Read SEBR SÕNGO, 1998 Zeremi 40 Bible Online

Zeremi 40 - SEBR SÕNGO, 1998 bible

Zeremi 40

¹Ad Soaala sẽn taas a Zeremi koɛɛg ninga gũudba naab a Nebuzaradã sẽn waa n bas-a t'a yi Rama. B ra sẽba a Zeremi ne bãeense n naag Zerizalɛɛm la Zɩɩda neb niyns sẽn da na n loog yembd Babilon. Gũudba naab tɩ bak-a-la toore.

²A sẽn bool-a n yi kɛɛnga, a yeel-a lame: «Yaa yel-beed a woto la Wẽnnaam, f Soaala, da kãab tẽn-kãngã,

³la b sɩd waa ne-a. Soaala maana waa b sẽn da wilgi, tɩ yãmb ka kelg b goama ye. Dẽ n so tɩ yell kãnga paam yãmba.

⁴Marsã gese, dũnna menga, mam na n looda bãeensã sẽn sog fo nusã. Fo sã n dat n yãag maam Babilon, bɩ f wa tɩ d kẽnge tɩ bũmb kõn maan-f ye. La sã n ka ta f yam bɩ f base. Gese, tẽnga fãa dɩga fo taoore; zĩig ninga fãa fo sẽn dat n kẽnge, sã n noom foom, bɩ f kẽnge.»

⁵La a Zeremi sẽn pa leokd tɩ bũmbã, a yeel-a lame: «Fo tõe n kẽnga a Ayikam biiga, la a Safã yagenga a Gedaliya nengẽ tɩ yẽ la Babilon dĩma kõ tõogo t'a ges Zɩɩda tẽnsã. Fo tõe n zĩnda tẽnga pʋgẽ ne yẽnda, wala f sẽn tõe kẽng fo sẽn datẽ fãa.» Tãnsoaba kõ-a-la sor zug rɩɩbo n paas kũuni, n bas-a t'a looge.

⁶A Zeremi kong n dɩka Mispa sore, n ta a Ayikam biiga, a Gedaliya nengẽ, la a paa be ne neb niynsi sẽn da ket-b tẽngã.

⁷Ad-y Zɩɩda neb n da ket tẽngã n baood zabre ne Babilon dãmbã. Bãmb dãmb n waa n wʋme tɩ Babilon dĩma kõ-la a Gedaliya, a Ayikam biiga, tẽngã naam t'a soog dapa, pagba, kamba, la neb niyns fãa sẽn da ka tall n loog yembdo Babilon.

⁸B kẽnga a Gedaliya nengẽ Mispa: yɩ-la a Ismayɛl, a Netaniya biiga, ne a Zoana la a Zonatã, a Karea kamba, ne a Seraya, a Tanewumɛt biiga, ne Netofa rao a Efayi kamba, la Maaka rao a Yazaniya.

⁹[76†] A Gedaliya, a Ayikam biiga, yeel-b lame, bãmb ne b poorẽ dãmba: «Da zoe-y rabeem ne Kalde rãmba sẽn dɩt naam y zuga ye. Ti-y roto, n zĩnd b pʋsẽ la y maan Babilon dĩma yam n tʋm a tʋʋma neere, pa-y y tẽngẽ tɩ m wẽendame tɩ bũmb kõn paoog-y ye.

¹⁰Sã n ya maam, mam zĩi Mispa wala yãmb no-rɛɛsa, Kalde rãmba sẽn wat-b ka wã yĩnga. La yãmba, kõg-y y tɩɩs biis rãam, rɩgs-y y tɩɩs biisi, bao-y kaam n pids y rʋgdo la pa-y tẽns niynsi yãmb sẽn beẽ wã, tɩ b tog n le yɩɩ yãmb soolem.»

¹¹Zɩɩda rãmba fãa sẽn da be ne Moabitse, ne Amonitse, ne Edomitse bɩ ne tẽnsa taab rãmba, wʋmame tɩ Babilon dĩma da basa neb kẽer Zɩɩda n dɩk-ba n gũnug a Gedaliya, a Ayikam biiga, a Safã yagenga.

¹²Zɩɩda nin-bãmba fãa yii zĩis niynsi b sẽn da sẽeg bãmba n wa. B sẽn wa n ta Zɩɩda tẽnga, Mispa, a Gedaliya nengẽ, b paama kood wʋsgo, n paas tɩɩs biis me wʋsg-wʋsgo.

¹³A Zoana, a Karea biiga, n paas zab-zabdb kẽer sẽn da ket wetẽ, waa Mispa, a Gedaliya nengẽ, n yeel-a:

¹⁴«Fo bãngame t'a Baalis, Amonitsa naaba, kõ-la a Netaniya biiga a Ismayɛl noore t'a wa kʋ foom?» A Gedaliya pa reeg tɩ yaa sɩd ye.

¹⁵A Zoana, a Karea biiga, yaool n da soos n tɩ yeela a Gedaliya Mispa: «Fo ratame tɩ m kẽnge n tɩ kʋ a Ismayɛl, a Netaniya biiga bɩ? Ad ned ka na n bãng ye. Bõe yĩnga la a rat n kʋ foom? Fo sã n ki, bãng tɩ Zɩɩda dãmb fãa sẽn be ne fooma na n sẽegame. Bilfa sẽn kell Zɩɩda rĩunga pʋg na n menemame.»

¹⁶A Gedaliya, a Ayikam biiga, n leok a Zoana, a Karea biiga: «Da maan woto ye, tɩ bala fo sẽn yet a Ismayɛl poorẽ wã yaa zirẽ!»