Read SEBR SÕNGO, 1998 A Barʋk 1 Bible Online

A Barʋk 1 - SEBR SÕNGO, 1998 bible

A Barʋk 1

¹Sebr kãnga gʋlsa Babilon. Yaa a Barʋk n gʋls-a. A Barʋk yaa a Neriya biiga, a Maaseya biiga, a Ilkiya biiga, a Asadiyas biiga, a Sedesiyas biiga.

²Sebr kãnga gʋlsga raare n tõkd yʋʋm a nu, Babilon dãmba sẽn kẽ Zerizalɛɛm, n yõog-a bugum. Yɩɩ kiuug a nu soaba raar a yopoe soaba.

³A Barʋk karma sebrã Zɩɩda naab a Zoakim biiga a Yekoniya taoore; yɩɩ buudã fãa taoore, tɩ buuda tigimame n na n kelg sebra karengo.

⁴Neb niyns fãa sẽn da kẽed-b Babilon, Sud kʋɩlga noor, da waa gilli: kug-zĩidba, na-biisi, zags kãsem dãmba, buuda zãnga.

⁵Neba da yãbda Naaba-Wẽnd taoore, b ra loe b noor n tar pʋʋsgo.

⁶B loba ligdi, tɩ ned kam fãa kɩs waa a sẽn tare. B toola ligd kãng Zerizalɛɛm;

⁷b tool-a-la maan-kʋʋda, a Zoakim, a Ilkiya biiga la a Salum yagenga. Ligda toola yẽnda la maan-kʋʋdba, la buuda sẽn da be ne-a, Zerizalɛɛm.

⁸A Barʋk da zoe n paam n deega Soaala zaka teedo, Siwã kiuuga daar piig soaba, n na n kɩt tɩ b tall-ba n leb Zɩɩda tẽnga. Teedã da yaa wẽnd doogẽ wã la b ra kẽe n zɛ-ba. Te-bãmb yaa wanzurf lagdã, Zɩɩda dĩm a Zoziyas biiga, a Sedesiyas, sẽn da kɩt tɩ b kudi,

⁹Babilon dĩm, a Nabikodonozor, waa n kãag Zerizalɛɛm dãmba n looge. A talla a Zoakim, n paas na-komse, nus-tʋʋm-tʋmdba, kug-zĩidba, la zãma wã n kul Babilon.

¹⁰Dẽ la pa-weta gʋls Zerizalɛɛm dãmba woto: Ade tõnd toonda yãmb ligdi. Rɩk-y ligdã n da tɩdare, n da rũmsi, n kʋ yũ-noog maando, n kos yel-wẽna sugri. Segl-y kũuni n tall n wa Soaala Wẽnnaam maan-kugra zugu.

¹¹Pʋʋs-y Babilon dĩm a Nabikodonozor, la a biiga a Baltazar yĩnga tɩ b yõor yɩ wok tẽng zugu.

¹²Pʋʋs-y Soaala Wẽnd tɩ b kõ-d pãnga la b kõ-d sũ-noogo la d vɩɩnd Babilon dĩm a Nabikodonozor maasmẽ n vɩɩnd a biig a Baltazar maasmẽ. Pʋʋs-y tɩ b soog-do n kaoos la d dɩ b sõm.

¹³Pʋʋs-y Soaala, d Wẽnnaam, d mens yĩnga, tɩ bala tõnd beeg-b lame, tɩ b sũ-puur ket n pʋgd tõnd al ne rũnna.

¹⁴Sebrã tõnd sẽn toond yãmbã, bɩ y karem-a neba fãa taoore, Soaala zak pʋga, sẽgda kibsa raare bɩ daar ning sẽn toge. Karem-y sebra neba taoore. Yaa d kongra la d wilgda.

¹⁵Ad y sẽn na n gom to-to: Tõnd Soaala la d Wẽnnaam pida ne zemsgo, kegr ka b nengẽ ye. Yaa ne d mens la d tog n zabe. Yãnd tar-d-la rũnna, yãnd tara Zɩɩda la Zerizalɛɛm dãmb fãa.

¹⁶Yãnd tara d nanamse la d na-biisi, d maan-kʋudba, d bãngdba, d ba rãmba.

¹⁷Tɩ bala tõnd maana wẽng Soaala taoore,

¹⁸d tõdga b noore, d ka kelg b koɛɛg ye la d ka tũ bãmb sẽn wilg-d ye.

¹⁹Soaala sẽn yiis d ba rãmba Ezipt tẽng tɛk n tãag rũnna, tõnd maana tudgri n ka reeg Wẽnnaam d Soaala gomd ye.

²⁰Rẽ n so tɩ sũ-sãang la yɩɩr pʋgd tõnd n ka viigdẽ ye, rẽ fãa d Wẽnnaam da pĩnd n togsa b sõgen a Moyiiz, b sẽn yiis d yaab rãmba Ezipt tẽnga raare, n kõ-d tẽng sẽn bund bĩisim la sɩɩdo la ket n yaa woto ne rũnna.

²¹Tõnd ka kelg Soaala Wẽnnaam koɛɛga, la bãngdba b sẽn da tʋma goama ye.

²²Tõnd ned kam fãa tũ-la a sũur daab wẽnse, n tʋm Soaala Wẽnnaam sẽn kisi.