Read SEBR SÕNGO, 1998 Zeremi 16 Bible Online

Zeremi 16 - SEBR SÕNGO, 1998 bible

Zeremi 16

¹Soaala-Wẽnd yeel-m-la woto:

²«Da rɩk paga n dog bi-ribla bɩ bi-pugl zĩ-kãnga ye.

³Ad-m menga sẽn yet bũmb ninga kom-dibli la kom-pugli wã sẽn na n dog zĩ-kãnga poorẽ, b ba rãmba, b ma rãmba, poorẽ.

⁴Koma na n nams-b lame n kʋ-ba. B kõn paam yaoogo, b kõn yãmb b kʋʋr ye; b na n lebga põosg bala, n dʋr tẽnga. Sʋʋga la kom n na n kʋ-ba, la b na na lebga yĩngr luiili la we-rũms rɩɩbo.»

⁵Sɩda, Soaala-Wẽnd le yeel-m-la woto: «Da kẽ kũum sẽn ki zak ning pʋg ye; da yãbe, la f da kũm zaka rãmb ye, tɩ mam zãaga m laafi, la m nimbãan-zoeere ne-ba.

⁶Nin-bɛd woo, kom-bõoneg woo, sẽn be tẽn-kãnga, b fãa na n kiime, b kõn paam mumb ye, la b kõn kelem b kʋʋr me ye; ned kõn põng zugu la ned kõn kɩɩs a yĩng ye.

⁷Ned sã n tar kʋʋre, a buuda ka na n paam tɩ b wa maas a sũuri la b kõ-a rɩɩb ye. B ka na n kõ kʋʋra soab rãam t'a yũ n gãneg a sũuri, a ba bɩ a ma sẽn ki yĩng ye.

⁸Neb sã n be zakẽ n maand kibsa, da kẽ be n naag-b n zĩnd n dɩ la f yũ ye,

⁹[28†] tɩ woto la m gomda, maam dũni fãa Soaala, a Israyɛl Wẽndã, la m yetame tɩ m na n sɛɛsa kibs fãa bʋʋre, n sɛɛs sũ-noog kaasgo la kãad-paalsa yɩɩla. La rẽ fãa na n yɩ-la y nifẽ.

¹⁰Fo sã n wa taas nin-bãmba koe-kãnga, tõe tɩ b sok foom tɩ yaa bõe yĩnga la Soaala-Wẽnd kãabd tõnd kãab-wẽns a woto fãa? Yell bʋgo la tõnd maan yã? Yel-wẽnd bʋgo la tõnd maan n beeg Soaala-Wẽnde?

¹¹Fo na n leok-b lame: ‹Yaa yãmb ba rãmba sẽn bas maama yĩnga, n bas maam n tũ wẽn-sãamse, n maan b yam, la b wõgemd b taoore n waoog-bã. Sã n ya maam, m leokd-b lame tɩ b basa maam, b ka reeg mam noor ye. Soaalã n gomde!

¹²Sã n ya yãmba, yãmb wẽnem yɩɩda y ba rãmb dẽnna. Ade, yãmb ned kam fãa tũ-la a sũurã sẽn dat wẽng ninga n ka kelg mam goama ye.

¹³Ad-y mam na n diga yãmb n yiis tẽn-kãnga tɩ y kẽng tẽngẽ yãmb sẽn ka mi ye, la y ba rãmba me sẽn ka bãng ye. Beenẽ, wĩntoog la yʋngo, y na n waooga wẽn-sãamse tɩ m na n maana wa m toog ka le be ne yãmb yɛs ye.› »

¹⁴Wakat n wate, Soaala-Wẽnd koɛɛga, tɩ b ka na n leb n yeele: «M wẽend ne Soaala sẽn vɩ la sẽn yiis-a a Israyɛl Ezipt dãmb tẽngẽ.

¹⁵B na n yeelame: ‹M wẽend ne Soaala sẽn vɩ la sẽn tɩ reeg a Israyɛl nug goabg tẽnsẽ, la tẽns niyns b sẽn da sẽeg-ba fãa.› M na n tall-b lame n wa tẽng ninga mam sẽn da kõ b ba rãmba.»

¹⁶Ade, mam a Wẽnde, m na n tʋma kʋɩl-zẽ-yẽedba wʋsg-wʋsgo tɩ b tɩ yõg-ba, la m na n tʋma tãoos rãmba tɩ b tɩ rig-b zĩis fãa: tãms zutu, kukumba zutu, la pĩis bogdẽ.

¹⁷Mam nin nee b soya fãa, b manesma fãa ka solg-m ye la mam mi-la b yel-wẽna fãa.

¹⁸Mam na n sɩbg-b-la b yel-manesem a yiib yĩnga, m na n sɩbg-b-lame tɩ b rẽgma m tẽngã la b ra pids-a-la ne b waoosa la b yell yoodã.

¹⁹Soaala-Wẽnde, yãmb la m pãnga, m teegd fãa-fãa, m gũuda, m soondg zĩiga m yɩɩr wakato! Ad-y bu-zẽmba na n yii zĩis fãa n wa yãmb taoore. B na n yeelame: D ba rãmba sẽn da pʋgd wẽnd niynsã yaa belgem-belgem bala, yaa sobgo, yaa zaalem.

²⁰Ninsaalba sẽn ka wẽndã tõe n naana wẽnd n kõ b mens bɩ?

²¹Ade, dũnna sẽ, Soaala n gomde, m na kɩt tɩ b bãng mam tõog sẽn ya a soaba, mam nug pãng sẽn ya to-to! B na bãng marsã tɩ maam la Naaba-Wẽnde.