Read SEBR SÕNGO, 1998 Zeremi 51 Bible Online

Zeremi 51 - SEBR SÕNGO, 1998 bible

Zeremi 51

¹Woto yaa Soaala koɛɛg a to: Mam na n kɩtame tɩ sob-raoog kaooge n wa sãam Babilon ne a kẽedbã.

²Mam na n tʋma neba, la b na n wa sẽeg-a-la wa sobgo sẽn yelgd mo-pagdo la b zɛ a tẽngã. A zu-beeda raare, b na n gũbg-a lame n gilgi.

³Tãbda rãmb sɩng tãoobo. Sẽn tar-b kuta fut sɩng yeelgre, da bas-y tãb-bi-poala ye, zab-zabd ba a ye da põs ye.

⁴Sẽn paam-b sãmpogre na n paa Babilon, tɩ soya pid ne sẽn lʋɩ-b zabrẽ.

⁵Tɩ bala, tẽnga fãa pida ne yel-wẽna, tɩ bala b beega Soaala-Wẽnde, b beega a Israyɛl Nin-sõngã. Israyɛl la Zɩɩda kell n talla b sõangda, bãmb la dũni fãa Soaala.

⁶Zoe-y n yi Babilon, ned kam fãa bao a menga da bas-y tɩ b wa naag-y n kʋ ye. Ad-y marsã yaa Soaala raare, yaa b rok b sũur daare. Soaala lebsda Babilon a sẽn tog ne.

⁷ [97†] Babilon da yaa sãnem wamde Soaala-Wẽnd nugẽ. Wamd-kãng rãama n da tɩgsd ãndũni rãmba, a rãama la b ra yũud n tuumnẽ.

⁸Vugr bala, wamda lʋɩɩme n wã: kũm-y Babilon! Bao-y kaam n kõ-a t'a bãn a nodre n boog a toogo. Daar bɩ a sãooge!

⁹ [98†] Tõnd tɩbsa Babilon la a ka sãoog ye. Wa-y tɩ d loog n bas-a, ned kam fãa leb a tẽngẽ. Pɛt ning a sẽn na n yãenda yaa pɛt menga, tɩ yaa dũni wã la a beeg yã.

¹⁰Sã n ya sɩda, Soaala maan-d-la neere. D ta Siõ n togse tõnd Wẽnda sẽn maan d yĩnga.

¹¹Soaala yẽsame n dɩgle: b na n sãama Babilon. Yaa Mɛd dãmbã n na n tʋm tʋʋnd kãnga. Yaa Soaala raare. B rokda b sũuri tɩ b sãama b ro-sõngã. Saas-y y pɛɛma neere, saas-y n pids y loko.

¹²Zẽk-y y tãp-kaoore tɩ b sɩng zabre ne Babilon lalse! Paas-y gũudba sõore, zĩig fãa paam a gũuda; zaoolg-y sẽn ne-b yɩɩga. Soaala na n pidsa b sẽn kãabe, n pids b sẽn yeel fãa Babilon poorẽ.

¹³ [99†] Babilon, fo sẽn be ko-bɛd noorẽ la fo sẽn ya dakãagre, fo wakat taame, fo wẽnema pida zãnga.

¹⁴Dũni fãa Wẽnd n wẽend ne b menga: «Mam na n kɩtame, la rẽ yaa sɩda wa sẽn ya sɩd tɩ m ya Wẽndã, m na n kɩtame tɩ neb sẽn ya ka tɛka wa sʋya, wa kalwaare wa reeg f tẽngã n yãmbe. B na n teesa foom n tãs b zabr tãsga.»

¹⁵Soaala wilga b pãnga. B naama tẽngẽ la b wilga b tʋʋm-minim n yag dũniya, n wilg b yama zulum, n pids yĩngra ne a teedã.

¹⁶B sã n gom bala, la koom sẽn tigimd yĩngri, sawad-tagda yɛdgda yĩngri tɩ sa-tãsga wa ne sa-koom; sobga yita a sẽn da tigimẽ.

