Read SEBR SÕNGO, 1998 A Barʋk 4 Bible Online

A Barʋk 4 - SEBR SÕNGO, 1998 bible

A Barʋk 4

¹Sẽn kõt-a tõnd yam zulunga yaa Wẽnnaam noorã, b noora sẽn ka teemdã. Yam zulunga la noora sebrã. Sẽn tũuda noorã dɩka vɩɩm sore. Sẽn bʋdga n bas noorã rɩka kũum sore.

²Lebg-y n wa-y yã, Zakoob yagense! Wẽnemd-y n gãd noorã tɩ yaa vẽenem sor pʋg la y na n sɩng kẽnde.

³Da bas-y tɩ ned a to wa soog y pʋɩɩra sẽn ya sõnga ye. Da rɩk-y y zu-noogã n kõ bu-zẽnd ye.

⁴Israyɛl kamba, ad tõnd la zu-noog rãmba tɩ sẽn noom Wẽnda la d zãad d nugẽ!

⁵M gomda ne mam nebã: m gomda ne a Israyɛl bu-kellã: keng-y y sũuri.

⁶B dɩka yãmb n koos ne bu-zẽmba, la ka y menesgo la b da rat ye. Wẽnd sã n bas yãmb bɛɛba nugẽ, yaa y sẽn puug b sũurã.

⁷Yaa y sẽn kʋ maando, la maanda ka kʋ bãmb yĩng ye, kʋʋ wẽn-naands yĩnga. Y maandã n puug y Naanda sũuri.

⁸Yãmb yĩma rũnda la beoog Wẽndã. Sẽn wuba yãmba, Zerizalɛɛm y ma sõnga sũur la y sãam wʋsgo.

⁹Zerizalɛɛm yãenda Wẽnd sẽn puugd b sũura to-to ne yãmba la a kelma woto: «Kelg-y m koɛɛga Siõ yagse, Wẽnd basa yel-beed tɩ lʋɩ m zugu.

¹⁰Ka-sɩng-kõn-zĩnd-sɛɛb Wẽndã tonga m kambã m nifẽ tɩ b rɩk yembd sore. M kom-dibli la m kom-pugli looga pa-weere.

¹¹Yaa ne sũ-noog la m da wub-ba la marsã yaa ne sũ-sãang kãseng la m ne-b tɩ b looda.

¹²Bɩ ned da saag n noog a sũuri, tɩ m ka le tar sɩda la m ka le tar biig ye. Mam zĩ-la m ye, m kamba beegr yĩnga, tɩ b lak n basa Wẽnnaam sorã.

¹³B ka reeg b Wẽnda noor ye, b pa kẽn wala b sẽn da wilg-b ye. B pa rɩk so-tɩrg ning Wẽnd sẽn da wilgd-ba ye.

¹⁴Wa-y wɛ, Siõ yagse! Tẽeg-y m kom-dibli la m kom-pugli wã sẽn wʋk n loog yembda yelle! Ka-sɩng-kõn-zĩnd-sɛɛb Wẽnda modga m kamba tɩ b rɩk yembd sore.

¹⁵Ad-y sẽn tar-b bãmb n digd yembdã, yaa neb sẽn yit yɩɩga, neb sẽn ya yaare, sẽn gomd gãgnende, n ka mi nin-kẽem waoogre, n ka zoet bi-bilf nimbãaneg ye.

¹⁶B looga ne pʋg-kõor kom-nongdse, b looga ne a kom-pugli n bas-a a ye tãa.»

¹⁷Sã n ya maam, m maanda a wãna n sõng yãmba, m kamba?

¹⁸Ned ninga sẽn toola yãmb yel-beedã, nin-kãng n tõe n tak yãmb n gʋsg y bɛɛba nusẽ.

¹⁹M kamba, loog-y y loogre. Mam yẽ na n pa ka m yembre, m yembr zãntãa!

