Read SEBR SÕNGO, 1998 Zeremi 48 Bible Online

Zeremi 48 - SEBR SÕNGO, 1998 bible

Zeremi 48

¹Ad Soaala-Wẽnde, dũni fãa Soaala, a Israyɛl Wẽnnaama koɛɛga, Moab poorẽ: Yell na n paka Nebo tẽnga: b zɛɛ-a-la zãnga; Kiriyatayim paama yãnde: b tõog-a lame, do-kãseng ninga sẽn tara pãnga, yãnd me n na n kʋ yẽ, a raooda fãa wooga zãnga.

²A ka leb n ya Moab zu-zẽkr bũmb ye! Esbõ tẽnga, b baoome n na n sãam a yelle: Ad-b sẽn yete: Aya! D kɩt t a menem zãnga, tɩ b ra le gom a yell abada! Foom me, Madmena, fo yell me na n sãamame, tɩ bala fo ka na n põs sʋʋg ye.

³Kɛlenga n yit Oronayim: Yaa yel-beedo, yaa wãab menga!

⁴A Moab yell sɛɛme, a kɛlenga n sãt n tat Soar.

⁵Sẽn põs-b kũuma zĩi ne nintãm. F rʋʋd Luyit tãmse, f sigd Oronayim, f wʋmda b sẽn gomd yel-beeda yelle.

⁶Aya, zoe-y yã, bao-y laafi! Zoe-y yã, wala bõn-wɛɛga sẽn zoet zĩ-pɛɛlẽ.

⁷Yaa sɩda, Moab, fo ra teega f tʋʋma la f arzɛkã, la ade b na n tõoga foom me! B tʋka f wẽnd a Kemos n dabd pa-weere tɩ f maan-kʋʋdba la f na-biisa yãagd-a.

⁸Tẽn-wãada saada tẽnsã a yeyn-ye, a ka na n long tẽng ba a ye. Longẽ bɩ kunkubrẽ, nin-vɩɩg ka le ket ye. Pʋs n yaa rẽ la Soaala togs yã.

⁹Segl-y yaoog a Moab yĩnga, t'a na n sɩd wãame a tẽnsa fãa na n lebga raboodo, nin-vɩɩg kõn le kell be ye.

¹⁰Sẽn maanda Soaala tʋʋma yood-yoodo, bɩ Wẽnd yãk a soab barka! Bɩ Wẽnd yãk a soab barka, ned ninga sẽn kɩta t'a sʋʋg kong zɩɩm!

¹¹Al a yãadmẽ, Moab da vɩɩme tɩ dabeem kaẽ ye; b ra zɩ n tall-a n kẽng pa-weer ye, a ra zĩi ne laafi, wala rãam b sẽn bas t'a kũm a yam, t'a rabɩlla tisg zãnga. Rãama zɩ n teem yʋʋr ye, bũmb pa teem a noore, bũmb ka loog ne a yũ-nooga ye.

¹²Yaa rẽ yĩnga la m yãk wakato, Soaala-Wẽnd n gomda, tɩ rãama na n leeg yʋʋr a to pʋgẽ. Dã-rʋgda fãa na n lebga vɩɩdo, b na n pãb-b lame n wã.

¹³A Moab ka paam a wẽnd a Kemos nengẽ, a sẽn da gũud bũmb ninga ye. Yɩɩ wala a Israyɛl me sẽn ka paam fɩ Betɛl wẽn-naanda nengẽ, la a yaool n da teeg-a-la wʋsgo.

¹⁴Moab tẽng rãmba, yãmb na n yɩɩ wãna n yeele: «Tõnd ya sũ-keelem dãmba, zab-zabdb sẽn ka zoet bũmbu?»

¹⁵Ned ninga sẽn na n wã a Moab, kẽeda a tẽnsã ne zabr sʋʋga la a legenda a kom-bɩɩba n tees b kodgr zĩigẽ, wa b sẽn maand ne rũmsi. Yaa woto la Dĩm kãsenga gomda, bãmb yʋʋr la Wẽnde, dũni fãa Wẽnde.

¹⁶Moab sãoong kolgame, yel-beeda wata ne yãgbo.

¹⁷Yãmb fãa sẽn yaa a yagse, yãmb fãa sẽn mi-a neere, wa pʋʋs-y a Moab a zaamẽ wʋm-beedo. Sok-y n ges maana a wãna tɩ b wã tẽng ninga sẽn da tar pãng a narã, pãng sẽn da yãet pẽgr zĩig zãngã?

¹⁸Dibõ tẽng rãmba, sig-y y ziira goeel zugu; zĩnd tẽnga Dibõ, zĩnd tẽn-nabrẽ, tɩ bala sẽn wãa Moab, wata fo nengẽ, a na n wãa fo tãnsoben-dotã.

¹⁹Aroɛr dãmba, yaas-y sora noor n gũudẽ, sok-y sẽn zoet-bã, sok-y sẽn põs-bã n gese yaa bõe n maane?

²⁰Yaa woto la b leokda: Yãnd tara a Moab, a basa raood zãnga! Waas-y yã! Kelem-y yã! Moon-y Arno kʋɩl-bɛɛga noore t'a Moab wãame.

²¹Soaala kao-la b bʋʋdo n paalg kunkubã la Olon tẽnse, n paas Yaas, Mefaat,

²²n paas Dibõ, Nebo, Bɛt-Diblatayim,

²³n paas Kiriyatayim, Bɛt-Gamul, Bɛt-Meõ,

²⁴n paas Keriyot la Bosra. A tata Moab tẽnsa fãa, sẽn pẽ-ba, wala sẽn zãr-ba.