¹⁷Dẽ la ned kam yɛsa n ka mi a sẽn maande. La sẽn kẽ-b moog zãnga, yaa yõgsã sẽn dõog b wẽn-naandsã, b zĩime la b zut wuka ne yãnde; yaa belgem-belgem bala la b naan yã; sẽn vʋʋsda ne yõor ka ye.

¹⁸Yaa sobg ra-taase, yaa laad bũmbu. Dẽ fãa na n kãag n loogame, Soaala sẽn na n yik raare.

¹⁹A Zakoob Pʋɩɩrã ka ya wa bãmb ye, bãmb la dũni fãa Naanda, t'a Israyɛl yaa b sẽn bok n kõ b menga, b yʋʋra la Pãng soaba Wẽnde.

²⁰Babilon, foom n yɩ m zãare fo yɩɩ m zab-teoogo. M talla foo n zab ne bu-zẽmbã, m talla foo n sik nanamse b zaoorẽ.

²¹M talla foo n pãb n kʋ wed-dʋʋdba ne b wiidi. Mam talla foo n to bilim-bilma la sẽn da be-b pʋsẽ.

²²Maam n tall-fo n wẽ paga la raoa, nin-kẽema la yãaga, n tall-fo n wẽ bi-ribla la bi-pugla,

²³maam n tall-fo n dig rũm-kɩɩmba ne b rũmsi n dig koaadba ne b nag-koodse, n dig kombɛɛmba ne b sõangdba.

²⁴La ade, Soaala-Wẽnd n gomde, y na yãend marsã m sẽn na n lebs Babilon ne a kẽedbã wẽng ning b sẽn maan Siõ.

²⁵N-ye! M yika ne foom Babilon, tẽn-wãada, sẽn wã dũni wã gilli, m gila m nugu la m zẽk-a lame n tees foo, Soaala n gomde; m na n tus-f lame n sik f pĩisa zugu. M na n kɩtame tɩ bug-kãseng zomb fo,

²⁶bugum sẽn ka na n kees kugri, sẽn tõe n le rɩk n me roogo bɩ sẽn tõe n le paas a pãnga. Fo na n lebga we-raoog sẽn ka sakd gesgo, yaa Soaala n gomde.

²⁷Zẽk-y tãp-kaoore tẽnga rãmba peeb-y bardo, bu-zẽmba tẽnsẽ, Yik-y fãa gilli n teedg ne Babilon. Bool-y tɩ b yi Ararat la Minni tɩ b yi Askenaz n wa sõnge. Yiis-y neb sẽn na n sa n bao tãb-biisi, yiis-y wiidi sẽn na n kẽ zabre; yiis-y-b ka tɛk wa kalwaare.

²⁸Kɩt-y tɩ tẽnsa fãa tigim, tigim-y Mɛd dãmba nanamse, b kombɛɛmba ne b sõangdba, n paas b soolma rãmb fãa.

²⁹Tẽnga rigimdame la a yɛɛsdame, a sã n ne fãa tɩ Soaala pidsda b kãabgo, n kɩt tɩ Babilon tẽn-peelem lebg we-raoogo sẽn kẽesd rabeem.

³⁰Babilon gãndaada mens ka rat n zab ye, b baooda zĩis n na n wũundi. B ka le tar raood ba bilfu, lebga rabɛɛmb wa pagba. Dẽ me la kʋɩlensa pakr ka le ya toogo, dẽ me la bugma na n zomb rotã

³¹Kibɛ-kõatba reesda taaba b ninga tĩig n digd na-yiri, n na n tɩ wilg dĩma kibare; bɛɛba zoe n kẽe tẽnga zãnga.

³²Soya fãa gɩdgame, tãnsoben-dota fãa yõoga bugum, dabeem kãsenga kẽe zab-zabd fãa.

³³Dũni fãa Soaala koɛɛga, a Israyɛl Wẽnnaama koɛɛg la woto: «Babilon gãee ne zu-beedo. B kõog-a-la wa b sẽn kõogd zɛɛga n na n pãb alkam. Yaa tigsga wakat n zoe n ta.»

