Read SEBR SÕNGO, 1998 A Barʋk 2 Bible Online

A Barʋk 2 - SEBR SÕNGO, 1998 bible

A Barʋk 2

¹Yaa woto, Soaala la y taas yel-beed ninga y sẽn da kãab tõndo, d bʋ-kaoodba sẽn zãad Israyɛl, d nanamse la d taoor dãmba, Israyɛl la Zɩɩda nebã.

²Zerizalɛɛm sẽn paam toog ningã b ka yãe a taar sa-gãna tẽngr ye. A Moyiiz noora sebr pʋga b da gʋlsame:

³Tõnd wa n kong n wãbda d kom-dibli la d kom-pugli nemdo.

⁴N paasme, Soaala ning-d-la nanams niyns sẽn da gũbg-b tõndã nusẽ tɩ b soog-do, tɩ d yãe yãnde la yaoolgo, Soaala sẽn da sẽeg-d tẽns niynsa pʋgẽ.

⁵Tõnd konga naam n lebg yemse, tɩ tõnd da beega Wẽnnaam, d ka kelg b koɛɛga ye.

⁶Tõnd Wẽnnaam yaa zemsg soaba. Sã n ya tõnd ne d yaab rãmba sẽ, yãnd n dog d zugu al ne rũnna.

⁷Yel-beed buud fãa Soaala sẽn da kãab tõndã, d yãend-b lame.

⁸Tõnd ka yõk Soaala sɛɛg ye, d pʋga d yam wẽnga raabo.

⁹Rẽ la Soaala bas tɩ yel-beed buud fãa taase. Tɩ Soaala yaa zemsg soaba. Yaa sẽn tog la b noora yet tɩ d maane bala.

¹⁰La tõnd yaool n ka kelg b koɛɛga la d ka tũ b noyã ye.

¹¹Soaala, Israyɛl Wẽnde, yãmb kenga y nugu n tus y nebã n yiis Ezipt tẽnga. Y maana wẽnd makr dãmba la yel-bãna. Y wɩka y kanga n wilg y pãn-kẽenga, pãng sẽn labs wala a sẽn ket n yaa a soab rũnna tɩ d neẽ wã.

¹²Dũnna d deegda d kongre. D yɩɩ tõatba, d tõdga y noore.

¹³Y sẽn tɩ lob tõnd bu-zẽmba tẽnsẽ, d kella bilfr bala. Zãag-y y sũ-puurã ne-do.

¹⁴Soaala, ges-y y menga sẽn yaa a soaba la y kelg d pʋʋsgo, la y kit tɩ sẽn kãag-b tõnd n wa ka wã, zã-d ne bʋgsem.

¹⁵Woto dũni wã gilli na bãng tɩ yãmba, d Soaala, la tõnd Wẽnnaam, b na bãng t'a Israyɛl buudu, yãmb welg-a-la toore.

¹⁶Soaala, zĩnd-y y yĩngr zag-sõngẽ n ges-do, n bas tɩ y yama kẽ-do, n kelg-d neere.

¹⁷Ypk-y y nini la y gese, Soaala. Ad-y ka bʋg-tẽng kɩɩmsã n tõe n pẽg y ziir la b kils y zemsg ye. Bãmb yõor ta-la a tɛka.

¹⁸Sẽn na n bãnga n pẽg y ziir la a kils y zemsgo, yaa ned ninga sẽn tara toogo, sẽn sura n kẽnd ne komslem n ka mi a sẽn beẽ ye, tɩ kom namsd a yĩnga, t a nin menemdẽ, tɩ kom tar a sɩɩga, ad-y yẽ soab n waoogd Soaala ne zemsgo.

¹⁹Ad-y tõnd sã n wat y taoore, Soaala Wẽnde, n na n yõk y sɛɛga, d ka lʋɩɩsd taoore d ba rãmba la d dĩm dãmba vɩɩma yõod ye. Ayoo!

