Read SEBR SÕNGO, 1998 Zeremi 11 Bible Online

Zeremi 11 - SEBR SÕNGO, 1998 bible

Zeremi 11

¹Soaala-Wẽnd goma ne a Zeremi n yeele:

²Tũ-y m sẽn kɩt tɩ y pʋlem bũmb ningã. La b le wa paasame: «Ad-y y sẽn na n togs Zɩɩda rãmba, la Zerizalɛɛm dãmba.

³[21†] Fo na n wilg-b lame tɩ Soaala, a Israyɛl Wẽnnaam gomda woto: m na n sɩbga ned ning fãa sẽn ka tũud m sẽn kɩt tɩ m buuda pʋlma;

⁴yaa pʋleng ning y yaab rãmba sẽn pʋlme, m sẽn wa n yiis-b Ezipt, b namsga tẽngã. Wakat kãnga la m yeel-b tɩ b kelg la b tũ wa m sẽn wilgã tɩ yaa noor la m kõt-ba, la woto b na yɩ mam neba, la mam na lebg bãmb Wẽnnaam.

⁵M na pids kãabg ninga mam sẽn kãab y ba rãmba n yet tɩ m na n kõo bãmb tẽnga, bĩisim la sɩɩd sẽn zoetẽ, tẽn-kãng la y sẽn be a soab pʋgẽ dũnna wã.» Tɩ maam a Zeremi leoke: «Soaala, yaa boto la d na n maane!»

⁶La Soaala-Wẽnd paasame: «Zɩɩda tẽnsẽ la Zerizalɛɛm soya zutu, fo na n mooname n yeele: Maan-y wa y sẽn pʋlma, tũ-y m sẽn wilgã.

⁷M goma naoor yak ne y yaab rãmbã, m sẽn yiis-b Ezipt tẽnga wakato la m ket n tara yãmb dɩdgre dũnna, n kot-y tɩ y kelg-ma.

⁸La ad-b ka kɩll b tʋbre n kelg m goama ye. B pa kelg-a neer ye. Ned kam kʋɩɩsa a sũuri n kell n tũ a zʋg wẽnga. Woto bãmb sẽn zãgs tũubã mam me kong n pidsa m sẽn da kãabe.»

⁹Soaala-Wẽnd le paasame: «Sɩd-sɩda, Zɩɩda rãmba la Zerizalɛɛm rãmb gãe tẽngr n bilgd wẽnga.

¹⁰B leb n sɩnga tʋʋm wẽns niynsi b ba rãmba sẽn da tõdg mam noor n tʋma. B yõga zood ne wẽn-sãamse n waoog-ba. A Israyɛl ne a Zɩɩda sãama zood ning m sẽn da yõg ne b yaab rãmbã, zood ninga sẽn da waa n yõgd tɩ saaga kũmdẽ la a yãgdã.»

¹¹Dẽ n so tɩ Soaala-Wẽnd gomd woto: «Ade, mam na n kɩtame tɩ yel-beed lʋɩ b zugu, la b kõn põs ye; b na n kelmame n wat mam nengẽ, la mam kõn kelg-b ye.

¹²Zɩɩda tẽnse, la Zerizalɛɛm dãmba na n kẽngame n tɩ bõs sõngre. B sẽn waoog wẽnd niyns ne b kũna la b na n kos sõngre. Wẽnd kãens yaool n pa na n fãag-ba b yel-beeda raar ye.

¹³A Zɩɩda, tẽnsã sõor sẽn zem to-to, a wẽn-naandsa me sõor zema rẽnna. Maan-kuga sẽn me Zerizalɛɛm sõor zema a soya sõore. Bãmb zutu b na n kʋʋ maand n kõ b wẽn-dẽgd a Baal.

¹⁴Sã n ya foo, Zeremi, da saag n kos maam bũmb buud kãnga yĩng ye; da pʋʋs la f ra yõk m sɛɛg ye, tɩ m pa na n kelge, yell sã n wa pak-b ye, b sã n wa kot-m sõngr ye.»

¹⁵Soaala gomda woto: «M sẽn nong buud ningã ka tar pʋ-peelem ye. A wata m doogẽ wã bõe yĩnga? A tẽedame t'a sẽn pʋlemd bũmb ninga bɩ a sẽn kõt-m maand niynsã, tõe n zãag-a-la ne yel-beed bɩ? Yel-beeda sã n wa n sɛ, a le tara tɩɩm bɩ?

¹⁶M da pʋda a yʋʋr tɩ Oliviye sẽn tõe wombo, t'a biis ya sõmbo, t'a vãad sob n yɛsẽ. La ade, y sẽn wʋmd bʋʋr ningã, yaa bugum n dɩta ne pãnga, yaa a wila la b kaooda.

¹⁷Yaa dũni fãa Soaala-Wẽnd n da sel tɩɩgã la bãmb n wilgd-a marsã tɩ yel-beed be-la a zugu, a Israyɛl yel-wẽna yĩnga, a Zɩɩda yel-wẽna yĩnga. B kʋʋ maand n kõ a Baal, n beeg bãmb Soaalã.»

¹⁸Soaala-Wẽnd wilg-m lame tɩ m bãng a Israyɛl neba sẽn be tẽngr n sʋgdã.

¹⁹La maam a Zeremi mam da yaa wala pe-bila b sẽn tar n dabd rũms kʋʋb zĩigẽ, m da ka mi tɩ b rat n tʋm-m-la beed ye. Ad-b sẽn da gomde: D kɛɛg tɩɩga sẽn tar pãngã n lubi; d yiis a bõn-vɩɩs sʋka tɩ ned ba a ye ra le tẽeg meng t'a zĩndame ye.

²⁰La yãmba Wẽnde, dũni fãa Soaala, yãmb bʋʋd fãa kaooda tɩrga. Yãmb mii sẽn solg sũurẽ, la m tẽedame tɩ m sẽn dɩk m yellã n bas ne yãmbã, m na yãend y sẽn dokd m sũuri.

²¹Bɩ Anatot rãmba bãng tɩ dũni fãa Wẽnd tara koɛɛg ne-ba, bãmb sẽn baood n na n kʋ maam la b yetẽ: «Fo ka na n le gom bãngr goam Soaala yʋʋr yĩng ye, ka rẽ tõnd nug n na n kʋ-fo!»

²²Yaa rẽ yĩnga la Soaala-Wẽnd gomd woto: «Ade, mam na n yika ne-ba la zabr sʋʋg n na n kʋ b kom-bɩɩba, tɩ kom loog ne b kom-dibli la b kom-pugli.

²³Yʋʋmd ning m yel-beeda sẽn na n lʋɩ Anatot rãmba, zugu, ba a yembr meng kõn põs ye, na wʋm b fãa.»