Read SEBR SÕNGO, 1998 Zeremi 46 Bible Online

Zeremi 46 - SEBR SÕNGO, 1998 bible

Zeremi 46

¹Ad koees niyns Soaala-Wẽnd sẽn taas bãngda a Zeremi bu-zẽmba poorẽ.

²[81†] Ad Soaala koees ne Ezipt dĩm a Neko, ne Ezipt tãb-biisi. Dĩma ra bee Karkemis, Efrat kʋɩlga noore, la a wʋmame tɩ Babilon dĩm a Nabikodonozor zaba ne a neba n tõog-ba. Yɩ-la a Zoakim naamẽ, a sẽn deeg naam tɩ yʋʋm naasẽ. A Zoakim yɩɩ Zɩɩda dĩm a Zoziyas biiga.

³Tãnsoaben-dãmba tãsda woto: Aya, segl-y gãndo; bõonego la bɛda, tɩ yaa zabr loogre!

⁴Segl-y wiidi, wed-dʋʋdbã, zomb-y y wiidi! Ning-y zug-peto, yals-y y zĩigẽ! Maneg-y y kãna n saase bob-y y zab-teedo!

⁵Bõe la m yaool n neẽ? Tãb-biisa basda raoodo, b tard n lebda poorẽ. B sẽega b gãndaadã, ned kam zoet n tees a sẽn teesẽ, ned ba a ye ka wẽnegd a poorẽ ye, sẽn lebẽ fãa yaa yɛɛsgo. Soaala n gomde.

⁶Sẽn tõe n wudga wʋsgo ra tẽ t'a na põs ye, gãndaada ra tẽ tɩ b na põs ye. Sẽn lebd Goabg sẽnẽ, Efrat kʋɩlga noorẽ, la b pãsd n lʋɩtẽ.

⁷Ãnna n wẽnd Nil kʋɩlga Nil kʋɩlg sẽn pid n daannẽ, Nil kʋɩlg sẽn fõt wa kʋɩl bɛɛga?

⁸Ad-y yaa Ezipt tẽng n gomde: «Wala Nil kʋɩlg sẽn pid n daannẽ Nil kʋɩlg sẽn fõt wa kʋɩl-bɛɛga, m na n gãndg m yiime n lim tẽngã, n sãam dotã la nebã.

⁹Wiidi, wudg-y! Bilim-bilm, aya, wɩng-y! Tãb-biis gãndaado, loog-y taoore! Lʋɩ-y taoore Kus la Pʋt dãmba, lʋɩ-y taoor ne y gãndo, y gãnd-bõonese, loog-y yã, Lud rãmba ne y tãbdo!»

¹⁰Mik bala, da-kãng la Soaala daare, dũni fãa Wẽnda sẽn da gũud la ra-kãnga. Da-kãng la b ra gũuda n na n tug beem ne b bɛɛba. Dẽ la b sʋʋga tar velbo, wa rũm-bãnde, la a yiisd a kom la a ko-yũud ne zɩɩm. Sẽn lebẽ fãa Soaala tara kɛɛbo, dũni fãa Wẽnda kʋʋd n samdame, yaa sẽn lebd nug goabg sẽnẽ, yaa Efrat kʋɩlga noore.

¹¹M yãbd fo, Ezipt! La rʋ Galaad tãmsã tɩ f na paam kaam n bãn f noada. La m yet-f lame tɩ f ra nams ne tɩpg ye ad-f sãmpogra ka na n sãoog ye.

¹²Bu-zẽmba bãngame tɩ f paama yãnde, f waasga sãta zĩig zãnga. Gãndaoog n seg a gãnda-taaga, la b yiiba fãa naaga taab n lʋɩ.

¹³ [82†] Woto la koɛɛg ninga Soaala-Wẽnd sẽn taas a Zeremi, Babilon dĩm a Nabikodonozor sẽn waa n na n zab ne Ezipt raare:

¹⁴Wilg-y kibara Ezipt rãmba, taas-y kibara Migdol rãmba, taas-y Memfis la Tapanɛs tẽnse. Yeel-y-ba: «Ned kam fãa yals a zĩigẽ!» Zabra zoe n looga ne y yagse.

