Read SEBR SÕNGO, 1998 Zeremi 37 Bible Online

Zeremi 37 - SEBR SÕNGO, 1998 bible

Zeremi 37

¹ [74†] A Zoziyas biiga, a Sedesiyas n lebg dĩma, a Zoakim biig a Koniya zĩigẽ. Yaa a Nabikodonozor, Babilon dĩma, n da kõ-a Zɩɩda tẽnga naam.

²La yẽ menga, la a tãnsoaben-dãmba, n paas Zɩɩda rãmba, ka kelg Soaala goama bãngda a Zeremi sẽn da togsd bãmba ye.

³Dĩm a Sedesiyas tʋma a Yukal, a Selemiya biiga, la maan-kʋʋd a Sefaniya, a Maaseya biiga, bãngd a Zeremi nengẽ. A tʋm-b lame tɩ b tɩ yeel-a: «D kotame tɩ f pʋʋs Soaala, tõnd Wẽnnaam, d yĩnga.»

⁴A Zeremi da bee neba sʋka n kẽnd la a watẽ. Dẽ tɩ b da nan ka kẽes-a bi-bees roogẽ ye.

⁵Wẽnd kãng la Ezipt dĩma tãb-biis yii Ezipt. Kalde rãmba da gũbga Zerizalɛɛm la b sẽn wʋm kibarã, b yikame n bas tẽngã. B zãaga bilfu.

⁶La Soaala goma ne a Zeremi n yeel-a t'a leok a Sedesiyas sẽn tʋm-b rãmba woto:

⁷Ad Soaala, a Israyɛl Wẽnnaama koɛɛga: «Tɩ yeel-y Zɩɩda dĩma sẽn tʋm yãmb tɩ y wa sok maama; tɩ leok yã tɩ Ezipt naaba tãb-biisa sẽn da wat y sõngrã lɛɛg n lebda b tẽngẽ.

⁸Kalde rãmba na n le waame n zab ne tẽn-kãnga, n tõog-a, n ning-a bugum.

⁹Maam, Naaba-Wẽnde, n yet-y woto: Da belg-y y menga, n tẽed tɩ Kalde rãmba loog n basa tẽnga zãng-zãng ye, tɩ bala b ka na n loog ye.

¹⁰Ad-y y sã n wa tẽed tɩ y tõog n diga Kalde rãmba sẽn zabd ne yãmbã, n tẽed tɩ sẽn kell-bã yaa neb sẽn gãe b sẽgdẽ ne sãmpoaga, bãng-y tɩ bãmb n na n yik n wa sãam tẽn-kãnga n yõog-a bugum. Ba yãmb sã n da tõog n digẽ-la Kalde rãmba tãb-biisi, sẽn zabd ne yãmbã, ba sã n da keesẽ-la sẽn paam-b sãmpoag n be b rotẽ, b na mao n yik n yõog tẽnga bugum.»

¹¹Wakat ninga Kalde rãmba tãb-biisi sẽn wa n zãag bilf ne Zerizalɛɛm, Ezipt dĩma tãb-biisa rabeem yĩnga,

¹²a Zeremi tʋlgame n yi Zerizalɛɛm n kẽng a Bẽnzame tẽngẽ n tɩ naag tẽnga rãmba tɩ b welg sagsa pʋɩɩb no-koɛɛma.

¹³A sẽn waa n tũud a Bẽnzame dignoor n na n yi la ned a yembre, gũudba naaba, sẽn gãd-a. Yɩ-la a Iriya, a Selemiya biiga la a Ananiya yagenga. A Iriya sẽn gãd a Zeremi, a yeel-a lame: «Fo zoet n na n tɩ koosa tõnd ne Babilon dãmba!»

¹⁴T'a Zeremi leoke: «Yaa zirẽ, mam ka kẽed Kalde rãmb ye!» A Iriya pa yaas n kelg a Zeremi ye; a yõk-a lame n tɩ kɩs a kãsem-dãmba.

¹⁵B sẽn yãee a Zeremi, b sũur puuga ne-a wʋsgo, tɩ b pãb-a la b tɩ kẽes-a bi-bees roogẽ, sɛb-gʋlsda a Zonatã yiri sẽn da lebg bi-bees roogo.

¹⁶Yɩɩ ro-munumdẽ la b ning a Zeremi. A Zeremi waa n kaoosa be,

¹⁷tɩ dĩm a Sedesiyas wa tʋm ned tɩ b bool-a t'a wa, t'a soos n sok-a, a na-zakẽ. A sẽn taa, dĩma sok-a-la woto: «Fo tara Soaala-Wẽnd koɛɛg m yĩng bɩ?» T'a Zeremi leoke tɩ koɛɛg kõn kong ye: «Fo na n lʋɩɩ Babilon naab nugẽ!»

¹⁸Dẽ poore, a Zeremi yeela a Sedesiyas: «Bõe beegre la mam beeg yãmba, yãmb bɩ y na-yir dãmba, bɩ tẽnga rãmba, tɩ yãmb sui maam doogo?

¹⁹Yãmb bãngdba, sẽn da yet-b yãmb tɩ Babilon dĩma kõn wa n zab ne yãmb la ne tẽn-kãnga wã bee yɛ?»

²⁰A Zeremi yõka sɛɛg woto: «M naaba, m kotame tɩ y sak n kelge m kosgo: Da lebs-y maam sɛb-gʋlsda a Zonatã nengẽ, tɩ m na n kiime.»

²¹Dẽ la dĩm a Sedesiyas kõ noore tɩ b ning a Zeremi gũudba zakẽ la b kõt-a bur gilga; bura ra koosda Bur-wẽedba sora zugu. Bura sẽn da tõe n paam tẽnga pʋgẽ daar fãa, a Zeremi me ra paamda a rẽnna. Tũu boto t'a Zeremi kell n pa gũudba zakẽ.