Read SEBR SÕNGO, 1998 Zeremi 26 Bible Online

Zeremi 26 - SEBR SÕNGO, 1998 bible

Zeremi 26

¹ [47†] Soaala-Wẽnd goma ne a Zeremi. Yɩɩ Zɩɩda dĩma, a Zoziyas biig a Zoakim sẽn deeg naam paalem. Ad-b sẽn yeel-a:

²«Yaa maam, Naaba-Wẽnde, n kõt-f noore: kẽng n tɩ yals wẽnd dooga sɩmandẽ la wilg neb niyns fãa sẽn yit-b Zɩɩda tẽnsẽ n wat n na n waoog Soaalã, togs-b bũmb ning fãa, m sẽn yet tɩ f togs-ba n da kees bũmb a ye meng ye.

³M saagdame tɩ b na kelge tɩ ned kam fãa bas a wẽnem. M dat n sɩbga b tʋʋm wẽnsã. La b sã n kelge, m na bas n ka sɩbg-b ye.

⁴Woto wã fo na n yeel-b lame: Ad Soaala gomde: ‹Kelg-y m goama, tũ-y m sẽn wilgã;

⁵la reeg-y m bãngdba la m sõgen-kamba, sẽn togsd yãmba wa bũmb sẽn tog kelgre. M tʋm-b-la yãmb nengẽ wakat buud fãa la yãmb pa kelg-b ye.

⁶[48†] Ad-y y sã n pa kelg-ba, m na n wãa wẽnd do-kãnga wala m sẽn wã Silo rẽnna la m na n kɩtame tɩ Zerizalɛɛm yɩ tẽng ning f sẽn wat n dat tɩ f bɛ tẽng fãa wẽneg a soab ne sãoongo.› »

⁷Maan-kʋʋdba, bãngdba, la sẽn da be-b be wã wʋma a Zeremi t'a taasd Wẽnd gomda wẽnd dooga sɩmandẽ.

⁸La a Zeremi sẽn wa n tosg Soaala koees niyns b sẽn da kõ yẽ noor t'a togsã, neba fãa yõk-a lame n yeel-a: «Fo na n kiime!

⁹Yaa bõe yĩnga tɩ fo yet tɩ Soaala n kõ-f noore tɩ f togs tɩ wẽnd do-kãnga na n wãa wala Silo, tɩ tẽn-kãnga me na n wã, la ned kõn leb n zĩnd a pʋgẽ?» Sẽn da be-b wẽnd doogẽ wã wa n gũbga a Zeremi, n zabd-a.

¹⁰Zɩɩda kug-zĩidba sẽn wʋm dẽnna, b yii dĩma zakẽ n wa wẽnd dooga No-paallẽ n sɩng bʋʋdo.

¹¹Woto la maan-kʋʋdba ne bãngdba yeel kug-zĩidba la neba fãa: «Dao kãnga toga ne kũum, t'a goma gom-wẽnse tẽn-kãnga poorẽ, wala yãmb meng sẽn wʋme!»

¹²La a Zeremi leoka kug-zĩidba la neba fãa. A yeelame: «Yaa Soaala meng n tʋm maam tɩ m wa pĩnd n togs yell ninga sẽn na n pak do-kãnga la tẽn-kãnga; yaa bãmb meng noore.

¹³Sẽn ya woto wã marsã, bɩ y maneg n dɩk soy-sõma, maan-y tʋʋm sõma, kelg-y Soaala sẽn togse. Woto b kõn bas yel-beedã b sẽn togsã t'a lʋɩ y zug ye.

¹⁴Sã ya maam, mam be yãmb nugẽ; bɩ y maan wala yãmb sẽn tẽed tɩ m toga ne.

¹⁵La bɩ y pĩnd n bãng neere tɩ yãmb sã n kʋ maan, yaa ned sẽn ka tar a toorẽ yelle la y kʋ yã la y na rɩ m zɩɩma taale, yãmb ne y tẽnga, tɩ bala, yaa Soaala meng n tʋm maam tɩ m wa togs-y koees niyns fãa mam sẽn togs yãmba, tɩ yãmb meng tʋbr wʋma.»

¹⁶B sẽn wʋm woto, nanamsa la neba fãa gilli yeela maan-kʋʋdba la bãngdba: «Nin-kãnga ka tog ne kũum ye, t'a sẽn gom ne tõndã, yaa Soaala, tõnd Wẽnnaama yʋʋr yĩnga la a gom yã!»

¹⁷La tẽnga nin-kẽems kẽere yikame n yeel sẽn tigim-b be wã:

¹⁸[49†] «Zɩɩda dĩma a Ezekiyas wakato, bãngd a ye n zĩnd Moresɛt n boond t'a Mise. A Mise waa n yeela Zɩɩda nebã: ‹Dũni fãa Wẽnda tɩ m wilg-y woto: Siõ na n lebga pʋʋgo tɩ b kooda, Zerizalɛɛm na n lebga raboogo, la wẽnd dooga tãnga na n wuka ne tuudu.›

¹⁹D sok n gese, yãmb yãeeme tɩ Zɩɩda dĩm a Ezekiyas, la Zɩɩda neba kʋ-la a Mise bi? Ayoo! B sulga b meng Soaala taoore la b kos-b lame tɩ b maan sugri. La sɩda Soaala ka bas tɩ b sẽn gom yel-beed ninga lʋɩ b zug ye. Tõnd sã n kʋ a Zeremi rũnna, d kõn dogl yell kãseng d zugu?»

²⁰A Zeremi wakatẽ me bãngd a ye n zĩndi n da taasd Soaala koeese. Yaa a Uriya, a Semaya biiga, Kiriyat-Yeyarim tẽng neda. Yẽ soab me da goma wa a Zeremi, n pĩnd n togs yell ninga sẽn na n pak Zerizalɛɛm la Zɩɩda tẽnga.

²¹Dĩm a Zoakim ne a zaka gũudba la a kug-zĩidba sẽn wʋm a Uriya goama, b yikame tɩ b na n kʋ-a. A Uriya sẽn wʋm woto, dabeem yõk-a lame, t'a zoe n kẽng Ezipt tẽnga.

²²La naab a Zoakim tʋma Ezipt tẽnga, a Akbor biiga a Elnatã, n paas neb a taaba.

²³B sẽn ta be, b yãee a Uriya n tall-a n wa kɩs dĩm a Zoakim. Dĩma kõo noore tɩ b kʋ-a ne sʋʋga n dɩk a n tɩ lob tẽnga rãmb yaadẽ.

²⁴Sã n yaa a Zeremi, Wẽnd maag a Ayikam, a Safã biiga, tɩ yẽ põse; a Ayikam maasem yĩnga, neba ka paam n kʋ-a ye.