¹⁵Bõe n maane? Loalgã, f wẽn-naanda, lʋɩɩme? Soaala sẽn tus-a, a taa tẽnga?

¹⁶Yɩɩ wala b sẽn tusd tãb-biisã n lubdẽ tɩ ned kam fãa sã n yik bɩ a yetẽ: «Wa-y tɩ d leb d tẽngẽ, d zãag ne zabra la a yel-beedã.»

¹⁷La sã n ya Ezipt dĩma, a bãng t'a sẽn tog ne yʋʋr ninga yaa a Be bʋʋr zaalem.

¹⁸Ad-y Soaala, dũni fãa Wẽnd, wẽendame: «Bɛ wã na n waame, dẽ yaa bũmb sẽn ya sɩda wa sẽn ya sɩda tɩ Tabor yaa tãnga n leb n ya sɩda tɩ Karmɛl sulgd n geta mogrã.

¹⁹Ezipt tẽng rãmba, kẽ n wʋgs-y y teedo n tees y pa-weer tẽnga, Memfis na n lebga we-raoogo, weoog sẽn kẽesd rabeem, we-raoog sẽn ya vɩʋʋgo.

²⁰Ezipt da yaa nag-sɛdga sẽn ya neere, la keoodre n yi nug Goabga, n wa tabend-a.

²¹Tãb-biis niyns sẽn da zabd n deegd ligda da tara fãa, bũmb da ka paoogd-b ye. Mik bãmb fãa na n lɛɛg n zoeeme. Sẽn na n sak-a n yaas ka ye, ra-beeda raare, m sẽn na n yik ne bãmba raare, sẽn na n sak-a n yaas ka ye.

²²Ezipt tãb-biisa soos n loogame n pa tol n maan bʋʋre, wa waafo, a sẽn yãend tɩ bɛɛba watame n na n tak zabr ne-a, n wat wala ra kɛɛdba, n yuumd b lare la b zende.

²³B kɛɛda googã; da yaa tɩ bɛd bala n sẽg taaba, wa Soaala sẽn wilg-ma. Da-kɛɛdba sõor da ka tɛk ye, b da wẽnda sʋya, n ka tõe n sõd ye.

²⁴Ezipt tẽng neera zĩi ne yãnde, a lʋɩɩ Goabg rãmba nugẽ.»

²⁵Dũni fãa Wẽnde, a Israyɛl Wẽnnaam, yeelame: «Mam na n yika ne a Amon, Tɛɛb wẽn-naandã, n yik ne Ezipt wẽn-naandsã, ne a dĩm dãmba. M na n yika ne Ezipt dĩma la sẽn teega yẽ fãa.

²⁶Mam na ninga bãmb fãa neb niyns sẽn dat n kʋ bãmba nugẽ: Babilon dĩma, a Nabikodonozor, nugẽ, la a tãb-biisa nugẽ. La kaoosg pʋgẽ, naab na n le wa zĩnda Ezipt tẽnga wala pĩnda.» Soaalã n wilg rẽnna.

²⁷Sã n ya foom, m biig a Zakoob, da zoe rabeem ye. Da bas raood ye, Israyɛl! [83] Tɩ bala, ade, mam na n fãaga foom tẽn-zãorgẽ dãmb nugẽ, f yembda tẽngẽ dãmb nugẽ. A Zakoob na n le wa zĩnda ne laafi, tɩ ned ka be n na n kẽes-a rabeem ye.

²⁸ [84†] Sã n ya foom, m biig a Zakoob, da maan dabeem ye! Soaala n gomde. Tɩ bala, mam bee ne foom. Mam sẽn da sẽeg yãmb tẽns niynsa pʋsẽ wã, tẽn-kãens na n wãame. Sã n yaa foom, m ka na n sɛɛs f rooga ye, m sɩbg-f lame bala wa sẽn da segde, m da ka tõe n bas-f saalle, wa ned sẽn ka tol n beeg ye!