Read SEBR SÕNGO, 1998 Zeremi 35 Bible Online

Zeremi 35 - SEBR SÕNGO, 1998 bible

Zeremi 35

¹ [71†] Soaala goma ne a Zeremi. Yɩ-la a Zoziyas biiga, a Zoakim sẽn waa n dɩt naam Zɩɩda tẽn-peelmẽ. Ad-b sẽn yeele:

²«Kẽng n tɩ yãend a Rekab yagense n peeg-ba n kẽ wẽnd dooga zãong a ye pʋga la kõ-b rãam be tɩ b yũ.»

³Rẽ la a Zeremi tɩ peeg a Yazaniya sẽn ya a Irmeya biiga la a Abasiniya yagenga. A le peega a Yazaniya saam-biisi n paas a kom-dibli la Rekabitsa gilli.

⁴A kẽes-b-la wẽnd dooga ro-bil a ye pʋga, a Anan karen-biisa roogẽ. Nin-sõng a Anan yaa a Igdaliya biiga. Rooga ra pẽe ne gũudba rẽnna, a ra zao a Maaseya rẽnna zugu la a Maaseya yaa a Salum biiga, maan-kʋʋd ninga sẽn da gũud wẽnd dooga noorã.

⁵A Zeremi rɩgla Rekabitsa taoore yʋy sẽn pid ne rãam n paas koteese n yaool n yeel-ba: «Yũ-y rãam bilfu.»

⁶Tɩ b leoke: Tõnd ka yũud rãam ye, tɩ tõnd yaaba a Zonadab, a Rekab biiga, kõo tõnd noor kãnga: «Y kõn yũ rãam abada, yãmb bɩ y biiga.

⁷Woto me y ka tog n me roogo, bɩ n ko, bɩ n sel bugsuntungu bɩ n tall pʋ-wɛɛg ye; la na n yɩɩ sẽgd-rot pʋsẽ la y na n vɩɩnde y vɩɩma zãnga, n paam n kaoos tẽng zugu, zĩig ninga y sẽn ya sãamba.»

⁸Tõnd deega d yaaba a Rekab biiga, a Zonadab, noor neere, n ka yũud dãam abada, tõnd ne d pagba, d kom-dibli la d kom-pugli,

⁹n ka met roogo, n ka tar bugsuntund bɩ pʋʋg sẽn na n ko ye,

¹⁰n vɩ sẽgd rotẽ. Tõnd reega fasi la d tũu noor ninga d yaaba a Zonadab sẽn kõ tõndo.

¹¹Yaa a Nabikodonozor, Babilon dĩma, sẽn wa n tak zabr ka, la d yeel d mense: Aya! D kẽ Zerizalɛɛm n põs Kalde la Aram tãb-biisi! Rũnda wã, d vɩɩ Zerizalɛɛm pʋgẽ.

¹²Rẽ la Soaala gom ne a Zeremi woto:

¹³«Gom ne Zɩɩda, ne Zerizalɛɛm kẽedba la yeel-ba: Ad dũni fãa Soaala, a Israyɛl Wẽnda koɛɛga: yãmb da tog n sakẽ-la m saglgo la y kelgẽ m goama. Yaa Soaala n gomde.

¹⁴A Rekab biig, a Zonadab, da kõ-la a kamba noore tɩ b ra yũ rãam ye. A kamba tũ-la a noore wa bũmb sẽn toge la al n ta rũnna b ka yũ ye, n deeg b yaab noore. La sã n ya maam, yãmb Soaala, m pa vʋʋs ne y saglgo la y pa kelg m koɛɛg ye.

¹⁵M tʋm-y-la naoor ka tɛka bãngdba, m sõgen-kamba tɩ b yeel yã: bas-y y so-yoodã, vɩɩnd-y wala sẽn segde, zãag-y y mens ne wẽn-naandsa pʋgbo la b waoogre, tɩ sã n ya woto y na tõog n vɩɩnd tẽn-kãnga pʋgẽ, tẽng ning m sẽn kõ y yaab rãmba ne b yagense. La yãmb pa maan gũusg ye, yãmb pa kelg ye.

¹⁶Sã n yaa a Rekab biiga, a Zonadab, yagensã, bãmb reega b yaab noore, la yãmba, Zɩɩda rãmba y ka kelg mam goam ye.»

¹⁷A Zeremi paasame: «Ad-y yaa rẽ yĩnga la dũni fãa Soaala la a Israyɛl Wẽnde, gomd woto: Mam na n taka yel-beed ninga m sẽn kãabã n sik Zɩɩda la Zerizalɛɛm neba fãa gill zugu: m goma ne bãmba la b pa kelg maan ye, m bool-b lame la b tõdga sakre.»

¹⁸A Zeremi yaoola me marsã n yeel a Rekab yagensã: «Woto la dũni fãa Wẽnde, a Israyɛl Wẽnnaama gomda: Yãmb sẽn sak y yaab a Zonadab noore, n tũ a sẽn wilga fãa neere,

¹⁹woto wã a Zonadab kõn kong yageng a buudẽ sẽn na n tʋm maam, Naaba-Wẽnd, tʋʋmd ye. Dũni fãa Soaal la Israyɛl Wẽndã n gome.»