Read SEBR SÕNGO, 1998 Zeremi 7 Bible Online

Zeremi 7 - SEBR SÕNGO, 1998 bible

Zeremi 7

¹Soaala-Wẽnd yeela a Zeremi

²t'a tɩ yals wẽnd dooga noore n moon woto: Kelg yã, Zɩɩda rãmba, yãmb fãa sẽn tũud digno-kãensa n kẽed n waoogd Soaalã, kelg-y b sẽn yete.

³Ad-y yaa maam, a Israyɛl Wẽnda n yet tɩ y tall y mens neere, la y vɩɩnd wa sẽn segde tɩ m na pa zĩ-kãnga ne yãmba.

⁴Dɩlla, da kelg-y zirẽ-be-goama ye. B vẽegda beoog n tarẽ: Soaala roogo, Soaala roogo, Soaala roogo la woto!

⁵Tall-y y mens neere, vɩɩnd-y wa sẽn segde. Neb a yiibu sã n bool taab bʋʋdo y taoore bɩ y bʋ tɩrga.

⁶Yãmb sã n ka maan sãan pãnga, bɩ kɩɩba, bɩ pʋg-kõore, yãmb sã n ka raagd pʋ-peelem soab zɩɩm zĩ-kãnga, la y sã n ka pʋgd bu-zẽmba wẽn-naandsã, tɩ yaa wẽn-naandsa pʋgb n wãad yãmba,

⁷ad-y mam na pa zĩ-kãnga ne yãmba. Y na kell n pa tẽng ninga mam sẽn dɩk al daar zãra n kõ y saam-dãmb tɩ b soog-a daar fãa yĩngã.

⁸La ade, yãmb sakdame n deegd zirẽ goama, goam sẽn ka yõodo la sẽn tudgd yãmba.

⁹Sɩda, y zuudame, n kʋʋda, n yooda, n kãabdẽ n yaool n ka pidsdẽ, n kẽnd a Baal taoore ne y maando, n pʋgd wẽn-sãamse la m yaool n ka ne bũmb ninga sẽn be yãmb ne bãmb sʋk ye.

¹⁰Y yaoondame marsã n wa m taoore, wẽnd dooga pʋga, m waoogra roogẽ la y yetẽ: «Tõnd yell manegame,» la y baas n ket n tʋmda y tʋʋm wẽna.

¹¹[12†] Yãmb sẽn getã, do-kãnga sẽn ya m waoogr zĩigã yaa wagda tigsg zĩig sɩda? La wagdem bal la m ne, ad-y m ka zoang ye. Yaa Soaala n gomde.

¹²Bɩ y kẽng zĩ-sõng ninga m sẽn da tar Silo, m sẽn da vigl m naama zaoor zĩig ningã la ges-y mam sẽn kɩt t'a lebg raboog ninga, m buud a Israyɛl yel-wẽna yĩnga.

¹³M yet-y lame, Soaala n gomde, y tʋma wẽng wa pĩnd dãmbã. M wilgame n le wilg n paase la y pa kelg ye. M bool-y lame la y pa sak ye.

¹⁴[13†] Woto wã mam na n maana do-kãnga sẽn welg toor mam yĩngã, roog ninga yãmb sẽn teeg a soab wa fãa fãa wã, roog ning m sẽn dɩk n kõ y yaab rãmb la yãmb mensã, mam na n maan-a-la wa m sẽn maan ne Silo.

¹⁵Mam na rig yãmb tɩ y menem mam taoor wa m sẽn dig y saam-biisi, a Efrayim kamba.

¹⁶La foo, Zeremi, bɩ f ra yõk m sɛɛg buud kãnga yĩng ye. Ra zẽk f koɛɛg n kelem, da pʋʋs-m nin-bãmba yĩng ye. Ra pẽdg-ma ne f pʋʋsgo tɩ m pa na n kelg-f ye!

¹⁷Fo yẽ sẽ n pa ne b sẽn maan bũmb ning Zɩɩda tẽnsa pʋsẽ, la Zerizalɛɛm soya zut bɩ?

¹⁸[14†] Kambã n dɩgsd raado, tɩ ba rãmba tugund bugum, tɩ pagba nagd zoma n na n dõos miisdu, yĩngr dĩm poaka yĩnga, la b wat ne rãam la kũun a taaba wẽn-sãamsa yĩnga.

