Read SEBR SÕNGO, 1998 Zeremi 5 Bible Online

Zeremi 5 - SEBR SÕNGO, 1998 bible

Zeremi 5

¹Zoe-y n saag-y Zerizalɛɛm, ges-y neere, sa-y n sogs-y, gilg-y raasã n gese y na yãend ned sẽn tũud so tɩrga, ned sẽn baood sɩda? Y sã n yãend nin-yend menga m na maan sugri ne Zerizalɛɛm. Maan n yeele, maam, Naaba-Wẽnde.

²Ad-y tẽnga rãmb sã n wẽenẽ la b yet woto: «M wẽend ne Soaala-Wẽnd, Vɩɩm Naaba,» b wẽena Soaala yʋʋr zaalem.

³Soaala-Wẽnde, yaa bõe la y gũuda? Yaa y neba ra bas yãmb pʋgbo. Yãmb sɩbgd-b lame la b ka yɛɛsd ye. Yãmb sɛɛsd-b-la a yeyn-ye la b baas n zãgsda y kelgre. B kʋɩɩsa b nens wa pĩig kugri, b ka rat n lɛɛg n wa kẽ yãmb ye.

⁴Mam da yeta m menga tɩ b sẽn maand woto wã, b maanda wa yãas sẽn ka mi bũmb ye; m yetame tɩ b ka mi Soaala-Wẽnd daab ye, tɩ b ka mi Soaala sẽn dat tɩ d modg n pʋg-b n ta zĩig ning ye.

⁵Woto m yeelame tɩ m na n pẽnega são-sãood rãmba tɩ daare bãmb mii Soaala raabo, b mi Naaba-Wẽnda sẽn dat tɩ b modg n ta zĩig ninga, la kato, piig ka são a nu ye! Bãmb me kaoo bũmb ning fãa sẽn da loe-b ne b Wẽnde.

⁶Yaa rẽ yĩnga la bõnyẽeg yit tʋgrẽ n yõgd-ba, yaa rẽ yĩng la digd-n-yĩidg tõsd-ba, tɩ ãbg wat n sor b tẽnsa noore, la a sɩɩgd sẽn yit-a fãa. Kato, b sẽn tar tõdgr la b sẽn tare, b zãmba ka be tɛk ye!

⁷Zerizalɛɛm, m na n kõ-f-la sugr bõe yĩnga? Fo kamb basa maam, b wẽenda b wẽenego ne wẽnd sẽn ka wẽnd ye. M ka bas tɩ bũmb paoog-b ye, la b saa n yo-la b yoobo, Yooba zĩigẽ la b ra zoet n dengd taaba.

⁸B sẽn wẽnd bũmb ninga: bãng wed-nobdse sẽn pʋgd wed-yãanse. Ned kam fãa yãeta a to paga n kelem bõndre.

⁹Ka tog tɩ m lʋɩɩs m toog sɩda? Ka tog tɩ m sɩbg nin-bãmba sɩda? Yaa Soaala-Wẽnd n sokde. Ka tog tɩ m maan buud kãnga bũmbu n paam n dok m sũur sɩda?

¹⁰Bɩ b kɛ a bugsuntundã sẽn lolemd tãnga, n kẽ a pʋgẽ n kɛ fãa n dʋʋge, n kees bala bũmb sẽn pa zem fɩ; bɩ b võ tobendã tɩ m pa so bãmb ye.

¹¹A Israyɛl roogo wala a Zɩɩda roogo ka maan pʋ-peelem ne maam ye. Maam n yeele, maam, Naaba-Wẽnde.

¹²Zɩɩda rãmb yeelame tɩ b ka mi Soaala ye. Bãmb n maand tɩ Wẽnd ka tar pãng ye, la woto yel-beed kõn ta-b ye, b ka na n seg zabre bɩ kom ye.

¹³B bãngdba goama yaa sobgo, b ka tar sẽn sek toagsg ye. Bɩ b sẽn gomd yel-beed ninga lɛɛg n lʋɩ b zugu!

¹⁴Yaa rẽ yĩnga la Soaala-Wẽnde, dũni fãa Wẽnda, gomd woto: Kelge, Zeremi, sẽn ya woto la b gomdã ad koɛɛg ning m sẽn na n kõ fooma na n lebga bugum, tɩ buuda lebg raado, tɩ bugma rɩ-a.

