Read SEBR SÕNGO, 1998 Zeremi 31 Bible Online

Zeremi 31 - SEBR SÕNGO, 1998 bible

Zeremi 31

¹Wakata sã n wa ta, Soaala n kãabd noogo, mam na n yɩ-la a Israyɛl buud fãa Wẽnde, la a Israyɛl na n yɩɩ mam buudu.

²Woto la Soaala gomda: Buud ninga sẽn põs-a sʋʋga a pa-weera tẽnsẽ, yẽ la m pʋgd ne nonglem, la woto me la a Israyɛl le wɩɩd ne a bi-bɩɩlmẽ pãnga.

³Ad Soaala sẽn zĩnd yɩɩg n leok-ma: M ket n nong-f-la ne m pĩnd nonglem, m ket n nong-f lane n ka teemnẽ ye.

⁴Israyɛl, m pʋg-nongre f na n le yik n yalsa f nao zutu, f na le tõog n dɩk f gãngão-gilga f me lagem sẽn saood-b ne sũ-noogã.

⁵Fo na n le sela bugsuntung Samari tãmsã zutu; bugsuntunda rãmb na yaa n dɩ b tʋʋmd yõodo.

⁶Sɩda, daar n wate, tɩ gũudba na n tãs Efrayim tãnga zugu: «D dʋ Siõ tãnga zugu, d dʋ n paam Soaala, tõnd Wẽnnaam.»

⁷Tãs-y sũ-noog yɩɩlle a Israyɛl yĩnga. D wek bu-zẽmba tʋba ne d kaasgo, zodg-y y pẽgr yɩɩla, yeel-y: «Soaala, fãag-y y buudu, fãag-y Israyɛl bu-kellã.» Sɩda yaa woto la Soaala gomda:

⁸«M na tɩ yiis-b-la nug goabg n wa, m na n yiis-b-la tẽn zãoorgẽ n wa. B fãa gill bee ka, zoeens la wobse, tʋtr-pʋse la kom-peels ma rãmba. M buuda lɛɛg n wata zãnga.

⁹B lɛɛg n wata ne nintãm tɩ mam yãagd-b la m belgd-b. M tar-b lame n teesd koom zĩigẽ, b tũuda so naana, bɛoog ka be n na n lub-b ye. M yaa ba a Israyɛl yĩnga la a Efrayim la m bi-kẽenga.»

¹⁰Yãmba, bu-zẽmba, kelg-y Soaala koɛɛga. Taas-y b koɛɛga tẽn-zãorgẽ dãmba, al tẽnsa sẽn puk koom sʋka; yeel-y yã: «Soaala ra sẽega a Israyɛl la bãmb n lɛɛg n tigimd-a marsã la b get a yelle, wa rũm-kɩɩm sẽn get a rũmsi.»

¹¹Soaala fãaga a Israyɛl nebã, b fãag-b-la bɛ sẽn tar pãng nugẽ.

¹²B na n lɛɛg n waame ne sũ-noogo, Siõ tãnga zugu. B neng na n pɩla ne sũ-noogo tɩ yaa kũun ka tɛk la b na n paame: B na n paama alkam, rã-paalga la ka-paalga; n paas piisi, bʋʋse, niisi. B na n kẽe tẽns sẽn wẽnd zẽedo, zẽed sẽn gãe ne koom. Beenẽ, fãagr saagr ka le ya toog ye.

¹³Wakat kãnga, kom-pugli na n sao ne sũ-noogo; na n yɩɩ boto me ne kom-bɩɩba la nin-kẽemse. Sɩda, Soaala n gomde, b sũ-beeda na n tedgame n lebg sũ-noogo. M na n maasa b sũuri n menes b sũ-sãangã, m na n pids-b-la ne sũ-noogo.

¹⁴M na n tɩgsa maan-kʋʋdba ne rũm-kaam, m na n kõ-la m buudã bũmb ning fãa sẽn ya sõmbo.

¹⁵ [56†] Woto la Soaala le gomda: Kelg-y tɩ koɛɛg n yit Rama, yãb toog n yit be, yaa a Rasɛl n yãbd a kamba, la a tõt belgre, tɩ b ka ket ye.

¹⁶La Soaala yeta a Rasɛl woto: «Sigs f sũuri, yẽes f nintãm, f naong na n paama rolbo. Yaa maam n yete, maam, Naaba-Wẽnde. F kamba na yi-la bɛɛba tẽngẽ n le wa.

¹⁷Beo-sõng na n le vẽeg-f lame. Yaa Soaala n gomde. F kamba, na n lebg n waa b ba yiri.»

¹⁸M wʋma a Efrayim guglengu, a yetame: «Soaala, yãmb sɩbga tõnd al wʋsgo, y noma tõnd wa nag-bi-tõtre. Sõng-y tɩ d le lɛɛg n kẽ yãmba, n wa kẽ yãmb ne d sũur fãa, tɩ yaa yãmb bala la tõnd Wẽnde.

¹⁹N-ye! Tõnd da basa yãmba, la d tuubame marsã. D deega d kongre la d tooda d yãoogo; d vɩɩma yãnd tar-d lame, a yãnda tar-d-la wʋsgo, d tẽra wẽng ning d sẽn tʋme d sẽn waa n ya kom-bɩɩba.»

²⁰A Efrayim ya m bi-nongre. Yaa Soaala n gomde, m yama kẽe-a lame. A sã n beeg n tog ne sɩbgre, m baas n kũmd-a lame m sẽn nong-a wʋsg yĩnga, m ka tõe n ka zoe a nimbãaneg ye.

