Read SEBR SÕNGO, 1998 A Barʋk 3 Bible Online

A Barʋk 3 - SEBR SÕNGO, 1998 bible

A Barʋk 3

¹Soaala, Pãn-kẽeng Naaba, Israyɛl Wẽnnaam, yaa ne sũ-sãanga la ne pɛlen-yɩka la d kelemd n boond yãmba.

²Kelg-y-do, Soaala, maan-y nimbãan-zoeere, tɩ d beega yãmba.

³Sã n ya ne yãmba, y rɩta naam sẽn kõn sɛ. Tõnd nengẽ wã, d tara meneng bala.

⁴Soaala, Pãn-kẽeng Naaba, Israyɛl Wẽnnaam, kelg-y kɩɩmsa pʋʋsgo; kelg-y neb niyns sẽn beeg-b yãmbã kamba pʋʋsgo. D ba rãmba ka kelg Soaala, b Wẽnnaam, koɛɛg ye: rẽ n so tɩ toog tar tõndo.

⁵Da tẽeg-y d ba rãmba beegr ye. Marsã wã, tẽeg-y tɩ y yaa pãng soaba la y pa rat y yʋ-sãang ye.

⁶Sɩda yãmb la Soaala Wẽnnaam, la d datame n balem yãmba, Soaala.

⁷Yãmb ninga rabeem tõnd sũurẽ tɩ d pẽgd y yʋʋre. D datame n balem yãmba, d yembd tẽngẽ, al yɩɩga, tɩ tõnd zãaga d sũur ne wẽnem ning sẽn kɩt tɩ d ba rãmb beeg yãmba.

⁸Ne rũnna fãa tõnd ket n sẽega bu-zẽmba sʋka, n lebg yãnde la yaoolg bũmbu. Ad-y tõnd paalga bʋʋdo d ba rãmba beegr yĩnga; bãmb sɩd da laka b mense ne Soaala, d Wẽnnaama.

⁹Israyɛl, kelg vɩɩm noya, yok f tʋbre n kelg, n paam n zulg f bãngre.

¹⁰Israyɛl, yaa bõe yĩnga la fo be bɛɛb tẽngẽ, n na n kʋʋl tẽn-zãorgẽ,

¹¹n dẽgem f meng ne kɩɩmse, tɩ b sõt foom n naagd neb niyns sẽn loog-b bʋg-tẽnga?

¹²Ad yaa f sẽn bas yam vẽenem sore.

¹³Fo sã n da tũẽ Wẽnnaam sore, fo ra na zĩnnẽ daar fãa ne laafi.

¹⁴Bao-y yã, Israyɛl kamba, bãngra sẽn beẽ, pãnga sẽn beẽ, yam sẽn beẽ, n tõog n bãng vɩɩma sẽn beẽ. Yãend-y sũ-nooga la laafi wã sẽn beẽ.

¹⁵La ãnna n yãe yam zulung sẽn solgẽ? Ãnda n kẽe a laoga roogẽ?

¹⁶Yaa tẽnga nanams bɩ? Yaa sẽn tõe n wõr-b we-rũn-toosa bɩ?

¹⁷Yaa sẽn gʋʋnd-b weooga luiili bɩ? Yaa neb niyns sẽn ka mi b paoonga sẽn tek zĩig ninga bɩ? Yaa sẽn samd-b wanzurf la sãnema la b paamd tɩ neba fãa kẽed-ba bɩ?

¹⁸Sãnd ka tʋʋm mitba sẽn sɛt b pãng ne wanzurfa rõogrã! Ad-y b pa mi b sẽn dõoga sẽn tʋgd zĩig ning ye.

¹⁹B wẽnegd n menemame, Yĩmbu tãng la b rʋda, tɩ teed a taab wa reeg b zĩiga.

²⁰Kom-yaoos rogame, n vɩɩnd tẽng zugu; la b ka yãe bãngr sor n dɩk ye.

²¹B pa yãend sor ning b sẽn na n dɩk n paam n ta-a ye. B ka mi a sẽn yal ye. B sẽn dog kamb niynsa meng ka yãend b sẽn da tũud sor ninga ye, b bʋda moogo.

²²Kanaã tẽnga rãmb ka wʋm yam zulunga kibar ye. Tema tẽng rãmb me ka yãend-a ye.

²³A Agar yagensa bao-a-la tẽng zugu n pa yãend-a ye. Madiã la Tema lɛɛbdba, b kʋdemda mitba, sẽn baood-b n na n bãng bũmb fãa võora, ka yãend sor ning b sẽn na n dɩk n paam n ta-a ye.

²⁴Gese, Israyɛl, ad dũni wã sẽn ya Wẽnnaam zaka labsa; ad Soaala soolma labsa.

²⁵A ka tar toaag ye. A zãndame tɩ ka tõe n paam n mag ye.

²⁶A pʋgẽ la nin-wobda rog yã; b yʋʋr pĩnd n yii al sɩngrẽ, b woglma ra taa woglem zĩiga, n ya zabd-mitb gilli.

²⁷La Wẽnnaam yaool n ka yãk bãmb ye. Wẽnd ka wilg-b bãngr sor ye.

²⁸B loogame tɩ b ka paam bãngr ye, b yalemdã n kẽes-b moogo.

²⁹Ãnda n dʋ sa-gãnẽ n sog yam, n tak-a n sik tẽnga?

³⁰Ãnda n dʋʋg mogre n na n gẽes-a la a yiis a sãnem n da-a?

³¹Ned ka mi a sor ye. Ned ka mi a so-buk ye. Ka tõe n bãng sẽn tũud zĩig ning n paam-a ye.

³²Soaala sẽn mi bũmba fãa wã, mii yam zulung sẽn yaa a soaba. B mi-a lame tɩ b pida ne bãngre. Woto b tõog n kõo tẽnga nenga, la neng sẽn na n sakd gesg daar fãa. B pids-a-la ne rũmsi.

³³Bãmb n tʋmd vẽenem la a tata b sẽn datẽ. La b sã n yeel-a t'a lɛɛg n wa, a sakd n waame tɩ lebg yʋngo.

³⁴Ãdsa yɛsa b zĩigẽ n yagd ne sũ-noogo.

³⁵Soaala sẽn yet tɩ b sɩng yãgbo la b sẽn likd b menga. Ned kam fãa wata ne a vẽenem tɩ b Naanda sũur ya noogo.

³⁶Sẽn naana bãmbã n yaool n naan tõnd me, la b pa tar taar ye.

³⁷Bãmb n tuk bãngra sore la bãmb n wilg-a b yamba a Zakoob, la bãmb n wilg-a b bi-nongr a Israyɛl.

³⁸Tũu boto marsã tɩ b tõe n yãend-a tẽng zugu, tũu boto t'a wa ti a zak ninsaalb sʋka.