Read SEBR SÕNGO, 1998 Zeremi 17 Bible Online

Zeremi 17 - SEBR SÕNGO, 1998 bible

Zeremi 17

¹A Zɩɩda yel-wẽnda gʋlsa ne kut kɩtga ne kɩtg keglem sẽn pid keglem. Gʋlsma gʋlsa ninsaal sũurẽ. Yaa bũmb sẽn dɩg vẽenega wa maan-kuga sẽn me zĩig zãngã.

²Bãng-y tɩ wala ned sẽn gomd a kamb yelle, yaa b maan-kuga yell la b gomda, n gomd ra-lugã sẽn sel kunkuba zut bɩ tɩɩsa sẽn gũma maasmẽ.

³M sẽn na n bas tɩ zɛɛdba zɛ n loog ne wã, na n yɩɩ foom a Zɩɩda, sẽn waoogd wẽn-naandsã la f pʋgd-b pʋt noore bɩ tãmsa zutu. Na n yɩɩ f arzɛka, f laoga fãa la b na n loog ne. La rẽ n na n yɩ f sɩbgre, f wẽn-naandsa pʋgba sɩbgre.

⁴Woto me la f na n yao pʋta la rũmsa lemse f sẽn da zãgs yaoob pĩndã. F meng n na lebg yaoodã bɛɛba nusẽ, pa-weer tẽngẽ. Woto me la f bãngd tɩ f widga m sũura bugum la bũmb kõn le tõog n kiis-a ye.

⁵Soaala-Wẽnd goma woto: M na gesa wa ka bark soaba, ned sẽn wẽnemda a kãar n tees maam, ned sẽn teeg ninsaala, nemd bala.

⁶A yell na n yɩɩ wa tuugu sẽn be zĩ-koɛɛngẽ, a ka tẽed zu-noog ba bilfu. A yɛsa a ye we-raooga kuga sʋka, a sela birg sẽn paoog zĩigẽ, yaa zĩ-peen-daaga, yaa yams-neere.

⁷M yaool n ningda barka ned ninga sẽn teegda maam, n dɩkd a menga n ningd maam nugẽ.

⁸ [29†] A yell na n yɩɩ wa tɩɩga sẽn sel kʋɩlg noore, t'a yẽgna tẽeg n tat kooma. A ka na n zoe rabeem, tʋʋlg ye, a vãada ka na n kʋɩ ye. Ba ya sa-paoor yʋʋmde, a ka ne a sẽn na n bʋ bũmb ning poorẽ ye, Biisa sẽn tar wombo la b sẽn tare.

⁹Ninsaal sũur pida ne sẽn golme, sẽn golme n ka le tõe n tẽeg ye. Ãnda n tõe meng n bãng sẽn be sũurẽ?

¹⁰ [30†] Maam, Naaba-Wẽnde, maam bala n vɛɛsd ninsaal tagsgo, maam bal n ne sẽn be a sũurẽ, maam bal n tar ned yel-manesem fãa n tõe n wa rol-a.

¹¹Ad-y ned sẽn tũ noor tõdgre n lebg arzɛk soaba, wẽnda koadeng sẽn wũg gɛla, gɛla a sẽn pa lobe. A arzɛka menemda a nifẽ la a vɩɩma baasgẽ, t'a yama menem n bas-a-la zãnga.

¹²Al dũni sɩngrẽ tõnd wẽnd doogo tɩ zaoolga yĩngr wala naam zaoore.

¹³Soaala-Wẽnde, yãmb la a Israyɛl saagre, la sẽn ka pʋgd-b yãmbã, bãmb na looga ne yãnde. Sẽn wẽnemd-b b kãare n tees yãmbã bãmb yʋʋra kõn pa dũniya, t'a gʋlsa tom zugu. La rẽ yaa b sẽn bas yãmba, vɩɩma ko-nifu.

¹⁴Tũuda ne yãmba, Soaala tɩ m paam tɩlgre. Fãag-y maam tɩ m na põse, M ziira zãng-zãng la yãmba.