²⁵A Moab pãng sɛɛme, a kang kaoogame. Boto la Soaala-Wẽnd gomda.

²⁶Lub-y Moab tẽng rãmba, tɩ bala b maana zẽk-m-menga ne Soaala. La Wẽnd na kɩt tɩ b yũnug-b rãama tɩ b wa gãe n wʋbdẽ, tɩ neba fãa wa gũbg-ba n laadẽ.

²⁷A Moab tẽeg tɩ yẽ n da laad a Israyɛl, n da get-a wa wagdre, n da ka gomd a yelle n ka gird a zug ye.

²⁸Moab rãmba, bas-y tẽnsã, kẽng-y n tɩ zĩnd-y pĩisa zutu. Maan-y wala walle sẽn tʋɩt a tʋko, a gãndgda bog-zulungã n tʋɩ.

²⁹Tõnd wʋma a Moab yelle, n wʋm a wilg-m-menga yelle, la a tɩtaama yelle, a sẽn geend a meng ne bũmb ninga, a sẽn gomd põt-põto, a sẽn tẽed tɩ yẽ n yɩɩd fãa.

³⁰Mam me mi-la a wʋglem, Soaalã n gomde, a gomdame n paasd yɛla, a lʋɩɩsda a meng taoore, la rẽ fãa yaa zaalem.

³¹Dẽ n so tɩ m sã n tagsd a Moab yelle yaa kʋʋr yɩɩlle la m pʋta, m yãbda a neba yĩnga, m yãbda Kir-Erɛs dãmba!

³²Mam kũmda foom, Sibma bugsuntungu pʋʋgo, mam kũmda foom n yɩɩd Yazɛr. Fo willa da tẽegame n zãag zĩiga, f ra tol n gãndga mogrã, n da tat Yazɛr. Sẽn wãada tẽnga wa n deega f biisa zãnga

³³Sũ-noog sẽn naag ne bʋ-raasa sɛɛme, B tɩɩsa tẽngr yaa sɩɩ. Sĩmsa ka le yɛs ne rãam ye, ned ka ket n na n fẽd bugsuntunga biis ye, yɩɩl niyns sẽn da yɩɩnd tɩ tʋʋmda kẽnda, ned ba a ye ka le be n yɩɩn-b ye.

³⁴Esbõ boondame tɩ b wa fãag-a, la Eleale rãmb wʋmda b kɛlenga. Yaas rãmb wʋmda b kɛlenga; bʋʋra yita Soar n tat Oronayim, n tat Eglat-Selisiya, tɩ Nimrim sẽn da gãe ne kooma lebg ko-yũud zĩisi.

³⁵Soaala-Wẽnd n yeele: «Ned ninga sẽn wata ne kũuni tãmsa zutu n na n kõ wẽn-naande, bɩ sẽn wisda tɩdare bãmb taoore, m na kɩt t'a soab menem.

³⁶Yaa rẽ yĩnga la m yãbd a Moab la m yãbd Kir-Erɛs. M wiisda wa wɩɩga tɩ b sẽn da paama fãa lebga zaalem.

³⁷Ninsaalba wõrsa b zoobdo, n kõog b toeemse, b kɩɩsa b nusi, la b yera sũ-pa-noang futu.

³⁸Moab bɛɛnda fãa zutu, la sõasg zĩisi fãa, yaa yãbr bala; dẽ wã yaa mam sẽn wã Moab, wala b sẽn wãad yʋʋr f sẽn ka le rate.» — Soaala gomde.

³⁹Pʋd-y sũ-sãang yɩɩlle: «Kato, a Moab lʋɩ zãnga! A sẽn wẽnemd a kãar n tees Soaala ka lebg yãnde?» A Moab lebga laad bũmbu la dabeem bũmbu, a yags fãa yĩnga.

⁴⁰Tɩ bala Soaala-Wẽnd gomda woto: «Bũmb wala sɩlga n laande, n tẽegd a pɩgs a Moab zugu.

⁴¹B reesa a tẽnsã fãa, tãnsoben-dota fãa, b wã-b lame. A Moab tãb-biisa sẽn ya gãndaadã, fãa zĩi ne yɩɩre wa pag sẽn kũmd rogem.

⁴²B menesa a Moab b ka le sõt-a nin-vɩɩs sʋk ye, A tẽeme t'a yɩɩda Soaala-Wẽnde.

⁴³Ad Soaala sẽn gomd y yĩnga, Moab rãmba, y pʋɩɩr la woto: Sũ-puur sẽn ka taare, bog-zulunga la wĩ ka tɛka.

⁴⁴Sẽn data n põs sũ-puurã, na n lʋɩ bog-zulunga pʋga. A sẽn yet t'a yii bog-zulunga la wĩ wã sẽn wẽneg n loe-a. A Moab yella na n yɩɩ woto, m sã n wa yik ne-a. Soaala n gomd boto.

⁴⁵Neb niynsi sẽn zoet-ba yɛɛme, n yaas Esbõ n na n soond be. La bugum yii Esbõ, bug-zɩlenga yii naab a Siyõ zakẽ bug-walem n loog n na n tɩ yõog nin-bãmba tẽnsa sẽn pid ne bʋʋrã; bugma yita kɩrenga n tees sʋka.

⁴⁶Fo yell sãam yã, Moab! A Kemos neba loogda zãnga; B talla f kom-dibli la f kom-pugli n loog yembdo.

⁴⁷ [86†] La daar n wate, Soaala n gomde, A Moab yɛla na n tekame.» Koe-kãnga n baasd koeesã Soaala sẽn taas a Zeremi a Moab poorẽ.