Read SEBR SÕNGO, 1998 Zeremi 2 Bible Online

Zeremi 2 - SEBR SÕNGO, 1998 bible

Zeremi 2

¹Soaala-Wẽnd goma ne maam n yeel woto,

²tɩ tãs woto Zerizalɛɛm neba tʋbẽ, ad Soaala sẽn yeele: «M tẽegda f nonglma ne maam, f sẽn waa n ya pʋg-sɛda, la f sẽn waa n ya m pʋg-paala, f ra tũuda maam zĩ-pɛɛlẽ, zĩig ninga bũmb sẽn ka tõe n yi.

³Israyɛl, fo ra yaa maam m ye soolem, wala kood-rẽeng biisi. Ned sã n da sɩɩs-fo, d da reegda toogo, yel-beed da wẽnegd n lʋɩta a soab zugu.» Soaala-Wẽnd n gomde.

⁴Zakoob zak rãmba, Israyɛl buud rãmba, kelg-y koɛɛg ninga

⁵ [3†] Soaala-Wẽnd sẽn kõt yãmba: «Kegr bʋg la y yaab rãmba yãend m nengẽ? Bõe tɩ b lak ne maam? B laka ne maam n na n pʋg wẽn-faado, tɩ bãmb me na n tũ rẽ n lebg nin-faado.

⁶B ka sok lɛ-lɛ: ‹Soaala-Wẽnd bee yɛ? Bãmb n yiis tõnd Ezipt tẽngã, n yɩ d sɩleto zĩ-pɛɛlẽ, tẽn-koɛɛngẽ, lond la lik tẽnga, tẽng ned sẽn ka pɩʋʋgde, tẽng ned ba a ye sẽn ka tiid n kẽedẽ.›

⁷Maam n yaool n tall yãmba n tɩ kẽes-y tẽn-noogẽ, tẽng sẽn bĩm ne tɩɩse tɩ y na n dɩ bi-noodo, la y rok y nin yõodo. Be la m tẽnga, la y tɩ kẽeme n dẽgem-a; da yaa m soolem, la y kɩtame t'a lebg wɩɩbdo.

⁸Maan-kʋʋdba ka saag n sok-ma: ‹Soaala-Wẽnd bee yɛ?› Noora karen-saam-dãmb me boto, tẽnga taoor dãmba zẽka b zug ne maam, bãngdba sẽn da taasd-b koees niynsa ra yaa wẽn-faoog a Baal koeese. B fãa tɩ noka wẽn-faadã.

⁹Yaa rẽ yĩnga la m boond-y bʋʋdo, n na n wa bool bʋʋd yɛsa y kamba la b yagense. Yaa maam n gomde, yaa Soaalã n gomde.

¹⁰Kẽng-y Kitim sẽn puk koom sʋka, ka rẽ bɩ y tʋm tɩ b sok Kedar n gese be rãmba ne ka rãmba manesem sã n yaa a ye.

¹¹B maneg n sok n ges tẽn-bʋg rãmba n teem b wẽnd dãmba? Ad-y yaool n da ka wẽnd me ye. Mam buuda zug sẽn noome t'a paam tɩ m yaa a Wẽnde, yẽnda n tek a rẽnda sẽn pid ne ziir, yẽnda n bas maam n kẽ wẽn-faado.

¹²Yĩngr saase, bɩ y yɛɛse, bɩ y zoe rabeem, zoe-y rabeem wʋsgo. Maam n yeele, maam, y Soaalã.

¹³Yaa yel-wẽna a yiib la mam neba maan yã: b basa maam, mam sẽn ya ko-vɩɩga, ko-nifu, n na n tu bul-kẽoto, buls sẽn yũnd koom.

¹⁴A Israyɛl lebga yamb bɩ bõe, a roga ne yembdo bɩ bõe, tɩ neb a taab na n wa soog-a?

¹⁵ [4†] B yik n yɛsa ne-a wa bõnyẽese, b tees-a lame n wũundẽ, b kɩtame t'a tẽnga lebg zĩ-pɛɛla, a tẽn-bɛda fãa rɩɩ bugum, tɩ ned ba a ye ka ket b pʋgẽ ye.

¹⁶Memfis la Tapanɛs rãmb menga wa n põng-a-la wa zugu.

¹⁷La rẽ fãa yaa foo n bao, Israyɛl, yaa foo n bas Soaala, f Wẽnnaam, bãmb n da kẽnd taoore n wilgd-f sore.

¹⁸Marsã fo na n le kẽnga Ezipt tẽnga n tɩ maan bõe? N tɩ yũ Nil koom bɩ bõe? Fo na n kẽnga Asiri bõe yĩnga? N tɩ yũ a kʋɩl-kãsenga koom bɩ bõd?

¹⁹Bɩ f bi-beelem dɩ-fo, bɩ f yel-wẽna sɩbg-fo! Woto la f bãngd Soaala-Wẽnd basgo sẽn ya wẽng la tɩɩseng to-to. Woto la f bãngda, tɩ ka segd tɩ f zẽk f zug ne bãmb ye. Yaa Soaala n gomde, yaa dũni fãa Wẽnd n gomde.

