Read SEBR SÕNGO, 1998 Zeremi 24 Bible Online

Zeremi 24 - SEBR SÕNGO, 1998 bible

Zeremi 24

¹ [43†] Soaala-Wẽnd wilga maam pet a yi sẽn pid ne kankama n dɩg wẽnd dooga noore. Dẽ t'a Nabikodonozor, Babilon dĩma, talla yembsã n zãag ne Zerizalɛɛm. Yɩ-la a Yekoniya, Zɩɩda dĩma, a Zoakim biiga, n paas kug-zĩidba, tʋʋm-mitba la Zerizalɛɛm kʋɩlensa pagdsa manegdb, la a tall n kẽng Babilon.

²M yãee pet a yiibu, peoog a ye da pida ne kankam sẽn ya sõma, n ya noog wʋsgo, wala kankam dẽemse. Peoog a to wã da pida ne kankam põaasa; b da põoga wʋsg wʋsgo n ka tõe n le yɩ rɩɩb ye.

³Soaala-Wẽnd yeela maam: «Zeremi, fo nee bõe?» Tɩ mam leoke: «Kankama! Kẽer yaa sõma, n ya neeba. Sẽn ka-b sõma wã, põogame; b põoga wʋsg-wʋsgo al tɩ b ka tõe n le wãb-b ye.»

⁴Dẽ la Soaala-Wẽnd yeel maam:

⁵«Ad maam, Naaba-Wẽnde, a Israyɛl Wẽnnaama, sẽn togsde: Kankam sõma wã gesg sakdame. Woto me noom-m lame tɩ m ges Zɩɩda yemse, mam sẽn yiis tẽn-kãnga pʋgẽ n kɩt tɩ b kẽng Kalde dãmb tẽnga.

⁶N-ye! M get-b lame tɩ m sũur noom wʋsgo, tɩ m na n le tall bãmba n wa tẽn-kãnga. M pa rat n sãam-b ye, m datame n le lebs-ba b pĩnd zĩigẽ. M pa rat n võ n lobe, m datame n maneg n sele.

⁷M na kɩt tɩ b bãng tɩ maam la Soaala. B na n lɛɛg n wa kẽe maam ne b sũur fãa. B na lebg m buudu tɩ m lebg b Wẽnnaam.»

⁸Ad maam, Naaba-Wẽnd sẽn leokd Zɩɩda dĩma, a Sedesiyas, poorẽ, a kug-zĩidba poorẽ, neb niyns fãa sẽn pa Zerizalɛɛm poorẽ, neb niyns fãa sẽn tɩ kẽ Ezipt poorẽ: m na n maana ne bãmba wa b sẽn maand ne kankama sẽn sãame n ka tõe le yɩ rɩɩbã.

⁹Woto dũni wã rĩunda na yãend a Sedesiyas n yɛɛse. M sẽn na n sẽeg-b zĩig ning fãa, yẽ yellã n na n lʋɩ taoore; al tɩ b sã n dat n la, bɩ n tʋ, bɩ n pʋd yɩɩlle, bɩ n kãab kãab beedo, yẽ bal la b bẽt n gomda.

¹⁰Yel-beed ka tɛk na n lʋɩ-la b zugu: zabr-sʋʋga, kom, la bã-longdem, n wa menes-b zãnga tẽng ning m sẽn da reeg n kõ b yaab rãmba la bãmb mense.