¹⁹La woto wã yaa maam la b beegd bɩ? Soaalã n sokde. Ayo, yaa bãmb n baood yãnde la bõne n kõt b mense!

²⁰Yaa rẽ yĩng la Soaala-Wẽnd gomd woto: «Ade, m na n basame tɩ m sũura fudg n waag b tẽngã, b nebã, rũmsã, pʋtã, tɩɩsã, tẽnga kooda biisi. Bugum ning sẽn widg m sũurẽ wã ka tõe n kiis ye.»

²¹Ad Soaalã, a Israyɛl Wẽnnaama, koɛɛga, wʋk-y y maanda nemd n wãbe; naag-y yũ-nood maanda la maand a taabã n wãb y toore.

²²Mam sẽn wa n yiis y saam-dãmba Ezipt tẽnga, mam pa kõ b noor yũ-noog maoong la maand a taaba poorẽ ye.

²³Ad mam sẽn da kõ bãmb noor ninga: «Kelg-y mam koɛɛga tɩ m yɩ yãmb Wẽnde, tɩ yãmb yɩ m neba. Tũ-y sor ninga mam sẽn wilg yãmba tɩ y na paam sũ-noogo.»

²⁴La ayo, b pa kelg ye, b pa yok b tʋbr ye; b kẽna b yam, b kidba b sũuri, b tũ-la b yalemdo. B zãgsa b ges maam n wẽnemd b kãare n tees-ma.

²⁵Yãmb saam-dãmba sẽn yi Ezipt tẽnga n tãag rũnna, mam tʋma yãmb m tʋʋm-tʋmdba, m bãngdba, beoog sẽn vẽeg fãa. M da tʋmd-b lame n ka yɛɛdẽ ye.

²⁶La yãmb ka kelg ye; y ka yok y tʋbr ye; y naka y kãare; y wẽnema yɩɩga y saam-dãmba rẽnna.

²⁷Foo, Zeremi, fo na n togs-b-la gom-bãmba fãa, la b kõn kelg-f ye. Fo na n taas-b-la m toollã, la b kõn leok-f ye.

²⁸Wakat kãng marsã la f na n yeel-ba: Yãmb la buud ninga sẽn pa kelgd a Soaala, n pa kelgd Soaala-Wẽnd koɛɛga la a pa sakd b saglgo. Pʋ-peelem ka le be ye, a menema bãmb nengẽ.

²⁹Soaala-Wẽnd yeela Zɩɩda nebã: Wõrs-y y zoob-wogdã n lobe. Wõrs-y zoobd niyns sẽn wilgd tɩ y rɩka y meng n kõ Wẽndã. Dʋ-y tãmsa zutu n pʋd sũ-sãang yɩɩlle. Zɩɩda, fo yaa buudu sẽn sãamd m sũuri m ka le rat-f ye, m lob-f-la kɛɛnga.

³⁰N-yẽe! Soaalã n gomde, a Zɩɩda kamba maana sẽn ya wẽng m nifẽ. B ninga b rẽgdã, b wẽn-naandsa m dooga pʋga, doog ning m sẽn welg toore m meng yĩnga, la b rẽgem-a lame.

³¹[15†] Zɩɩda kẽedba kẽe Ben-Inom bãg-faagẽ, n me b yao rasãnde la yẽ sɛɛgẽ la b yõod b kom-pugli la b kom-dibli. Man yaool n zɩ n kos bũmb a woto, tagsg a woto zɩ n wa m yamẽ ye.

³²Yaa rẽ yĩnga la Soaala-Wẽnd gom woto: «Daar n na n wa zĩndi, tɩ b pa na n le bool tɩ Tofɛt bɩ Ben-Inom long ye, b na n boolame tɩ Tẽn-kũum longo.» Weer sẽn na n wa paoog yĩnga, Tofɛt meng n na n lebg kũuma lobr zĩiga.

³³Tẽnga rãmb na n kii ka tɛka. B na n yɩɩ yĩngr luiili la we-yũus rɩɩbo. B na rɩ b rɩɩbo tɩ ned pa tol n dig-b ye.

³⁴[16†] Mam na kɩt tɩ sũ-noog kaasgo la kilsgu buud fãa sɛ Zɩɩda sagsa pʋgẽ la Zerizalɛɛm soya zutu. B kõn le wʋm yikãad paalsa yɩɩl ye, tɩ tẽngã na n lebga raboogo.