Read SEBR SÕNGO, 1998 Zeremi 44 Bible Online

Zeremi 44 - SEBR SÕNGO, 1998 bible

Zeremi 44

¹Koɛɛg a Zeremi sẽn deege n na n taas Zɩɩda rãmb fãa sẽn be Ezipt tẽnga, sẽn kẽed-b Migdol, Tapanɛs, Memfis la Patros tẽnga. A Zeremi goma ne b woto:

²Dũni fãa Soaala, a Israyɛl Wẽnnaam n togsde: «Yãmb yãee yel-beed niyns fãa mam sẽn tak Zerizalɛɛm la Zɩɩda tẽns fãa zugu. Ade, dũnna b lebga raboodo, neb ka leb n be be yɛs ye.

³Yaa b yel-wẽna n puug mam sũuri. B tɩ kʋʋ maando la b waooga tẽn-zẽng wẽn-naandse. M yaool n da ka ne bũmb ninga sẽn be bãmb ne taab sʋka. Y ka bãng-b pĩnda, y yaab rãmb me ka bãng-ba.

⁴M ka vʋʋs ye, m tʋma m bãngdba, a yeyn-ye, yãmb nengẽ tɩ b wa yeel yãmba tɩ y bas yel-yood a woto tɩ b ka tat m yam ye.

⁵La yãmb pa kelg ye, yãmb pa maan gũusgu, yãmb pa tek y zʋg wẽngã, la y kell n waooga tẽn-zẽng wẽn-naandse.

⁶Yaa rẽ yĩnga la m sũura widg bugum n yõog Zɩɩda tẽnse, la Zerizalɛɛm soya. Bũmb ka kelle sã n ka raboog sẽn kẽesd rabeem wa d sẽn ne a soab rũnna wã.»

⁷A Zeremi le paasame: «La marsã, dũni fãa Soaala, a Israyɛl Wẽnnaama, gomda woto: ‹Bõe tɩ yãmb na n sãam y meng yell woto? Yãmb na n kɩtame tɩ b kʋ Zɩɩda rãmb fãa, dapa, pagba, kom-bɩɩse la yagense. Y ratame tɩ m sɛɛs-b zãng laa?

⁸Bõe tɩ y baood n na n beeg-ma ne y tʋʋm yoodo, n kʋʋd wẽn-sãams maando, y sẽn waa n na n soond tẽng ninga, Ezipt tẽnga? Bõe tɩ y rat tɩ m menes yã tɩ dũni ninsaalba wa get-y wa yãnde la kãab wẽng bũmbu?

⁹Yãmb yĩma y ba rãmb tʋʋm wẽna, Zɩɩda nanams tʋʋm wẽna, yãmb meng tʋʋm wẽna, yãmb pagba tʋʋm wẽna, tʋʋm wẽns niynsi fãa sẽn maan Zɩɩda tẽnsẽ, la Zerizalɛɛm soya zutu?

¹⁰Al n tãag dũnna, ned ba a ye ka tol n tuub ye, ned ba a ye ka reeg tɩ maam la Soaal ye, ned ba a ye ka reeg m zãmsgo, ned ba a ye ka reeg m noorã m sẽn kõ y ba rãmba ye, la m sẽn kõ yãmba, bãmb kamba ye.› »

¹¹A Zeremi paasame: «Rẽ fãa yĩnga dũni fãa Soaala a Israyɛl Wẽnnaam leokda woto: ‹Ade, marsã mam na n sɩbga yãmba. M na n kʋʋ Zɩɩda rãmba fãa.

¹²M na n deega Zɩɩda rãmb sẽn kẽng-ba n na n tɩ zĩnd Ezipt tẽnga. B fãa na n kii be, sʋʋg n na n kʋ-ba, kom n na n kʋ-ba. Ned ba a ye kõn põs ye. B fãa na n paa tẽn-kãnga. Zabr sʋʋg bɩ kom n na n loog ne-ba. Yaa woto la b fãa na n looge. Bãmb zu-beeda la f na n tagse f sã n dat n kãab ned kãab-beedo; bɩ f sã n dat n tẽeg bũmb sẽn ka sakd tẽegr, n ya wẽnga, n ya yãnde.

¹³Neb niynsi sẽn be-b Ezipt tẽnga, m na n kãab-b lame, wala m sẽn kãab Zerizalɛɛm dãmba, na n yɩɩ sʋʋga, kom, la bã-longdem.

¹⁴Neb niynsi, sẽn yi-b Zɩɩda n wa soond Ezipt tẽng ka, ba a ye kõn põs ye, ba a ye kõn leb Zɩɩda, la yaa be la b yaool n dat n lɛɛg n wa kẽ, daar a ye, la ayo, na n yɩɩ neb a wãn bala.› »

¹⁵Rap niyns fãa sẽn da mi tɩ b pagba da kʋʋda maand wẽn-sãams yĩnga, pagba sẽn da tigim ka tɛka, neb niyns fãa sẽn da kẽed Paros, Ezipt tẽnga, naaga taab n leok a Zeremi woto:

¹⁶«Goam niyns fãa fo sẽn togs tõnd tɩ yaa Soaala goama, tõnd pa rat n kelg-b ye.

