekra willẽ.»

¹²Tɩ Soaala-Wẽnd yeel maam: «F yãee neere, m sɩd yãgdame n na n pids m sẽn yeela fãa.»

¹³Soaala-Wẽnd le goma ne maam n sok-ma: «Bõe la f ne marsã?» Tɩ mam leoke: «M nee rʋg-bedr sẽn kɛɛde, la yaa nug goabg sobdã n fʋʋsd a bugma.»

¹⁴Tɩ Soaala-Wẽnd yaool n na n wilg-ma: «Yaa Goabg la yel-beeda kɛɛda n watẽ la yaa tẽn-kãnga rãmb yĩnga.

¹⁵Maam n yeele, mam na n boola goabg rãmba, b sagsa ne b rĩundã. B na n waame, n vigl b rĩm dãmba naam goeel Zerizalɛɛm dignoy wã. B na n gũbga a lalsã. B na n taka zabre ne Zɩɩda tẽnsa fãa.

¹⁶Woto m na pids m sẽn kãab tẽnga rãmb bũmb ning fãa. La rẽ yaa b sẽn beeg-ma yĩnga; yaa b sẽn bas maam n tɩ kʋ maand wẽn-naands yĩnga. Yaa wẽnd dãmb b sẽn naane n na n waooge.

¹⁷Aya, Zeremi! Bɩ f sẽbg f sɛɛga, yiki! Moon bũmb ning fãa m sẽn na n yeel tɩ f togs-ba. Da bas tɩ b yɛɛs-f ye, sã n ka rẽ maam n na n kɩt tɩ f rig rabeem bãmb taoore.

¹⁸Dũnna menga m kõt-f-la pãnga wa tãnsoben-tẽng sẽn tar a soabã; m na n yals-f-la wa kut lalga, wa zũud ra-luka, tẽnga rãmb taoore, a Zɩɩda rĩm dãmba taoore, a kug-zĩidba, a maan-kʋʋdba, a nin-zaalsa fãa taoore.

¹⁹B na n zaba ne foom la b ka na n tõog-f ye. Mam bee ne foom n na n fãag-fo. Maam n yeele, maam a Naaba-Wẽnde.»