Read SEBR SÕNGO, 1998 Zeremi 18 Bible Online

Zeremi 18 - SEBR SÕNGO, 1998 bible

Zeremi 18

¹Ad noor m sẽn paam Soaala nengẽ:

²«Yiki, Zeremi n kẽng yagda yiri; beenẽ la m na n togs foom m koɛɛga.»

³Mam kẽnga yagda nengẽ n tɩ yãend t'a be a yagd-doogẽ. A ra sagla yagd a tebra pʋgẽ n tʋmnẽ.

⁴A sẽn da yagd bũmb ninga ka sak ye, t'a le maneg n yag a to, tɩ tũ wala a sẽn da rata.

⁵La Soaala-Wẽnd goma ne maam n sok-ma: Mam ka tõe n maan ne a Israyɛl zaka rãmba, wa yagda sẽn maanda bɩ?

⁶Gese, Israyɛl, wala yakã sẽn be yagda nugẽ, yãmb me bee mam nugẽ boto!

⁷Wakat ninga mam mii n gomda buud kẽer yelle, n gomd rĩund kẽer yelle n yet tɩ m na n võome, tɩ m na n tus n lubame, tɩ m na n wãame.

⁸Bãng-y tɩ buud kãens sã n tuub b wẽnema, mam basdame tɩ sɛ, n ka lebd n sɩbg-b ye.

⁹Daar ninga, mam mii n yeelame tɩ m na n manega soolma a yembre t'a yɩ sõngo, tɩ m na n meeme la m sele.

¹⁰La mam sã n mik tɩ b maanda wẽnga, n ka kelgd mam goama, mam me ka kelld n maan neer ninga m sẽn da rat n maana ye, m tekda m daabo.

¹¹Marsã, Zeremi, fo na n goma ne Zɩɩda rãmba, la ne Zerizalɛɛm neba: Wilg-b tɩ m temdame n na n kɩt tɩ yell pak-ba, mam bʋgsda m yamẽ n dat n sɩbg-ba. Bɩ ned kam fãa bas so-wẽng ninga a sẽn tũudã. Bɩ a modg t'a tʋʋma yɩ sõma t'a manesma tek n yɩ neere.

¹²La ayo, b pa rat n lak n bas b tʋʋm wẽna ye, b yetame tɩ m da wɩɩg ye, tɩ b na maana wala b sẽn yalse.

¹³Soaala-Wẽnd goma woto: Sogs-y bu-zẽmbã n gese, ãnna n wʋm yell a woto! M bi-pugla, a Israyɛl, maana yell sẽn ka sakd kelgre, a maana yel-beedo.

¹⁴Waooda sẽn gĩs Libã tãmsa zug kooma, ko-maasga sẽn fõt n sigdã, y na wʋm tɩ b gomd tɩ b pa rat ko-kãnga? Tõe n sãbsa koom sẽn yit yɩɩga, tõe n sãbsa koom sẽn ya maasg yʋdʋd?

¹⁵Mam neba bala n yĩmd mam yelle! B wisda wẽn-naands tɩdare, wẽnd dãmb sẽn pa wẽnde, sẽn gãnegd beoos b sor zugu tɩ b kẽnd n lagsdẽ. B basa so kʋdre n dɩkd soy sẽn ka manege.

¹⁶La woto la b tẽng lebg zĩ-peen-daaga. Ned ka yãet-a n ka wiis ye. Ned ninga fãa sẽn loogda be pɛleng yɩkdame, la a girda a zugu.

¹⁷M maanda ne-ba wala yaang sobg sẽn maande m sẽegd-b-la b bɛɛba taoore. B sẽn kong pãng raare mam na n wẽnemda m kãare, kõn yɩ m neng ye, m kõ ges-b ye.

¹⁸Neb n waa n yeele: «Aya, wa-y yã tɩ d kɩt tɩ wʋm a Zeremi, tɩ bala, ka maan-kʋʋdb sẽn na n zãms-do n paoog-d ye, ka neb sẽn tar yẽesem n na sagl n paoog-d ye, ka bãngdb sẽn na n taas tõnd Soaala koɛɛg n paoog-d ye. D zãgs a karenga kelgre, d modg n sãam a yell zãnga ne d wɩdse!»

¹⁹Soaala-Wẽnde, kelg-y-m neere kelg-y m bɛɛba rõadga.

²⁰Ned na maan wẽnga n dol yel-sõmde. B yaool n segenda bẽdgo mam yĩnga. Tẽeg-y mam sẽn yaas yãmb taoore n da pẽgd-ba, la m da yõkd sɛɛga b yĩnga, tɩ y sũur da puuga ne-ba.

²¹Woto wã bas-y b kamba tɩ b ki kom, tus-y-ba n lub sʋʋs zutu! Kɩt-y tɩ b pagba kelem b kamb kʋʋre, kɩt-y tɩ b pagba lebg pʋg-kõapa! Kɩt-y tɩ bã-longdem kʋ b sɩdb rãmba fãa! Kɩt-y tɩ b kom-bɩɩba fãa pa tãpẽ!

²²Kɩt-y tɩ b wʋm kũmkũma b yiya pʋsẽ, daar ning y sẽn na n tiig n tʋm bɛɛb b nengẽ. B baood n na n yõk-m lame, b gãneg-m-la b bẽdgo.

²³Sã n ya yãmba, Soaala, yãmb mi-la b sẽn dat n maan bũmb ning fãa, n kʋ-ma. Da kõ-y-b sugr ye; da yẽes-y b yel-wẽna ye. Kɩt-y tɩ b fãa lʋɩ yãmb taoore, puug-y y sũuri n kɩt tɩ wʋm-ba!