Read SEBR SÕNGO, 1998 Zeremi 25 Bible Online

Zeremi 25 - SEBR SÕNGO, 1998 bible

Zeremi 25

¹ [44†] Gomd sẽn get Zɩɩda neb fãa yelle. Gomd kãnga taasa a Zeremi, dẽ t'a Zoakim, a Zoziyas biiga, Zɩɩda dĩma, deeg naam tɩ yʋʋm naasẽ, dẽ t'a Nabikodonozor nan dɩt a naama pipi yʋʋmde, Babilon tẽnga.

²Bãngd a Zeremi goma Zɩɩda neba taoore, n paas Zerizalɛɛm dãmb fãa taoore.

³A goma woto: «Sẽn sɩng a Amon biig a Zoziyas naam deegre yʋʋm piig la a tãab soaba n tãag dũnna, ad-y m sõta yʋʋm pisi la a tã la Soaala-Wẽnd sẽn yõk goam ne maam tɩ mam me ka vʋʋsd ne m deeg b goama n taas yã. Yãmb bala m pa kelgde.

⁴Dẽ pʋgẽ me, Soaala-Wẽnd pa vʋʋs ne b tʋm bãngdba y nengẽ ye. B pʋga yãmba n tʋm b tʋʋmd sõngã la yãmb pa kelg-b ye, y pa maan gũusg ye.

⁵B gomdã da yetame: ‹Ned kam fãa bas a so-wẽnga, n bas a tʋʋm yaalsã, tɩ woto y na tõog n vɩɩnd tẽng ning m sẽn dɩk n kõ y yaab rãmba la yãmb mense, zamaan sẽn pʋgd taab n zãage.

⁶Yãmb sã n pa pʋgd n waoogd bu-zẽn wẽn-naandse, y sã n ka pees wẽn-naandse, n puug m sũuri, mam kõn maan-y bũmb ye.›

⁷La yãmb yaool n ka kelg maam ye; Soaalã n gomde, y tol n maana wẽn-naandse n puug m sũuri, la rẽ n wa ne yel-beedã.»

⁸Yaa rẽ yĩnga la dũni fãa Wẽnd, gomd woto: «Yãmb sẽn pa kelg m sẽn togsã,

⁹ade, mam na tʋmame tɩ b kẽng n tɩ bool goabg rãmba fãa la b bool m tʋʋm-tʋmd a Nabikodonozor, Babilon dĩma. M na n kɩtame tɩ b wa zab ne tẽn-kãnga nebã la a yagsã sẽn ya bu-zẽmba. M na naag bãmb ne yãmb n wã zãnga, la m na n kɩtame tɩ tẽnga lebg raboogo, la sẽn na n yãend-a na n yɛɛsame la a fɩɩle n wilg a sũ-beedo. Yaa maam, Naaba-Wẽnd n gomd woto.

¹⁰[45†] Ad-m sẽn na n menes y tẽngẽ: kibs bʋʋre, sũ-noog kaasgo, kãad-paalsa yɩɩla, werb-bʋʋr neerẽ, fitil vẽenem.

¹¹[46†] Tẽn-kãnga na n wãa gilli n lebg raboogo la yʋʋm pisopoe pʋgẽ, bu-zẽmba na n paa Babilon dĩma soolmẽ.

¹²La yʋʋm pisopoe wã sã n wa pidi, mam na n soka Babilon dĩma a tʋʋm yoodã, a neba tʋʋm yoodã; m na n yika ne b tẽngã n kɩt t'a lebg daar fãa yĩnga, we-raoog sẽn kẽesd rabeem.

¹³Yel-beed niyns sẽn na n lʋɩ tẽn-kãnga zugã, yaa yel-beeda sẽn na n dɩ bu-zẽna, yaa yel-beed niyns a Zeremi sẽn gome la sẽn sõdg sebr kãnga pʋgã.

¹⁴Tẽn-bɛda neba la dĩm dãmb sẽn tar pãnga n na n wa soog Babilon dãmba, bãmb me wakata sã n ta. Woto la m na n dol b yel-wẽna.»

¹⁵Ad noor ninga Soaala, a Israyɛl Wẽnda, sẽn kõ a Zeremi: «M kɩt-f-la wam-pobgr kãnga sẽn pid ne m sũ-puura rãam. Reeg-a la f yũnug bu-zẽmba mam sẽn tʋmd foom b rãmb nengẽ wã.

¹⁶Bɩ b yũ n tuum la b gãeeme, b sã n wa yãend yel-beedã m sẽn na n bool b yĩngã.»

¹⁷Maam a Zeremi deega wamda ne rãama Soaala-Wẽnd nugẽ la m kɩtame tɩ Soaala-Wẽnd sẽn tʋm maam b rãmb nengẽ wã yũ-a.

