Read SEBR SÕNGO, 1998 Zeremi 42 Bible Online

Zeremi 42 - SEBR SÕNGO, 1998 bible

Zeremi 42

¹Dẽ zugẽ tãb-biisã kãsem-dãmb la sẽn yɩɩd fãa: a Zoana, a Karea biiga, a Azariyas, a Osaya, biiga, n paas neba fãa, kom-bõonego wa kom-bɛda,

²wa n yeela bãngda a Zeremi: «Wẽnd na sõng tɩ d kosgo kẽ f sũurẽ! Yõk fo Wẽnnaam, Soaala-Wẽnda sɛɛga n kõ-do, yõk b sɛɛg nin-bãmba sẽn keta yĩnga, tɩ wala fo sẽn da ne d sõorã sẽn yɩ zembalã, tõnd sẽn ket bal la woto.

³Kos tɩ Soaala, fo Wẽnnaama, sak n wilg tõndo, sor ninga tõnd sẽn na n dɩke, la d sẽn tog n maan bũmb ninga.»

⁴Tɩ bãngda Zeremi yãe n leok-ba: «M wʋmdame. M na n yõka Soaala yãmb Wẽnnaam sɛɛga n kõ yã wala yãmb sẽn kotã; la Soaala-Wẽnd sẽn na n leok a soaba, m na taas yã, m kõn solg fɩ ye!»

⁵La bãmb me yeela a Zeremi: «Bɩ Soaala sẽn ya sõngo la sɩd soaba, da bas-d ye, tõnd sã n pa tũ goam niynsi, b sẽn wilg foom, tɩ f togs tõndã. Tõnd wẽenda rẽ bãmb yʋʋr yĩnga.

⁶Yaa foo la tõnd kos yã tɩ f sok Soaala-Wẽnd n kõ-do. Tõnd na n tũ-la b sẽn yeel tɩ d maan fãa, noom-d tɩ ka noomd-do. Woto bũmba fãa na zems d yĩnga, tɩ d deega Soaala, tõnd Wẽnnaam, noore.»

⁷Dasem piiga, dẽ poore, Soaala goma ne a Zeremi:

⁸La a Zeremi boola a Zoana, a Karea biiga, la tãb-biis kãsem-dãmba, la neba fãa sẽn da be-b ne-yẽ, n pa kees ned ba a ye.

⁹La a yeel-b lame: «Yãmb da kosame tɩ m taas y koɛɛga Soaala, a Israyɛl Wẽnnaam, ad b leokre:

¹⁰‹Yãmb sã n pa tẽn-kãnga, yãmb yɛl na manege: m na n mee yãmb doogo, la a kõn lʋɩ ye. Tɩ bala yel-beed ninga sẽn paka yãmbã mam tuubd-a-la zãnga.

¹¹Da zoe-y Babilon dĩma dabeem ye; yẽ taoore yãmb digdame. Da zoe-y dĩma ye. Soaala koɛɛga. Bala mam bee ne yãmba n na n fãag yãmb na-kãnga nugẽ.

¹²Mam na n kɩtame t'a zoe yãmb nimbãanega, la a bas yã tɩ y leb n wa y tẽngẽ.› »

¹³A Zeremi paasame: «D mak wala y zãgsame tɩ y kõn tũ Soaala y Wẽnnaama noore, la y ka na n tɩ vɩɩnd tẽn-kãnga pʋg ye,

¹⁴yãmb sã n yeele: ya Ezipt tẽnga la tõnd na n kẽnge, beene, tõnd ka na n leb n yãe tãp ye, tõnd ka na n leb n wʋm zabr baorg peebg ye, la bur kõn le paoog tõnd ye, ya be la tõnd dat n zĩndi!

¹⁵Be neere, sẽn ya woto wã, yãmba, Zɩɩda rãmb sẽn ketã, kelg-y Soaala koɛɛga: Dũni fãa Soaala, a Israyɛl Wẽnnaam gomda woto: Yãmb sã sɩd yet tɩ yamb datame n kẽng Ezipt n tɩ zĩnd be,

¹⁶bãng-y yã tɩ sʋʋg ninga yãmb sẽn zoet a soabã na n paama yãmb be; Ezipt tẽnga la yãmb sẽn zoet n dabdã, kom kõn bas yãmb Ezipt tẽng ye: yaa be la y na n ki!

¹⁷Neb niyns fãa sẽn yet-ba tɩ bãmb datame n tɩ zĩnd Ezipt tẽnga, b fãa gilli, sʋʋg n na n kʋ-ba, ne kom, la bã-longdem; ba a ye menga, bãmb sʋk, kõn põs yel-pakr ninga mam sẽn na kɩt tɩ pak-ba ye.

¹⁸Sɩda, yaa woto la dũni fãa Soaala, a Israyɛl Wẽnnaam, gomda: Wala mam sũur sẽn puug wʋsgo ne Zerizalɛɛm dãmba, boto me, mam sũur na n puuga ne yãmb al wʋsgo, yãmb sã n ta Ezipt tẽnga. Beene, y sũur na sãam wʋsgo, la tʋʋr ka be b sẽn ka na n tʋʋs-y ye, kãab wẽng ka be b sẽn ka na n kãab-y ye la y kõn le yãend tẽn-kãnga ye.»

¹⁹A Zeremi kell n paasame: «Zɩɩda rãmba sẽn ket-bã, Soaala-Wẽnd yeela yãmba: Da kẽng-y Ezipt tẽng ye! Bãng-y yã tɩ ya sɩd menga la mam togsd yãmb rũnna.

²⁰Yãmb sẽn ka reng n tags neerã, y wa n kosa maam tɩ m yõk Soaala, yãmb Wẽnnaama sɛɛg y yĩnga. Y kos-m lame tɩ m wilg-y zãng d Soaala-Wẽnnaam sẽn na n leoke, tɩ y na maan wa b sẽn yeele.

²¹La ade, mam taasa yãmb Soaala, yãmb Wẽnnaam, koɛɛga, la yãmb pa reeg bãmb goama, ba a ye menga.

²²Bɩ y pĩnd n bãng neere tɩ ade, sʋʋg n na n kʋ yãmba, n paas kom la bã-longdem, zĩig ninga yãmb sẽn dat n tɩ kẽ n soondã.»