Read SEBR SÕNGO, 1998 A zeremi seb bila 1 Bible Online

A zeremi seb bila 1 - SEBR SÕNGO, 1998 bible

A zeremi seb bila 1

¹Woto yaa a Zeremi sebre. A gʋls-a-la neb niyns Babilon dĩm a Nabikodonozor sẽn da tar n dabd yembdo. A gʋls-b lame n na n wilg-ba Soaala sẽn da yeel-a t'a togs-ba. [1] Yãmb beega Naaba-Wẽnde la rẽnd yĩnga, Babilon dĩm a Nabikodonozor na n tall-y lame n tɩ kẽes roogo.

²Y sã n ta Babilon n sɛ, y na n paa be n kaoose, n kaoos wala yʋʋm pisopoe. Dẽ poore m na le yiis-y be ne laafi.

³Bãng-y bala tɩ y sã n ta Babilon y na n yãenda wẽnd dãmba sẽn dõog ne wanzurf bɩ sãnem bɩ sẽn pees ne raado. Neba tʋkd-b-la b bãgdẽ la tẽnga rãmb rigda b taoore.

⁴Bɩ y maan gũusg neere, y me ra wa lebg wa bãmb ye la y ra bas tɩ wẽnd bãmba rabeem kẽ-y ye,

⁵y sã n wa ne poorẽ la taoore, tẽnga rãmb sẽn wõg n tar waoogre. Yeel-y bal y sũurẽ: «Soaala-Wẽnde, yaa yãmb taoor bala la d tog n wõgemde.»

⁶Ade, m malɛka yãagd-y lame la yẽ n kogend y vɩɩma.

⁷Wẽnd bãmb zelemda peesa ne raoogo. Yaa ra-pɛɛs mit tʋʋmde. B bolg ne sãnem la wanzurf me bɩ y ra bas tɩ b tudg-y ye. Ad-y b kõn gom bada.

⁸Bãmb yĩnga b rɩkda sãnem; b rɩkda sãnema tɩ ta wa b sẽn dɩkda bi-pugl yĩnga, bi-pugl sẽn nong faong yĩnga,

⁹la yaa bõn-neer la b maand n fõgneg wẽnda zugu. Tõeeme meng tɩ sẽn get-b waoogra yellã lɛɛg n dɩk wanzurf kãnga bɩ sãnem kãnga n dõog bũmb a to b meng yĩnga.

¹⁰Tõeeme menga n dɩk-a n kõ pagb niyns sẽn be-b waoogr zĩigẽ tɩ yaa yoob la b tʋʋm sõngã. Wẽnd bãmb sẽn pees ne raado n lɛɛg n bolg sãnem bɩ wanzurfã ra paamdame tɩ b bao fut n yeelg-b wa ninsaalba!

¹¹B yaool n ka tõe n zab n fãag b mens ne yõgdre la tẽngempiisem ye. Ba sã n ya fu-neeba la b yeelg-yã,

¹²b pa tõe n yẽes wẽnd dooga wubsgã sẽn lɛɛg n kõd b nenga ye.

¹³Wala tẽnga kombere, b zãada rasaar b nugẽ, rasaar sẽn wilgd tɩ yaa bãmb n so naama, la ba ya bãmb meng la nin-yoog beeg-yã, b kõn tõog tɩ b yõk a soaba n kʋ ye.

¹⁴Wẽnd bãmb kẽer zãada b nugẽ sʋʋg bɩ lare la b ka tõe n fãag b meng ne tãb-biig la wagdr ye. Yaa vẽenega tɩ b pa wẽnd ye la rẽnd yĩng me bɩ y ra waoog-b ye.

¹⁵B sẽn zaoolg wẽnd niyns b wẽnd dotẽ wã wẽnda laok sẽn wã n ka le be võor ye.

¹⁶B nenga rẽgma ne wubsgu; yaool n yaa sẽn wat-b n na waoog bãmba nao wã sẽn zẽkd wubsg ningã.

¹⁷Ned sã n beeg dĩma, b sẽbd-a lame n pag roogo. B sã n bʋ ned n paalg-a, yaa roog la b pagd-a. B maan-kʋʋdba me maanda boto: b pagd-b-la roogo tɩ wagdba ra wa fã-b n loog ye. B kong ningda kʋɩlen-tagdo, kʋɩlens sẽn maneg n sogd ne kutu.