¹⁸M sɩnga ne Zerizalɛɛm la Zɩɩda tẽnse, n sɩng ne b nanamse, b kug-zĩidba. M kɩtame tɩ b tẽnga na n lebg kãab-wẽns sẽn sãame, n lebg raboogo la we-raoogo, al tɩ sẽn na n yãend-a na n yɛɛs la a fɩɩle la woto n be rũnna.

¹⁹Zɩɩda poore, bu-zẽmba n pʋge: Ezipt tẽng naaba, ne a tãnsoaben-dãmba, a kug-zĩidba, a neba fãa

²⁰Adem biis toɛ-toɛ sẽn kalem taab Us pʋgẽ la Us dĩm dãmba, Filisti tẽn-peelmẽ dĩm dãmba wala Askalõ, Gaza, Ekrõ la Asdod bogre.

²¹Edom, Moab la Amon kamba;

²²Tir dĩm dãmba fãa, Sidõ dĩm dãmba fãa, mogra rʋʋnd dĩm dãmba fãa;

²³Dedã, Tema, Buz, la neb niyns fãa sẽn kõogd-b yɛɛma;

²⁴Arabi dĩm dãmba fãa la sẽn vɩ-b zĩ-pɛɛlẽ;

²⁵Zimri, Elam la Mɛd dĩm dãmb fãa;

²⁶Nug goabg dĩm dãmba, sẽn pẽ-b la sẽn zãr-ba; Ad-y yɩɩ dũni wã ninsaalb fãa n deeg rãama, a yeyn-ye, n yũ. Sẽn na yũ-a, yaoolem soaba na n yɩɩ Sesak dĩma.

²⁷Soaala-Wẽnd wilga maam a Zeremi tɩ m yeel-ba: «Woto la dũni fãa Wẽnde, a Israyɛl Wẽnnaam, kõt yãmba. Yũ-y yã, n wa gãeemnẽ, n wa wʋbdẽ, n wa lʋɩtẽ n ka le tõe n yik ye, n ka le tõe n põs tẽn-kũum ninga sẽn wata wã ye.»

²⁸Ad Soaala-Wẽnd sẽn le paase: «Ned sã n zãgs t'a kõn deeg n yũ, wilg a soab t'a rat t'a pa rat me a na yũ, tɩ yaa dũni fãa Wẽnd noore.

²⁹M yɩta a wãna n ka bas tẽng ning sẽn ya m tẽngã n wa basd yãmb wala y ka maan bũmbu. Ayo, m kõn maan wa y ka tar yell y zug ye; sʋʋg la m na n yiis dũni wã yĩnga. Maam, dũni fãa Soaala, n gomde.»

³⁰Soaala le yeel-m lame: «M datame tɩ f wilg-ba mam sẽn togsa fãa; la ad-f sẽn na n paase: Soaala zĩnda yĩngri n tãse b zĩnda b ro-sõnga pʋga n gome, b zabda ne b soolma, b tara kaasgo wa sẽn fẽt-b bugsuntung biisi.

³¹Bʋʋra sãtame n tat tẽnga sɛtmẽ, n tat ãndũni wã ninsaalba. Yaa bʋʋd la Soaala yik ne bãmba, yaa neba fãa la b bool bʋʋdo. Sẽn beeg-a fãa kõn põs ye. Yaa boto la Soaala gom yã.»

³²Dũni fãa Soaala sɩd yeela woto: «Yel-beeda na n sɛɛ tẽng a ye n long tẽng a to, la sɩlmanda na n yii tẽnga sɛtmẽ.

³³Baraare, ned kõn zĩnd dũni n na n yãb sẽn pa-b Soaala nugẽ ye, ned kõn zĩnd sẽn na n dɩk-ba n mum ye. B na n yɛdga tẽnga wa põosgo.

³⁴Pʋd-y Sũ-sãang yɩɩlle la-n-kaas-y yã, yãmba, dũni soaalba. Lʋɩ-y n bilim-y tẽnga, yãmba, pe-kɩɩmba tɩ yãmb daar n ta tɩ b tat yãmb n dabd rũmsa kʋʋb zĩigẽ. B na n lub-y lame wala wubra pe-ra-nobdse. Taoor dãmba ka na n põs ye.

³⁵Pe-kɩɩmba taoor dãmba ka tõe n tar n leb poorẽ ye.

³⁶M zoe n wʋmda b bʋʋre m wʋmda b tooga waasgo; Soaala-Wẽnd kʋɩɩsa wãbnega zĩisi.

³⁷Soaala sũura bugum yõoga yamda sẽn da sakd gesgã fãa rɩga sɩɩ wa kũum.

³⁸Yaa wa gɩgemd sẽn mi n yi a tʋgrẽ tɩ fãa lebg sɩɩ. Tẽnga fãa lebga zĩ-peelle. La zabra tẽn-kũuma n wa ne rẽnna, Soaala sũura sẽn puugã n wa ne rẽnna.»