Read SEBR SÕNGO, 1998 Ezekiyɛl 11 Bible Online

Ezekiyɛl 11 - SEBR SÕNGO, 1998 bible

Ezekiyɛl 11

¹Soaala pãng kolemda maam n kẽng wẽnd dooga yaang no-kãsengã. Neb pisi la a nu n da yɛs be; bãmb sʋka m yãenda a Yazaniya, a Azur biiga n paas a Pelatiya, a Benaya biiga. Bãmb la tẽnga taoor dãmba.

²Soaala-Wẽnd yeela maam: «Ezekiyɛl, ad yaa nin-bãmba n dat n tʋm tʋʋm yoodã la b yelgd sagl yoodã, Zerizalɛɛm pʋgