Read SEBR SÕNGO, 1998 Zeremi 22 Bible Online

Zeremi 22 - SEBR SÕNGO, 1998 bible

Zeremi 22

¹Soaala-Wẽnd kõ-la a Zeremi noor kãnga: «Kẽng Zɩɩda, na-yirã, ad fo sẽn na n tɩ yeel bũmb ninga:

²‹Kelg Soaala gomde, Zɩɩda dĩma, sẽn zao a Daviid naam goeel zugu n paas yãmba, kug-zĩidba, la yãmb fãa sẽn kẽed la y yit dĩma zakẽ,

³ad-y Soaala gomd-y-la woto: Bɩ y bʋ-kaoor yɩ tɩrga, reeg-y pãng rãmba sẽn yõgd n deesdẽ wã. Sã n yaa sãana bɩ yaa kɩɩba, bɩ pʋg-kõore, da tũ-y b sẽn ka pãngã n zãmb-b ye, n deeg b paoong ye. Da le sak-y tɩ nin-sõng zɩɩm daag ka ye.

⁴Yãmb sã n mao n deeg mam saglgo, nanams na n kell n zaoonda a Daviid naama goeel zugu, b na n kell n zomba wiidi bɩ b na n kẽe b bilim-bilma. B na kell n tõog n kẽed na-yirã, bãmba, wala b kug-zĩidba, la b soolma rãmba.

⁵[37†] La yãmb sã n ka kelg mam goama, sɩd ne sɩda, yaa Soaala koɛɛga, do-kãnga na n lebga do-wãoongo.› »

⁶Sɩda, yaa woto la Soaala-Wẽnd gomd Zɩɩda naaba roog poorẽ: Ne m sẽn get-fo tɩ f neerma pida wa Galaad googo, wala Libã zug-tẽnsʋka, ad-m kãabdame tɩ m na kɩte tɩ f lebg zĩ-peen-daaga, f na lebg raboogo.

⁷Fo yĩnga m na tigs tẽn-wãadba, m na yiis-b ne wãab te-bɛda b na kɛ y kʋgsã, y tɩ-neebã, la b na n ning-b-la bugum.

⁸Neb wʋsgo na n wa loogda tẽn-kãnga sɛɛgẽ, b na n wa sogsda taaba: «Bõe la Soaala-Wẽnd maan yã tɩ tẽn-kãseng kãnga lebg woto?»

⁹Dẽ marsã la b na n leok-ba tɩ yaa tẽnga rãmb sẽn wõgemd wẽn-naands taoore n waoog-bã. La woto b basame n ka pids b sẽn da kãab Soaala, bãmb Wẽnnaama ye.

¹⁰Zɩɩda rãmba, da kũm-y ned ninga sẽn ki-a wã ye, da kũm-y dĩm a Zoziyas ye, da sãam-y y sũur ye. Kũm-y ned ninga sẽn loogd-a yembdã, kũm-y dĩma a Salum, tɩ bala a ka na n lɛɛg n wa ye, a ka na n leb n yãend a ba yir ye.

¹¹ [38†] Yaa woto la Soaala-Wẽnd gom Zɩɩda rĩm a Salum poorẽ. Zɩɩda dĩm kãng dɩɩ naam a ba a Zoziyas poore, la b tall-a lame n loog pa-weere: b yeelame t'a kõn lɛɛg n wa ye.

¹²B sẽn tall-a n kẽng tẽng ningã, a na n kii be, la a kõn leb n yãee a ba yir abada.

¹³Yell n na n pak foo, Zoakim, fo kɩtame tɩ b me na-yiri, la fo yaool ka maand sẽn tog ye. Fo meta roto n dogend doog a to zugu, la f ka maand neer ne f soolma rãmb ye. Fo kẽesda neb tʋʋmde n yaool n ka yaood-b ye.

¹⁴Fo yetame tɩ f rat n me f yĩnga ro-kẽeng-kẽenga, ro-roglem-roglem. Fo kẽe n ningda ro-vẽ-yalense. Fo tablgda rooga lalse ne ra-peg-sĩdma; fo kɩtdame tɩ bolg-b tɩ b lebg miid yʋs.