¹⁵Ad neba fãa sẽn sokde: «Soaala gomda na n pidsa da-bʋre? Bɩ b bas b gomda t'a pids wɛ!»

¹⁶Soaala, ka maam n dɩdgd yãmba tɩ y bool yel-beeda ye, m pa kos tɩ y bas-a t'a lʋɩ d zug ye; y mii rẽ neere; y ket n tẽra m sẽn yaag m noor n togs fãa.

¹⁷Da maan-y tɩ m wa ka le mi m sẽn beẽ ye tɩ yel-beed sã n wa fãa, yaa yãmb nengẽ la m wat n soonde.

¹⁸Sẽn namsd-b maama n togẽ ne yãnde, kaẽ maam ye. Bãmb n tog n zĩẽ ne sũ-sãanga la kaẽ maam ye. Bool-y yel-beeda raare n kõ-ba, pãb-y-ba n beds zãnga.

¹⁹Soaala-Wẽnd meng n yeel maam: Kẽng n tɩ yals buuda dignoorẽ; dignoor ninga a Zɩɩda nanamse sẽn tũud n kẽedẽ la b yitã. Dẽ poore, saag Zerizalɛɛm dignoya fãa.

²⁰Fo na n yeel-b lame: Kelg-y Soaala koɛɛga, Zɩɩda nanamse, Zɩɩda rãmba, Zerizalɛɛm kẽedba, la yãmb fãa sẽn tũud a kʋɩlensã n kẽedẽ la y yitã.

²¹[31†] Soaala-Wẽnd yet-y lame tɩ y gũus y menga la y da tʋk zɩɩbo, vʋʋsga raar ye. Da sak-y tɩ b tall zɩɩbo n tũ Zerizalɛɛm dignoya n kẽ ye.

²²[32†] Da tʋk-y zɩɩbo n yi yãmb zagsẽ, vʋʋsga raar ye. Baraare da tʋm-y tʋʋmd ye. Yaa Soaala raare wala m sẽn da wilg y ba rãmba.

²³Yaa sɩda tɩ ba rãmba pa kelg ye; b pa kɩll b tʋbre n kelg goama neer ye. B naka b kãare, b pa tʋlg n kelge, b pa tʋlg m deeg saglgo ba a ye.

²⁴Yãmba, b kamba,- yaa Soaala n gomde — yãmb sã n kelg-m neere, vʋʋsga raare, y sã n ka sak tɩ b tʋk zɩɩbo, zɩɩb buud ba a ye, n tũ tẽn-kãnga dignoya n kẽ, tɩ daara yaa m daare la y kõn tʋm tʋʋmd buud ba a ye,

²⁵ad-y y dĩm dãmba sẽn zao a Daviid naama goeela zugu, n kẽnd ne wiidi bɩ n zao bilim-bilm, bãmb ne b kug-zĩidba, bãmb ne Zɩɩda neba la Zerizalɛɛm dãmba, bãmb fãa na n kell n tũuda noya n kẽed tẽngã la neba na n kell n pa-la a pʋgẽ.

²⁶Sã n ya woto neb na n yii Zɩɩda tẽnga n wa pid wẽnd doogã. B na n yii Zɩɩda tẽnsẽ, Zerizalɛɛm tẽn-kɩremse, a Bẽnzame tẽn-peelmẽ, kunkuba zutu, bãg-faagẽ, la Negɛb zĩ-pɛɛlẽ. B na n wa kʋʋ maando, maanda buud toor-toore: yũ-nood maando, laafi kosg maando, bark pʋʋsg maando, n paas alkam la tɩdar kũuni.

²⁷La yãmb sã n ka kelg mam goama, y sã n pa kees vʋʋsga raare n kõ maam, n saag n tũ noya n kẽ Zerizalɛɛm ne zɩɩbo, m na widg bugum tẽnga pʋga, bugum sẽn na n dɩ a ro-neeba la sẽn ka na n tõog n kiis ye.