Read SEBR SÕNGO, 1998 Zeremi 30 Bible Online

Zeremi 30 - SEBR SÕNGO, 1998 bible

Zeremi 30

¹Soaala-Wẽnd togsa a Zeremi woto:

²«Yaa maam, a Israyɛl Wẽnnaam, n gomd ne foom marsã. Gʋls f meng yĩnga, sebr zugu, goam niyns fãa mam sẽn togs foomã.

³Wakat n wate tɩ m neba yelle, a Israyɛl la a Zɩɩda yelle, na n teeme. Mam na n leb n tall-b lame n wa tẽng ninga mam sẽn da kõ b ba rãmba la b na n le soog-a lame. Dẽ yaa Soaala gomde.»

⁴Ad koɛɛg ning Soaala-Wẽnd sẽn wilg a Zeremi t'a taas a Israyɛl la a Zɩɩda me.

⁵Soaala-Wẽnd gomda woto: «Pɛlen-yɩk kɛlenga n sãte, yaa bʋʋr sẽn paasd n dabda.

⁶Sok-y n gese rao sã n zoe n dogame. Bõe marsã tɩ m ne rapa fãa sẽn teeg-b sɛɛga wa pag sẽn kũmd dogem, tɩ b sobd n kiidẽ, tɩ b neng yeege?

⁷Kato! Yaa da kãsenga! Daar sẽn ka wẽnd a taaba! Yaa yɩɩr wakato, a Zakoob yĩnga, la a n na põsame.»

⁸Daara sã n wa ta, dũni fãa Wẽnd n gomde, m na n kao raoog ning sẽn palg b yubla la m na kãs b wĩya. B kõn leb n yɩ sãamb yems ye.

⁹Yaa maam b Wẽnnaam yam la b na n maane. M na n lebsa a Daviid a naama zaoorẽ la b na n sak-a-la wa b rĩma.

¹⁰Sã n ya foo, Israyɛl, m neda, da zoe rabeem ye, Yaa Soaala n gomde, foom a Zakoob, da maan dabeem ye tɩ bala m watame n na n fãag-fo, m wat n na n yiis-f-la tẽn-zãorgẽ, m wat n na n yiisa f kamba, b yembd tẽngẽ. Israyɛl, f na n le paama laafi, ned kõn le wa sãam f gãag ye.

¹¹ [55†] M bee ne foo n na n fãag-fo Soaalã n yeele. M datame tɩ d yɛla yaa n baase, maam ne bu-zẽmbã, mam sẽn sẽeg foo b rãmb tẽngẽ. Sã n ya foo, m ka bas-f saal ye; M waa n kong n sɩbg-f lame wala sẽn segde, m da ka tõe n bas f saal woto ye.

¹²N-yẽe! Soaala-Wẽnd gomda woto: Fo sãmpogrã kẽe pãafo, fo nodrã ka bõn-maagdg ye.

¹³Ned ka be sẽn sõngd foo ye; nodr fãa mii n paamda tɩpgo; sã n ya foom, tɩɩm ka ye.

¹⁴Fo roell fãa, yĩma f yelle; b ka leb n baood fo zĩig ye. Mam sɩbga foom wala m da yaa f bɛyã m sɩd yɩɩ toaag ne foo.

¹⁵Bõe yĩnga la f kũmd f sãmpogr yĩnga, n kũmd f tooga sẽn ka woogda yĩnga? Ad-m sã n maan-f woto, yaa f beegra sẽn yɩ kãsenga yĩnga, yaa f kongra sõor sẽn labsa yĩnga.

¹⁶La bãng tɩ sẽn da namsd-b fooma, na n paama namsgo fo bɛɛba nengẽ. Sẽn kis-b fooma na n looga yembdo; sẽn yeesd-b fo futã, b na n yeesa bãmb me futu; sẽn zɛɛd-b fooma, b na n zɛɛ bãmb me. Bɛɛba fãa na n looga yembdo.

¹⁷B boonda foom tɩ nin-faoogo, b boonda foo, Siõ tɩ ned ba a ye toog sẽn ka be ne a soaba; kelge, m na n sãooga f sãmpogrã. Soaala-Wẽnd n gome!

¹⁸Ad Soaala-Wẽnd koɛɛg a to: «Israyɛl buudu, m na n teema y vɩɩm, m na n zoe-la y nimbãanega; tẽnsa na n le maneg n meeme la na n yɩɩ rabooda zugu. Ro-neeba na n le me b pĩnd zĩisẽ.

¹⁹Neb na n zĩnda yɩng n wʋm yɩɩla, n wʋm sũ-noog yɩɩla; la yãmba, Zakoob kamba, ad-y y sõora ka na n boog ye. M na n paasa y neba sõore. B kõn saag n le ges yãmb kegr ye, m na n pids-y-la ne waoogr kũuni.

²⁰La yãmba, Zakoob kamba, y na n le maana y tig-raasã m nifẽ la m na zẽk m nug ne sẽn wẽoogd-b yãmba.

²¹Yãmb nin-yende n na n lebg yãmb naaba; N-ye, yãmb nin-yend n na n yɩ-y naaba! M na n kõ-a-la sore t'a pẽneg maam, tɩ ned ba a ye ka na le saag n koos a yõor ye, n sak n kolg maam tɩ m ka bool-a ye, yaa Soaala-Wẽnd n togs rẽnna.

²²Woto y na n leb n yɩɩ mam buudu, tɩ mam me lebg yãmb Wẽnnaam.»

²³Ad-y sɩlmande n yiki. Yaa Soaala sũ-puuri. Sob-raoogo n buiid nin-wẽnsã.

²⁴Soaala-Wẽnd sũura ka na n sigi tɩ b ka pids b sẽn da yalsa ye. Dẽ na waa n lebg vẽeneg y yĩnga, daar a ye!