²⁰Kelge, Israyɛl, f Soaala koɛɛga! N-yẽe! Al daar zãra, fo tara f zug zẽkr ne maam, fo basa maam la yaa woto la f zĩ n gomda: M dat n sooga m menga, la sɩda, wa pʋg-yoodre, f tʋɩta f gãag tãms zutu la tɩɩs tẽngre.

²¹Mam yaool n da sela foom wala bugsuntungu sẽn ya sõmbo, t'a biisa me ya sõma. La maana a wãn marsã tɩ fo lebg bugsuntung yooko, n womd biis sẽn ka lebd be?

²²Ba fo pek f meng ne zẽ-koom, ba f sõ safãnd tɩ wʋme, mam taoore fo yel-wẽna ket n tab-f lame. Maam n yeele, maam a Wẽnde.

²³Fo na n maana wãna n tõog n yeele: Mam ka rẽgem m meng ye, m ka zoe n pʋg Baal dãmb ye. Ges f nao-tagdr sẽn dɩg bãg-faagẽ, reeg f kongre. Ad-f wẽnda yʋgem-sɛdga, n saad n zoet goabg la rɩtgo.

²⁴Ad-f wẽnda burgumd yãanga sẽn nok zĩ-pɛɛla. A sã n doog a neng n kok yũugu a ningda tĩiga, n ka le tõe n yaas ye. Burgum-daada ka namsd ba bilfu t'a meng a toore n wat n seg-ba, a raab wẽnga sã n tus-a t'a yiki.

²⁵Gũus f menga Israyɛl! F sã n zoet ne tĩiga, f na n pogla f naoore ko-yũud na n yõk-f lame. La fo leokdame tɩ m da wɩɩg n gom ye, tɩ f nonga f wẽn-sãamse, tɩ bãmb bal la f rat n pʋge.

²⁶La ade, raar a ye, Israyɛl kamba, pagb la rapa, dĩm dãmb ne b kug-zĩidba, maan-kʋʋdba la bãngdba, ad-y y zug na n wuka ne yãnde wala wagdre, b sẽn lingi.

²⁷Yãmb gomda ne raoog sẽn maneg n peese la y yetame: ‹Foo la m ba.› Y gomda ne kugr sẽn maneg n pees tɩ y boond rẽnda tɩ y wẽnde, la y yetame: ‹Foo n dog maam.› Y zãgsa a tees n ges maam, n wẽneg y poor n tees maam. Toog sã n tar-y marsã bɩ y yaool n tees maam n kelemdẽ: ‹Yik n fãag-do!›

²⁸Ad-y m na n leok-y-la woto: ‹Wẽnd dãmba fo sẽn maana bee yɛ? Bɩ bãmb yik n fãag-fo, f yell pakr wakato, b sã n tõe. Sɩda Zɩɩda, fo wẽnd-naandsa sõor zema f tẽnsa sõore.›

²⁹Bõe yĩng tɩ f rat n dogl yell m zugu? - Soaala-Wẽnd n gomde. Yãmb fãa ka bas maam laa?

³⁰Mam sɩbga yãmba la yaa zaalem bala; yãmb pa reeg m saglga ye. Y tol n yika wa bõnyẽese n kʋ y bãngdbã.

³¹Zamaan kãnga rãmba, wʋm-y Soaala-Wẽnd gomde! Israyɛl kamba, m lebga yãmb yĩnga wa we-raoog sẽn kẽesd dabeem bɩ wa tẽng sẽn gãe la a yikd ne lika. M buudu, bõe tɩ y gomd tɩ y so-la y menga, la y kõn lɛɛg n wa kẽe maam yɛsa?

³²M sok-y n gese, bi-pugl yĩmda a fan-teedo, pʋg-paal yĩmda a sɛɛg sẽbdg sẽn maneg n pãneme? M pa tẽed ye! La sã n ya foom, m buudu, f yĩma m yelle, al daar zãra; dasma ka le tõe n sõd ye.

³³Sã n ya sɩda, ad foo n mi f sẽn na n tũ sor ninga n bao f sũ-noogo, woto, ba na tũ ne yel-kɛga, fo na rɩk f sorã, tʋm tɩ narã lebga f minungu,

³⁴al tɩ b ne f futa zugu neb sẽn ka tar-b toorẽ yell zɩɩm. F pa ling-ba tɩ b kaood kʋɩlens ye. Ne rẽ fãa, fo raaga b zɩɩm,

³⁵la fo ket n yetame tɩ f yaa nin-tɩrga, la ka tog tɩ m sũ-puura kell n pʋg-f ye. Ade, fo sẽn yeel tɩ f ka maan bũmbã m na n bool-f-la bʋʋdo.

³⁶Fo sɩd ka zɛɛd ne sor tedgr ye, f ka zɛɛd ne f zo-rãmba teengo ye. La Ezipt na n ning-f-la yãnde wa Asiri sẽn ning-f yãndã.

³⁷Fo na n kʋka f zugu n yi Ezipt tɩ maam a Wẽnd ka rat fo sẽn teeg b rãmba ye. F yɛla ka tõe n maneg woto ye.»