²⁰D tẽegdame bala tɩ yaa tõnd la y tees yã n gom y sũ-puura goama, goam niyns y bãngdba sẽn da reeg n taas-d woto:

²¹«Sulg-y y zug n yɩ Babilon dĩma yemse, tɩ m na kell n n bas-y y tẽngẽ, tẽng ning m sẽn kõ y ba rãmbã.

²²La y sã n ka kelg Soaala saglgã n tũ Babilon naab raabo,

²³ad Zɩɩda tẽngã la Zerizalɛɛm pʋga, mam na n kɩtame tɩ sũ-noog yɩɩlle la kɩdeng yɩɩll sɛ, n kɩt tɩ pʋg-sɩd yɩɩl la pʋg-paal yɩɩl sɛ. Tẽnga gill na n lebga raboogo, a na n yɩɩ vɩʋʋgo, tɩ ned ba a ye ka le ket a pʋgẽ ye.

²⁴La tõnd ka kelg yãmb saglg ye tɩ y ra yeel-d lame tɩ d sulg d meng Babilon dĩma taoore, Dẽ me la y pids y sẽn da pĩnd n togse tɩ bãngdba reeg n taase, la woto la b ra gomda: b na n gaasa d nanams la d ba rãmb yaado n bugs b kõaba.

²⁵D yaab rãmba la d nanamsa vɩɩm baasa wẽnga. Kom kʋ-b lame, sʋʋg kood-b lame, b tɩ paa pa-weere. B yiisa b yĩnsa yaadẽ, n bas-b ne wĩntoog bugum la yʋng waoodo.

²⁶Sã n ya roog ning b sẽn me y waoogr yĩngã, d nee a sẽn lebg a soab rũnna, a Israyɛl la a Zɩɩda tʋʋm-wẽna yĩnga.

²⁷La ade, Soaala Wẽnnaam, yãmb yaool n zã tõndo ne bʋgsem, n kũm d nimbãanega,

²⁸wala y sẽn da pĩnd n kɩt tɩ y yamba a Moyiiz togse, daar ning y sẽn kɩt t a gʋls y noya Israyɛl kamba taoore. Y yeel-a lame t'a togs woto:

²⁹Yãmb sã n ka kelg mam koɛɛga, ad y nebã sẽn ket n ya kʋʋng rũnda wã, na n sɛɛme n kell bilf bala, bu-zẽmba sʋka, m sẽn na n tɩ lob-y.

³⁰Mam pĩnd n miime tɩ y ka na n kegl-m ye, tɩ y zug yaa koɛɛnga, la y yembda tẽngẽ, y na paam tags-sõngo,

³¹la y na reeg tɩ maam la y Wẽnde la y Soaala. M na yaool marsã n kõ-y yam sẽn tagsde la tʋb sẽn kelgde.

³²Y yembda tẽngẽ, y na n pẽg-m ne yɩɩla la y na tẽeg m sẽn ya a soaba, y rũnna la beoog Wẽnda.

³³Y na yãend so-wẽngã, y yaab rãmb sorã sẽn kẽes-y zĩig ninga, b sẽn waa n yik zabr ne maam, b Soaala. Wakat kãng marsã y na bas y wẽnema, y kõn le yɩ tõatb ye.

³⁴Wakat kãng marsã la m na n tall-y n leb tẽng ninga mam sẽn kãab y ba rãmba, a Abraam, a Izaak la a Zakoob. Y na tɩ soog tẽngã. B kõn bas tɩ y buuda woogd n dabd ye, m na n yalg-a lame t'a yɩ bu-kãsenga.

³⁵M na n le lɛɛg n yõga ne yã zood sẽn kõ sɛ. Woto mam na n yɩɩ yãmb Wẽnde tɩ yãmb yɩ m buudu. M kõn le tall n buud a Israyɛl n zãag ne m sẽn kõ-a tẽng ninga ye.»