Read SEBR SÕNGO, 1998 Zeremi 34 Bible Online

Zeremi 34 - SEBR SÕNGO, 1998 bible

Zeremi 34

¹ [69†] Babilon dĩm, a Nabikodonozor, da taka zabre ne Zerizalɛɛm la Zɩɩda tẽnsã. A ra waa ne a tãb-biisã la a sẽn da so tẽns niynsa fãa tãb-biisi. Wakat kãng me la Soaala taas a Zeremi koees kãensã:

²«Maam, a Israyɛl Wẽnnaam, maam n kot-f tɩ f kẽng n tɩ yãend a Sedesiyas, Zɩɩda dĩma la f yeel-a: Kelg Soaala koɛɛga: ‹M na n dɩka tẽn-kãnga n sagl Babilon dĩma nugẽ la a na n sãam-a-la ne bugum.

³La foom, Zeremi, fo kõn põs ye; b na n yõka foom n n kɩs dĩma. F na tõog n ges Babilon naaba ne f nini; f na n leok a sokre, f meng f toore, n yaool n dɩk Babilon sore.

⁴Yeel a Sedesiyas, Zɩɩda rĩma, t'a sã n maan wa m sẽn yeel-a, a na n põsa kũ-toogo. Yaa maam, Naaba-Wẽnde, n togsd-a woto.

⁵A kũuma ka na n yɩ kũ-toog ye, a na looga ne bãane. B na n mum-a-la wala a ba rãmba, wa dĩm dãmba sẽn deng-b yẽnda; b na wisa tɩdar a yĩnga la kʋʋr yɩɩll kãnga la b na n pʋd a yĩnga: Kato, dĩma konga pãnga! Yaa maam, Naaba-Wẽnd n togsd rẽnna.› »

⁶Woto la koees niyns bãngd a Zeremi sẽn taas Zɩɩda rĩm a Sedesiyas. Yɩɩ Zerizalɛɛm.

⁷Rẽ tɩ Babilon dĩma tãb-biis ra wẽeda Zerizalɛɛm la tãnsoben-tẽnsa sẽn be Zɩɩda n ket n nan pa lʋɩ, wala Lakis la Azeka.

⁸Soaala gomd le taa a Zeremi, rẽ tɩ dĩm a Sedesiyas kaoola ne Zerizalɛɛm na-biisa fãa, t'a na n basa yemsã.

⁹Ned kam fãa da tog n basa a yemse sẽn ya Ebre-buudu, raoa bɩ paga, ned ba a ye da ka tog n le tall Ebre buud wa yamb ye, t'a yaa a saam-biiga.

¹⁰Na-biisã ne neba fãa sakame n bas b yemse tɩ b soog b mense, b yaa raoa bɩ paga, b ka na n le kẽes-b yembd ye.

¹¹La rẽ poore b teka yam n le yõg b yemsã, b sẽn da base, la b le kẽes-b-la yembdo, rapã ne pagbã.

¹²Rẽ la Soaala taas a Zeremi gomd kãnga:

¹³«Woto la Soaala, a Israyɛl Wẽnda, gomda: ‹Mam yõga zoodo ne y yaab rãmba, mam sẽn wa n yiis-b Ezipt, b yembd-tẽngẽ, m yeel-b lame:

¹⁴[70†] Yʋʋmd a yopoe soaba poore, fo na n basa f sẽn da yamb ning fãa t'a soog a menga. Yʋʋm a yoobe, a na n yɩɩ f yãmba, rẽ poore fo na n lebs-a-la a yiri ne a burkĩndlem. Y ba rãmba ka kelg mam gomda ye.

¹⁵Sã n ya yãmba, yãmb da wɩsga y meng y toore n bas y yemsã tɩ m da pẽgd yã. Y ra tol n wẽena, mam taoore, m waoogra roogẽ ka, tɩ na n yɩɩ boto.

¹⁶La y teka yam, n paoog maam, n le reeg y yemse la yãmb n yaool n da bas-ba, pagb la rapa, tɩ b kẽng b sẽn datẽ.› »

¹⁷Woto wã, ad Soaala-Wẽnd koɛɛga: «Ned kam fãa tog n basẽ-la a yamba t'a soog a menga. F yamba yaa f saam-biiga, a yaa f to. Yãmb pa reeg m noor ye. Yaa rẽ yĩnga la maam, y Wẽndã, na n bas sʋʋga, bã-longdem la kom tɩ bãmb me soog b menga n tʋm b soog-m-meng tʋʋma ne yãmba. Bãng-y tɩ ãndũni rãmba fãa sẽn na n yãend-b yãmba, b na yɛɛs la b pĩ b noore.

¹⁸M na n sɩbga neb niyns fãa sẽn ka pids-b kãabgã m sẽn yet tɩ b kãabã. B yaool n da kaoolame tɩ b yemsa na n sooga b mense. B kaoola rẽ mam taoore, maoonga wakato, b sẽn waa n pasg nag-bila boaag a yi n dɩgl tɩ b tũ sʋk n loogã.

¹⁹M sẽn na n dɩk b rãmba n kɩs b bɛɛba la woto: Zɩɩda na-biisi n paas Zerizalɛɛm dãmba, maan-kʋʋdba la tẽnga neb niyns sẽn tũ-b nag-bila boaag a yiiba sʋkã n loogã.

²⁰Mam na n bas-b lame tɩ b lʋɩ b bɛɛba nusẽ, sẽn dat n yãk b yõora nusẽ. B rɩgre na n yɩɩ yĩngri luiili la tẽng rũms rɩɩbo.

²¹Zɩɩda dĩma, a Sedesiyas menga, m na n dɩka yẽnda ne a kug-zĩidba, n bas b bɛɛba sẽn dat b kũuma nusẽ. M na n bas-b-la Babilon dĩma nugẽ. Babilon tãb-biisa yaool n n zoe n yikame menga n tar n lebd poorẽ, n zãagd ne Zerizalɛɛm b sẽn da gũbgã.

²²Ad-y m na bool-b tɩ b lɛɛg n wa tẽn-kãnga, n zabe, n lub-a, n yõog-a bugum. La mam na n tedga Zɩɩda tẽnsã tɩ b lebg we-raoog sẽn kẽesd rabeem. Maam, Naaba-Wẽnd, n gome.»