¹⁸Wẽnd dooga rãmb widgda fitils sẽn ka tɛka la vẽenema mabgdame, mik wẽn-naandsa ka ne fitil a ye meng ye.

¹⁹F sã n data, f mamsda wẽn-naandã ne wẽnd dooga ra-paad-bɛdã. Yɩnga ket n wẽndame, la pʋgẽ wã, yõgdr kõdga zãnga. Tẽnga bõn-yoodã sẽn wãbd b futã n lɛɛg n dɩt wẽn-naanda menga, la sẽn wat-b n na n waoog-ba ka ne rẽnd ye.

²⁰Wẽnd dooga bug-zõosã lɛɛg n soba b nengã.

²¹Zãnkiti, sɩlaala la luiili a taaba wat n zao-la b bãgd la b zutu. Wakat ning menga yaa yũusi.

²²Tũ-y rẽ fãa n bãng tɩ b ka wẽnd ye la b pa tog ne y waoogr ye.

²³Sã n ya sãnema sẽn bolg b yĩngã n paas b neerma, ka bãmb n tõe n maan bũmb tɩ neerem kãng ra boog ye. Sãnema yẽnega boaagẽ n dõog-ba la b pa tol n wʋm toog ye.

²⁴Ligd ka tɛk la b yiis n na n dõog-ba, la bõn-kãseng n paooge; ad-y bũmb ka be n wilgdẽ, ba bilfr menga, tɩ b tara vɩɩm ye.

²⁵B ka tõe n kẽn ye, tɩ b kong n tʋkd-b bãgdẽ. Rẽ n kõt neba fãa kaseto tɩ b ka tar võor ye. Rẽ n pʋs n ningd-b yãnde neb niyns sẽn get-b yelle, b wẽnd dotẽ wã.

²⁶Bãmb nin-yend lʋɩ-yã, dẽnd b wudg n yik-a. B yik-a n yals a nao zug me a ka tõe n luk a naoor ye. A sã n kɩlle a ka tõe n le roog ye. Kũuna sẽn tar n watẽ wã, wat n kõta bõn-kɩɩmse.

²⁷Rũmsa sẽn koot b yĩngã, maan-kʋʋdba lɛɛgd n koosda b nemdã la ligd kãng kẽeda bãmb korgẽ. Maan-kʋʋdba pagb kẽer meng zãgsda rɩk nemd kãng n kõ naong la koms rãmba; b kʋɩsd-a lame n bĩngdẽ.

²⁸Pagb niyns sẽn da ka tog n sɩɩs nemd kãensã tɩ b yãenda b kiuug bɩ b roga paalem, n nan ka yɩlgã, baas n sɩɩsd-b lame. Bɩ y tũ rẽ me n bãng tɩ b ka wẽnd ye la b pa tog tɩ y waoog-b ye.

²⁹So-bʋg la d paam-yã n na n bool tɩ wẽnde te-bãmba sẽn pees ne raado n maneg n bolg ne sãnem bɩ wanzurfã? Ka pagb n so taoor b wẽnd dotẽ wã bɩ?

³⁰Wẽn-naandsa wẽnd dotẽ, maan-kʋʋdba zĩi ne fu-kʋɩdse; b zut la toeems kõogame, pugl ka be b zug ye.

³¹B wiisda wa rũmsi b bõn-naandsa taoore, la yaa wa kʋʋr dɩɩb la b rɩta.

³²Bãmb n yeesd b wẽn-naandsa futã n yeelgd b pagb la b kamba.

³³F maand wẽnd kãensa neer bɩ wẽnga, b kõn tõog n dol wẽnga bɩ neerã, wala b sẽn ka tõe n paas dĩm naam bɩ n sik-a a naam zaoorẽ.

³⁴B pa tõe n yãend ligd n kõ ned t'a lebg rakãagr ye, F sã n wẽen la f kãab b bũmbu n yaool n ka pids f kãabgo, b kõn sok-f ye.

³⁵B ka tõe n fãag ned ba a ye ne kũum ye. B pa tõe n fãag bi-bilfr pãn-tõog soab nugẽ ye.