³⁴Babilon dĩm a Nabikodonozor yũ-la m zɩɩma zãnga, a basa maam wala la-vɩʋʋgo, a vela maam wala rũng sẽn tar pãnga, a pidsa a pʋga ne m paoongo n yaool n wa bas-m kɛɛnga.

³⁵Bɩ Babilon deeg a sɩbgre, a sẽn maan-m pãn-tõoga sɩbgre, yaa Siõ tẽnga rãmb n gomde. Bɩ Babilon yao t'a raaga m zɩɩm! Zerizalɛɛm n leokd rẽnna.

³⁶Dẽ n so tɩ Soaala gomd woto ne Zerizalɛɛm Ade mam dɩkda fo yellã n dogl m zugu, la mam n na n ges n tug beem ne f bɛ wã. Mam na n kʋɩɩsa a kʋɩlgã, la m yẽd a ko-nini.

³⁷M na kɩtame tɩ Babilon lebg raboogo a na n lebga we-yũus na-tẽnga, tẽnga na n lebga vɩʋʋgo, na n lebga yɛɛsgo la yel-beed tẽnga.

³⁸Marsã wã Babilon dãmba wẽnda bõnyẽese sẽn yãbde, b kelemda wa bõn-nindi.

³⁹M basdame tɩ b velma wa yiki tɩ m dɩlg-b sõmbo, m na yũnug-b-la rã-toose tɩ b lʋɩ n ka le yik ye. Dẽ yaa maam m leoke, maam, Naaba-Wẽnde.

⁴⁰M na n kɩtame tɩ b tall-ba n kẽng dũms kʋʋb zĩigẽ wala pe-bi, pe-raado, la boeese.

⁴¹Yɩɩ wãn wãna t'a Sesak lʋɩ a bɛɛb nugẽ? Tẽnga yʋʋr yaool n da yi zĩig zãnga. Maana a wãn tɩ b wa tõog-a? Babilon lebga zĩ-peen-daaga; zĩ-peen-daag sẽn yɩkd pɛlenga nin-zẽmba tẽn-peelmẽ.

⁴²Mogra koom wukame n kẽ Babilon, Ko-wiisa waa ne bʋ-raase n wa lim-a zãnga.

⁴³A tẽns tekame n lebg bũmb sẽn pa sakd gesg ye, n lebg zĩ-koɛɛnga, n lebg weoogo tɩ ned ka be a pʋgẽ ye, ned ka le saagd n pɩʋʋgd be ye.

⁴⁴Soaala wilgda woto: Maam n yik ne a Bel, Babilon wẽn-naandã. A sẽn dat n vel bũmb ningã, m na kɩt t'a lɛɛg n wʋk-a. Bu-zẽmba kõn le sũ taaba n waa a nengẽ ye. Babilon lal-gũbrã lʋɩɩme.

⁴⁵Yãmba, m neba, yi-y tẽnga pʋgẽ! Ned kam fãa bao a meng fãagre, tɩ maam, Naaba-Wẽnd sũura yika wʋsgo.

⁴⁶Da bas-y raood ye, da maan-y rabeem ne y sẽn wʋmda ye. Rõanna b gomda boto n yik vẽer n gom woto. B gomda pãn-tõog yelle, n gomd tɩ na-wẽng n dig a to, n deeg a zĩiga.

⁴⁷Ade wakat n wate tɩ m na n yik ne Babilon wẽn-naandsã. Na n yɩɩ yɛɛsg kãseng tẽnga. Sẽn na n lʋɩ-b tẽnga pʋga na n paame n ka yãend yaoog ye.

⁴⁸ [100†] Wakat kãng la b na n wʋm kaasgo, kaasg sẽn na n wulumd yĩngr la tẽnga la yaa nug goabg rãmbã n wat n na n wã Babilon. Dẽ yaa Soaala n togse.

⁴⁹ [101†] Babilon yiisa neb ka tɛk yõore dũni wã pʋgẽ. Yẽ me wakata taame marsã t'a na n deeg sɩbgre, a sẽn kʋ Israyɛl kamba yĩnga.