¹⁷Tõnd na n kell n maana tõnd sẽn da kãabe. D na n waa ne tɩdare la rãam n kõ a Astarte, yĩngr dĩm-poakã, wala d sẽn da maan n tãag rũnna, tõndo wala d ba rãmba, d dĩm dãmba, d kug-zĩidba, Zɩɩda tẽnsẽ la Zerizalɛɛm soya zutu. Wakat kãng tɩ d da rɩtame tɩ seke, d zug ra yaa noogo, yel-beed da ka pʋgd-d ye.

¹⁸La ade, tõnd sẽn bas n ka leb n wisd yĩngr dĩm-poaka tɩdare, n ka leb n kõt-a rãam, bũmb fãa paoogda tõndo, zab la kom namsda tõndo.»

¹⁹Pagba tol n paasame: «Tõnd sã n kõt kũuni yĩngr dĩm-poak a Astarte, tõnd sɩdb rãmba mii tiiri. B miime tɩ tõnd dõosda miisdu sẽn tar a Astarte wẽnego n kõt-a, n paas ne rãam.»

²⁰A Zeremi goma woto ne sẽn da leok-b yẽ wã, pagba la rapa:

²¹«M miime tɩ Zɩɩda tẽnsẽ la Zerizalɛɛm soya zutu y ra zoe n kõta kũun kãense, yãmba, y ba rãmba, y dĩm dãmba, y kug-zĩidba la zãma wã fãa. Dẽ yaa vẽenega! M sok n gese, y tẽedame tɩ Soaala ka mi bɩ b yĩmame?

²²Soaala ka yĩm ye, dẽ me la b ka le tõe n nee y tʋʋma, y manes yaalsã la b sĩnd ye. Dẽ me la y tẽnga lebg raboogo, wala a sẽn yaa a soab rũnna wã: b looga ne a paoonga fãa, ne a neba fãa. La yaa yel-beed ninga sẽn lʋɩ a zugã la ned kam fãa tar n kãabd a bɛɛba. Dẽ me yaa vẽenega.

²³Yel-beeda sẽn lʋɩ y zug rũnna wã, ka bũmb a to n wa ne-a, n zʋʋg y sẽn kʋ maand wẽn-sãams yĩnga n beeg Soaalã. Y pa kelg b koɛɛg ye, y pa tũ b sẽn wilg ye, y pa reeg b saglse, y pa tũ b noya ye.»

²⁴A Zeremi le yeela neba fãa, pagb la rapa: «Kelg-y Soaala koɛɛga, yãmba, Zɩɩda rãmb sẽn wa Ezipt tẽngã.

²⁵Woto la dũni fãa Soaala, a Israyɛl Wẽnnaam, gomda: ‹Yãmba, pagbã, y sẽn yiis y noorẽ la y sẽn wẽnegd n pids ne y nusi, y yetame tɩ y sẽn pʋlem bũmb ningã, y na pids-a, yĩngr dĩm-poaka yĩnga, y na n waa ne wisdu la rãam. Y sɩd maana boto. M nong-y, kell-y n tall-y boto!

²⁶Bɩ y fãa gill kelg neer marsã, yaa mam meng m toore, yaa maam, Naaba-Wẽnde, n togsde, yaa mam meng n wẽende ne m yʋʋra sẽn ka be taarã, tɩ Ezipt tẽn-peelma fãa pʋgẽ Zɩɩda ned kõn le wẽen ne mam yʋʋra ye; b kõn le yeele: m wẽend ne Soaala-Wẽnd sẽn pid ne vɩɩma ye.

²⁷Ad-m sẽn na n modg n tool-y bũmb ninga: ka na n yɩ sũ-noog ye, na n yɩɩ yel-beedo. Zɩɩda neb niyns fãa sẽn be-b Ezipt tẽnga, sʋʋga la kom n na n kʋ b fãa gilli.

²⁸Yaa neb kẽer bala, neb sẽn ka zem bũmbu la sʋʋga bɩ koma na n keese. Bãmb na yi Ezipt n leb Zɩɩda tẽn-peelmẽ la bãmb dãmba n na n kõ kaseto sã n ya mam gomdã n pidsi, bɩ sã n yaa bãmb dẽnna.

²⁹M na n yika ne yãmb kaalẽ bala, Soaala n gomde. M na n kõ-y-la makre la woto y na bãnge tɩ m na n waa ne m sẽn kãab-y yel-beed ningã. Makra la woto:

³⁰[79†] Soaala-Wẽnd gomda woto: ade, mam na n ninga a Ofra, Ezipt tẽnga naaba, a bɛɛba nusẽ, neb niyns fãa sẽn da tʋl a kũuma nusẽ, wala mam sẽn ning a Sedesiyas, Zɩɩda dĩma, bɛ ninga sẽn da rat a kũuma nugẽ, a Nabikodonozor, Babilon dĩma nugẽ.› »