³⁶B pa tõe n puk zoang nif ye, b pa fãagd ned ne yɩɩr ye.

³⁷B pa tõe n zoe pʋg-kõor nimbãanega, b pa tõe n maan kɩɩb bil neer ye.

³⁸Ra-giis bãmba sẽn pees n bolg sãnem bɩ wanzurfã ka são kuga sẽn vigs tãmsa zut ye. Sẽn get b yella na ki ne yãnde!

³⁹Ned maanda wãna n wa tags la a saag n yeel tɩ bãmba yaa wẽnd dãmba?

⁴⁰Faoora sẽn waa n pid faoor mengã, yaa Babilon dãmba sẽn mi n yãend muka, n tɩ wa ne a Bel, t'a Bel sõng muka t'a gome. A Bel pa wʋmd b sẽn yet t'a maan bũmb ning meng ye la a lakda zelemde.

⁴¹B kosg ka pit ye, la bũmb pa sagend-b tɩ b bas wẽnd a woto buud pʋgb ye. B yalemda labsa.

⁴²Sã n ya pagbã, b ningda b zug wĩiri la b yõogd tɩdare.

⁴³Rao sã n looda n bool bãmb nin-yend tɩ b yo, a babsda a yak-poaka b sẽn pa ro wã n ning-a yãnde. B tãagdame n wilg-a tɩ b sẽn pa yo ne-a wã bɩ a bãng tɩ yaa wẽndã n pa rat-a.

⁴⁴Bũmb ning fãa b sẽn togsd wẽn-naandsa poorẽ wã, fãa yaa zirẽ-beedo. Ned maanda a wãna n wa tags la a saag n yeel tɩ b yaa wẽnd dãmba?

⁴⁵Ad-y yaa tʋʋm-mitbã, sẽn peesd-b kugã bɩ raadã, sẽn ya-b yõgsã, ad-y yaa bãmb tʋʋmde. B teka tʋʋm-mitba sẽn yet tɩ b tek zĩig ninga. B tɛka yaa kõ kaseto tɩ tʋʋm-mita tõoga a tʋʋmde.

⁴⁶Sẽn dõog-b wẽn-naanda yõor ka na n yɩ wok n yɩɩg neb a taab ye.

⁴⁷Ninsaal nug sẽn tʋm bũmb ningã maanda a wãna n wa lebg wẽnd dãmba. B loogdame n bas b kamba ne belsem-belsem, n bas-b ne bũmb sẽn na n ningd-b yãnde.

⁴⁸Maan-kʋʋdba sã n wʋm tɩ b gomd zabr yelle, n gomd tẽn-kũum yelle, ad-y b yẽsda ne taaba n bao b sẽn na n solg zĩig ninga, bãmb ne wẽn-naandsã.

⁴⁹Wẽn-naandsa sã n ka tõe n zãag zabr la tẽn-kũum, bõe n lut tõnd ninsaalba nina tɩ d ka ne tɩ ka wẽnd dãmba?

⁵⁰Sẽn be bal yaa d gãde tɩ raada sẽn pees n bolg ne sãnem bɩ wanzurfa yaa belsem-belsem bala. Dĩm dãmba ne b soolma rãmb tog n gãdame bal tɩ yaa ninsaal nug tʋʋmde, bũmb ka be b nengẽ sẽn wẽnd bola wẽndlem ye.

⁵¹Sã n ya woto yaa vẽeneg neba fãa gill yĩnga tɩ b ka wẽnd ye. Ãnda n pʋs n na n zãgs dẽ reegre?

⁵²Wẽnd-bãmb pa tõe n yãend dĩma n kõ tẽng a ye rãmb ye. B pa tõe tɩ saag ni ninsaalb yĩng ye.

⁵³B pa tõe n kẽ bʋʋd-n-taas sʋka n wilg bʋʋma soab akɩk ye. B pa tõe n sõng bʋʋda sẽn bʋ n bõn a soaba ye. B pãngã,

⁵⁴a ka ta gãabd sẽn yɩgd lam-lama ye. Wẽn bãmba sẽn pees ne raado n bolg ne sãnem bɩ wanzurfã, bugum sã n zomb b roogã, maan-kʋʋdba na n zoeeme n tɩ bao zĩig n kẽ tɩ b wẽnd dãmba mens na n yaool n pa be n dɩ bugum wala sugra ra-paadsã.