²¹Ning makre f sora zugu ges f sẽn dɩk sor ningã. Israyɛl bi-pugla lɛɛg n wa, lɛɛg n wa f tẽnsẽ!

²²F lebgra na n le tadgame n ta da-bʋre, bi-tõtre, ra-bʋg la f yãk yã? Mik Soaala le waa ne bõn-paal tẽng zugu: marsã yaa pagã n na n belma a sɩda.

²³Dũni fãa Soaala, a Israyɛl Wẽnda, gomd la woto. M sã n le wa tedg Zɩɩda ne a tẽnsa nenga yaa woto la b na n le yeele: «Bɩ Soaala ning-f barka, Siõ tãn-sõngo, fãagr doogo!»

²⁴Wakat kãnga sẽn be-b pʋtẽ, sẽn kẽed-b Zɩɩda tẽnsã na n sooga tẽnga gilli, koaadba, rũm-kɩɩmba ne b rũmsi.

²⁵Pãng sẽn sɛɛ a soaba na n paamame tɩ mabge, sẽn yãbd-a kom, m na n dɩlg-a lame.

²⁶La neba na n wa gomda woto: «M sẽn gũs n neke, m pa yãend bũmb sẽn paoog ye, m yãeeme tɩ m gõeem yɩ noogo.»

²⁷Soaala gomde: daar n wate tɩ m na n pids Israyɛl la Zɩɩda tẽns ne neba la rũmsi wala b sẽn pids pʋt ne koodo.

²⁸Sẽn ta marsã, m da yika ne bãmba n võod la m tusd n lubdẽ, n vigsdẽ, la m sãamnẽ, n maandẽ wẽnga. Dũnna tɛka m na n wẽneg n teesa yãmba, n modg ne maneg n me la maneg n sele. Soaala n gomde.

²⁹ [57†] Wakat kãnga, b pa na n le yeel abada: «Saam-dãmbã n wãb sib kãse tɩ kamb yẽn deeg n zãabe.»

³⁰Ned sã n wãb sib kãse, yaa yẽ soab yẽna n na n zãabe; ned kam yel-wẽnd n kʋʋd-a.

³¹ [58†] Soaala n gomde: «Daar n wate, tɩ m na n yõg zood paalga ne Israyɛl roogo, ne Zɩɩda roogo.

³²A kõn yɩ wa zood ninga m sẽn yõg ne b yaab rãmba, m sẽn waa n gãd bãmb nug daare n yiis-b Ezipt tẽnga ye. Zoodã, bãmb b toore n sãam-a la mam yaa bãmb zu-soaba.» Soaala-Wẽnd n yeele.

³³[59†] Soaalã n gomde: «Zood ninga m sẽn na n yõg ne Israyɛl roogo wakat kãnga la woto. M na n ninga m noorã neba sũurẽ, m na n gʋls-a-la b sũurẽ. Rẽ wẽnde m na n lebga b Wẽnde tɩ bãmb yɩ mam neba.

³⁴[60†] Bãmb sʋka ned kõn le yeel a tũud-n-taaga, a saam-biiga t'a wa t'a wilg-a maam, Naaba-Wẽnd, sẽn yaa a soaba, tɩ b fãa na n bãng-m lame, nin-bila n wat nin-kãsenga. Wakat kãng tɩ m basa fãa taale, m ka le tẽr b beegra ye.»

³⁵Ad-y ned ninga sẽn yagend-a wĩndga a zĩigẽ t'a kõt raara vẽenema, sẽn kõt-a kiuug la ãdsa noore tɩ b tʋʋs vẽenem yʋngo, sẽn dãmbd-a mogra t'a ningd bʋʋre, yaa dũni fãa Wẽnde, yaa maam. La woto la m yeta:

³⁶«M sã n tõog, ba raar a ye bala, n yeel tɩ m sãama m noorã, tɩ noor ning kiuuga la ãdsa sẽn deegdã lebga no-kʋdgo, lebga no-faoogo, Soaalã n gomde, wakat kãng marsã la m me na n tõog n yeele t'a Israyɛl ka le ya m buud ye.

³⁷Ned sã n tõe n yeele tɩ saaga ne tẽnga sẽn zãr taaba yaa bũmb sẽn tõe n mage, n yeel t'a mii tẽnga sẽn sudi n ta al zĩig ninga, mam me na yeel marsã tɩ m tõeeme tɩ maam ne a Israyɛl zooda sãame. M na yeel tɩ m tõe n zãaga ne a Israyɛl a beegra yĩnga.» Yɩɩ woto la Soaala gom yã.

³⁸Daar n wate, Soaala gomde, la daara zoe n kolgame, tɩ b na n le me Zerizalɛɛm lalsã, mam waoogr yĩnga. Na n sɩnga a Ananeyɛl gaosgã n ta b sẽn boond tɩ Gõdr-noorã.

³⁹B na n sõoga tẽnga toaag paalle; na n deng n teesa nin-taoore, Gareb tãn-bilã, n gõdg n tees Goa.

⁴⁰Vɩʋʋg ning b sẽn na n dɩk n kõ maama la woto: bãg-faag ning b sẽn mumd kũuma la b lobd maanda tompɛglma, vɩʋʋg ning sẽn yegd Sedrõ kʋɩl-bɛɛgã n tat yaanga, wiida noora gõdrã. Bũmb kõn le tõog n võog be, bũmb kõn le tõog n lub be ye.