⁵⁰Yãmb sẽn põs sʋʋga, kul-y yã! Da yaas-y ye! Y sẽn ta zĩig ning fãa, tẽeg-y Soaala-Wẽnd yelle, la da yĩm-y Zerizalɛɛm yell ye.

⁵¹Yãnd da tara tõndo, tõnd sẽn da waa n wʋmd tʋya; yãnd da na n kʋʋ tõndo, sãamba sẽn waa n kẽ Soaala do-sõngã.

⁵²Yaa rẽnd yĩnga, Soaala n gomde wakat n wate tɩ m na n yik ne Babilon wẽn-naandsã. Tẽnga pʋg, zĩis fãa, b na wʋm sẽn paam-b sãmpoaga waasgo.

⁵³Babilon rat bɩ a rʋ yĩngri, a nong bɩ a tɩ yãk zĩig sẽn ka tõe n ta mam na n kõo noore tɩ tẽn-wãadba ta be. Soaala n gome.

⁵⁴Kelg yã, bʋrg n yit Babilon; yaa yel-beed kaasgo n yit Babilon.

⁵⁵Ad-y yaa Soaala-Wẽnd n wa n na n sãam Babilon. Bʋ-raasa na n wẽneg n sɛɛme. Bala bɛ wã tara kɛlenga a maanda bʋʋre wa mogre, a tãsda wa saaga.

⁵⁶Sẽn wãada tẽnsã kolgda Babilon a na n zaba ne-a, a gãndaadã la a na n sui roogo a na n tõra b tãbdã, Soaala yaa Wẽnde sẽn dok b sũuri n lebsd ned kam fãa a tʋʋm wẽna. Bãmb meng n gomde.

⁵⁷M na n yũnuga rãam: a kug-zĩidbã, a mitbã, a kombɛɛmbã, a tãnsoaben-dãmbã, a gãndaadã. B na n kẽe gõeem la b kõn nek ye. Yaa dĩm kãsenga n gomde, bãmb la dũni fãa Wẽnde.

⁵⁸Bãmb meng n le paasd woto: Babilon lal-gũbra ne a sẽn yalma wãame n leb n wã; a kʋɩlen-wogda rɩɩ bugum. Ad-y neba mi n namsda b meng zaalem! Naonga yaa nams tɩ bugum wa loog ne bala!

⁵⁹Ad noor ninga bãngd a Zeremi sẽn kõ a Seraya, a Neriya biiga, a Maseya yagenga, a sẽn wa n kẽng Babilon ne Zɩɩda dĩm a Sedesiyas. Wakat kãng tɩ dĩma sẽn dʋ a naam zaoor nan yaa kiis a naase. Wakat kãng me t'a Seraya da yaa yemsa sika naaba.

⁶⁰A Zeremi da gʋlsa sebr zugu, yell niyns fãa sẽn da na n pak Babilon. Sebr kãng la sẽn karem ka wã.

⁶¹A Zeremi yeela a Seraya: «Fo sã n wa ta Babilon, f na n zẽka f koɛɛga la f maag f meng n karem gom kãensã fãa neere.

⁶²La fo na n paasame: ‹Soaala, yãmb meng n yeele, tɩ tẽn-kãnga na n wãame la ninsaal kõn pa a pʋgẽ ye, rũng me kõn pa a pʋgẽ ye, t'a na n lebga sũ-sãang zĩ-peen-daaga, tɩ zamaana tong taaba.›

⁶³Fo sã wa karem sebrã n sɛ, fo na n baoo kugri n loe sebrã n dɩk a n lob Efrat kʋɩlgẽ.

⁶⁴[102†] F sã n wa lobd sebrã f na n yeela woto: ‹Wala sebra sẽn menem koomẽ wã, woto me la Babilon na n menem. A kõn tõog n põs yel-beed ning Soaala sẽn segl a yĩnga ye.› » A Zeremi baasa a goama woto: «Ad-y bu-zẽmba sẽn kẽesd b meng zĩig ningã, ad-y ka zĩig a to n zʋʋg pɛta la pɛt bala.»