²⁰Mam yeega m sũ-noog fuugu, n yeelg sũ-pa-noang kʋɩdse. M vɩɩma lebga m nak-n-kelem, n nak n kelem Ka-sɩng-ka-sɛɛb soaba Wẽnde.

²¹Keng-y sũya, m kamba. Tees-y Wẽnd n kelme. B na fãag-y sẽn dat-ba n maan-y pãnga nusẽ, sẽn yaa y bɛɛba nusẽ.

²²Mam gẽega fãagre a Ka-Sɩng-kõn-zĩnd-sɛɛb soaba nengẽ. M gũudame tɩ b wa fãag yãmba. M zoe n kɩdemda sũ-noog tɩ m miime tɩ sẽn fãagda yãmb rũnda la beoogã, na n zoe-la y nimbãanega.

²³Yaa ne sũ-sãanga la ne nintãm la m yãe y loogre. La Wẽnnaam na n le lebs-y-la maam daar fãa yĩnga. Na yɩ sũ-noogo la kɩdeng daare.

²⁴M yagsa nee rũnna y sẽn loogd pa-weere. La yɩ bilfu b na yãend fãagr ning y sẽn na n paam Ka-sɩng-kõn-zĩnd-sɛɛb soaba nengẽ.

²⁵M kamba, sak-y tɩ Wẽnd puug b sũuri. Y bɛɛba namsd-y lame la yɩ bilfu y na yãend b sẽn lʋɩ n gãe la y naoor na teeg b yubla:

²⁶M kamba sẽn nan ka tõe toogo, ad-y yaa so-rʋd la y rɩk n looge; b looga ne yãmba wa rũmsi bɛ sẽn paam n fã.

²⁷Keng-y sũya, m kamba, tees-y Wẽnd n kelem. Bãmb sẽn loog ne y pa-weerã ka tõe n yĩm y yell ye.

²⁸Y waa n kõ-la y meng yam n bʋdg Wẽnd sorã. Modg-y naoor piig marsã n lɛɛg n wa bao b zĩiga, n yãend b nenga.

²⁹Bãmb n yiis yel-beedã n tees yãmba la b na wa n fãag yãmb, la y na lang sũ-noog sẽn ka be sɛɛbo.

³⁰Keng f sũuri, Zerizalɛɛm tɩ sẽn kẽesa foom b tʋʋmnẽ wã na n wa maasa f sũuri.

³¹Yell na n paka sẽn nams-b foomã, sẽn yãend-b fo lʋɩɩse n kɩdemdẽ wã, yell me na n paka bãmba.

³²Yell na n paka tẽns nins sẽn kẽes-b fo kamba yembdo. Yell na n paka tẽng ning me sẽn waa n wʋk f kambã n loogã.

³³Babilon da nooga a sũuri a sẽn yãend f lʋɩɩse, a ra kɩdma sũ-noog, yel-beeda sẽn waa n dɩt fooma. A sũ-beeda na yɩɩg a sũ-noogo, a sã n wa mik tɩ ya yẽ meng n wãa n dɩga.

³⁴A maanda wilg-m-menga a kẽedba sẽn yɩɩd tẽns a taaba yĩnga la a tɩtaama yɩɩl na n lebga kʋʋr yɩɩla.

³⁵Ka-sɩng-kõn-zĩnd-sɛɛb Wẽnda na n sika a zugu, bugum sẽn ka na n dɩ n kees bũmb yʋʋm kʋʋm yĩnga, la kõn yɩ yʋʋm a wãn bala la a na n lebg sʋtãan na-tẽng ye.

³⁶Zerizalɛɛm, ges yaanga. Ges Soaala sẽn kõt-f sũ-noog ninga!

³⁷Ges f kamba sẽn lɛɛg n watẽ, kamb niyns fo sẽn da bas tɩ b wʋk n loogã. B yita zĩig zãnga, b yita yaang n wat nin-taoore, Soaala koɛɛga sẽn sãtẽ wã la b tigim taaba, la b kɩdemda sũ-noogo, Ka-sɩng-kõn-zĩnd-sɛɛb soaba maasmẽ.