¹⁵Yaa fo sẽn dat n wilg tɩ f yaa dĩma la f n ning ra-sĩdma. Fo ba wã da rɩtame la a yũuda wa neb a taaba sẽn maande, la yẽ ra maanda sẽn tog la sẽn zemse la rẽ da ka sãamd bũmb ye.

¹⁶A ra ka sãbsd naong soaba, a ra ka paoogd nimbãan-ned ye. La rẽ n da noom ned fãa. Sẽn maanda woto wilgdame t'a mii maam, Naaba-Wẽnde.

¹⁷Fo sẽn ne yaa sẽn nafd foom bala. Sẽn pak foo bala yaa f kʋ sẽn ka tar b toorẽ yelle, yaa f maan bi-beelem la pãn-tõog.

¹⁸ [39†] Yaa rẽ yĩnga, la Soaala-Wẽnd yet a Zoakim poorẽ, a Zɩɩda dĩm a Zoziyas biiga poorẽ: A kũum daare, b kõn kelem kʋʋr ye, Ned ba a ye kõn yeele: «M saam-biiga, ges yel-beedo! M tão sõngo, ges yel-beedo!» B kõn daagd nintãm la b yetẽ: «Ges yel-beedo, m zu-soaba! Ges yel-beedo, m naaba!»

¹⁹B na n mum-a-la wa rũnga, B na vu-a lame n tɩ lobe Zerizalɛɛm digem-poore.

²⁰Dʋ Libã tãnga zugu n kaase, Zerizalɛɛm, Dʋ Bazã tãnga n kelem tɩ sãde. Kelem lolle Abarim tãmsa zutu, woto f zo-rãmba na bãng tɩ f yell sɛɛme.

²¹Yel-beeda sẽn da waa n ket n zãra, m da zoe n togs-f lame, la f leok-m lame bala: «M pa na n kelg ye.» La yaa woto la f ra sɩng n maanẽ, f zɩɩ n kelg m goam ye.

²²Sobg peega f taoor dãmbã, f zo-rãmba boba yembdo. Yaa f tʋʋm wẽnsã n wa ne f paoor la f yãnde.

²³Fo sẽn da zao ne laafi Libã tãmsa zutu, n da tʋɩ f tʋk kʋg-wogda zutu, kelg waasg ning f sẽn waasde, ges f sẽn tiig n wẽnd f yĩnga n lebsd-a goabg la rɩtgo, wa pag n digimd rogem waoodo.

²⁴ [40†] Fo na n togsa Zɩɩda dĩm a Koniya, a Zoakim biiga, maam, Naaba-Wẽnd n gomde, tɩ ba a sã da yaẽ nug-bĩnga nug-bĩn-neere, ad-m naan n pidgẽ yã n lobe. M wẽend ne m menga!

²⁵M sẽn basd foo neb niyns nusẽ, yaa sẽn dat-b fo kũuma. Yaa neb niyns fo sẽn yɛɛsd wʋsgã, yaa Babilon dĩm, a Nabikodonozor, ne a tãb-biisã.

²⁶M na n diga foom ne pag ning sẽn dog foomã tɩ y tees tẽng a to. Tẽn-kãng ka wẽnd fo tẽnga lɛ-lɛ; be la foo ne f ma wã na n tɩ ki.

²⁷Y na n tʋlga ne y sũur fãa n lɛɛg n wa y tẽngẽ, la y kõn tõog ye. La tẽng ninga y sẽn dat ne y sũur fãa n leb n wa wã, y kõn le tag be ye.

²⁸Woto la neba sokda: «A Koniya yaa rʋk sẽn ka be barka la sẽn wãage, bɩ a yaa bũmbu ned sẽn ka rata? Bõe n maame, tɩ b dig yẽnda ne a buudu, tɩ b kẽng tẽng ninga bãmb sẽn ka miẽ?»

²⁹M tẽnga! M tẽnga! Kelg Soaala-Wẽnd koɛɛga.

³⁰Soaala-Wẽnd gomda woto: «Gʋls-y nin-kãnga wa ned sẽn ka tar kamb ye. Bi-ribl kãnga vɩɩma ka pids ye. A buuda sʋka, ned ka be sẽn na n paam zu-noogo n zaond a Daviid naama goeela zug ye, la a kõn dɩ naam Zɩɩda ye.»