⁵⁵Bɛɛba rĩm a ye ne a tãb-biis sã n kaoog zabr ne-ba, b kõn tõog n yals a taoor ye.

⁵⁶Woto wã ned maanda a wãna n tags la a saag n yeel tɩ bãmba yaa wẽnd dãmba? Wẽn-naandsa sẽn pees ne raado n lɛɛg n bolg ne sãnem bɩ wanzurfã ka tar dabaar n põsd wagdr bɩ fãad ye.

⁵⁷B sã n ta bala, yaa b sãnema bɩ b wanzurfa lagsgo, yaa b futa yeesgo, n yees n looge ne. Ka wẽn-naandsã n na n tõog n fãag b mens ye.

⁵⁸Sã n yet tɩ b sõdg sẽn be yõodo, ad d na ning sʋka dĩm sẽn maand raood zabr zĩigẽ; d na ning sʋka laok ned sẽn tar tʋmd a tʋʋmde tɩ kẽnda; d na ning sʋka kʋɩleng sẽn gũud b sẽn pag rooga pʋga; d na ning sʋka rĩma rooga pʋg ra-luka. Bãmb fãa tara võor la yõodo n yɩɩd belsem-belsem wẽnd dãmbã.

⁵⁹Wĩntoogo, kiuugu la ãds kõta b vẽenem, la b wilgda b yõoda sẽn be zĩig ninga.

⁶⁰Sa-yãgemdo sã n yãgda, b neeme tɩ ka zaalem ye. Yaa boto me ne sobgo, sẽn fʋʋsd a sẽn paamẽ.

⁶¹Boto me ne sawatã, Wẽnd sã n yeel-b tɩ b lud tẽngã, b sẽn kõ-b noor ninga la b naagd taab n deege.

⁶²Soaala sẽn be yĩngri n toond b bugma t'a rɩt tãmsa la gooda me reegda b sẽn kõ-a noor ningã. Wẽneg ning b sẽn kõt wẽn-naandsa menga ka lebd b sẽn tõe n tʋm tʋʋmd ninga waar ye.

⁶³Dẽ me yaa vẽenega tɩ b pa tõe n mams-b ne wẽnd ye. B pa tõe n kao bʋʋdo, b ka tõe n maan ninsaalb neer ye.

⁶⁴Dẽ me yaa vẽenega tɩ b pa wẽnd dãmb ye la b ka tog ne d waoogr ye.

⁶⁵B pa tõe n bark dĩma, b pa tõe n alk-a ye.

⁶⁶B pa tõe n maan wẽnd makr yĩngr ye, b pa tõe n n yãg wa wĩntoogo, b pa tõe n maan vẽenem wa kiuug ye.

⁶⁷We-rũmsa meng yɩɩd-b lame, tɩ bãmb tõe n zoeeme n tɩ soonde n fãag b yõore.

⁶⁸Dẽ fãa kõt-d-la kaseto tɩ b ka wẽnd dãmb ye. Dɩlla b pa tog ne d waoogr ye.

⁶⁹Yoag pʋʋgẽ, koaaba nakalbtong ka tar yõod ye. Boto me ne nin-bãmba wẽn-naandsã, raad sẽn pees n lɛɛg n bolg ne sãnem bɩ wanzurfu.

⁷⁰Tõe n le mak-b-la ne gõaag tuugu sẽn be zẽedẽ, tɩ luiili buud fãa tõe n wa zaond a zugu, bɩ ned sẽn ki tɩ b rɩk a yĩngã n tɩ lob yao-likẽ.

⁷¹Y sã n yãend b fu neebã, b gĩ-bãanesa futã sẽn lebg põosgã, y na bãng tɩ ka wẽnd dãmb ye. La põogrã, ka futa bal ye, bãmb meng la zũnzũura na n mok wa mogdo tɩ b lebg tẽnga bɛɛb laado la a yãnde.

⁷²Ned sẽn kẽnd n ka waoogd bõn-naande n pʋgd Soaala bala, são sẽn waoogda wẽn-naande. Sẽn ka waoogda wẽn-naand tɩlga yãnde.