¹⁵Sã n ya yãmba, Israyɛl kamba, yaa Soaala n gomde, m na n boola tẽn-zãorgẽ dãmba, tɩ b wa yik zabr ne yãmba. Ned zɩ n tõog bãmb ye, yaa buud sẽn pid ne yʋʋma, buud kʋdg menga, y ka tõe n gom b goama, y ka tõe n wʋm b goama ye.

¹⁶B lok kʋʋdame, b tãb-biis yaa gãndaado.

¹⁷Buud kãnga n na sɛɛs zãnga: y kood biisi la y buri, y kom-dibli la y kom-pugli, y rũmsi, bɛd la bõonese, y bugsuntund biisi la y kankama. Zabr na n luba y tãnsoben-doto, y sẽn tẽed zĩig ninga tɩ bũmb kõn maan-y wã.

¹⁸Baasgo, yaa Soaala-Wẽnd n gomde, m kõn sak n menes-y gill ye.

¹⁹La b sã n wa soke tɩ yaa bõe yĩng la Soaala sɩbg-ba ne yel-beed a woto fãa, fo na leoke, foom a Zeremi, tɩ yaa b sẽn bas b Soaala n na n waoog, b meng tẽngẽ, bu-zẽn wẽn-naandse. Woto wã b na yɩ sãamba sõgen-kamba, b pa-weoog tẽngẽ!

²⁰Soaala-Wẽnd n yeele: Bɩ b taas a Zakoob yagense, bɩ y sõng tɩ Zɩɩda rãmb wʋme.

²¹ [7†] Bɩ y kelge woto, yalems buudu, yãmb tara nin la y ka ne ye, y tara tʋba la y ka wʋmd ye.

²² [8†] Maam n sokde, maam, Naaba-Wẽnde: Bõe tɩ y ka na n deeg tɩ maam la y Soaala? Bõe tɩ y ka na n dig rabeem m taoore? Yaa maam n kok mogr ne bĩisri, dẽ la a toaag a sẽn kõn gãndg bada. Mogra nong bɩ a rãmb a rãmbgo a kõn tõog n gãndg-a ye; ko-wiisa nong bɩ b ning rãamde b kõn tõog fɩ.

²³Buud kãnga bala la buudu sẽn tar zʋg-wẽnga, yẽ bala n ka reegd m noore. Yẽ bal n lake, n looda,

²⁴a zãgsame t'a kõn yeele: tõnd da togame n deeg tɩ Naaba-Wẽnd la d Soaala. Yaa bãmb n kõt tõnd saaga, sẽego la sɩpaolgo, b wakata sã n ta bala. Bãmb n kõt-d wakato, d kooda tigsgu yĩnga.

²⁵Yãmb yel-wẽna sãama rẽ fãa, y yel-wẽna kɩtame tɩ y ka le tõe n paam kũun kãens ye.

²⁶Bi-bees n be m buudẽ wã. La ad-y b wẽnda luin-bẽtba sẽn sor moogẽ n gũudẽ. B bẽda b bẽdgo la yaa ninsaalba la bãmb baood n na n yõge.

²⁷Wala b sẽn pidsd no-sẽko ne noose, b pidsa b rota ne wagdem laogo. La yaa woto la b paas b arzɛka la b pãnga.

²⁸B nobame n pidi; b wẽnema ka be tɛk ye. B ka kaood bʋʋd ne sɩd ye; b bʋʋd zĩigẽ b zãmbda kɩɩba, ka rẽ kɩɩbã n soẽ bʋʋm. Yaa rẽ yĩng la b paam n lebg arzɛk rãmba. B zãmbda naong rãmba.

²⁹Da ka tog sɩda, yaa Soaala-Wẽnd n gomde, da ka tog tɩ m maan buud kãnga bũmbu, n paam n dok m sũur bɩ?

³⁰Ad-y yel-beedo, bũmb sẽn yikd sũuri n tʋmd tẽnga pʋga:

³¹Bãngdba gomda wẽn-faoog yĩnga, tɩ maan-kʋʋdba baood sẽn ya yõod b yĩng bala, tɩ m buuda get rẽ wa bõn-sõngo. Yɛla baasg raare, y na n maana bõe?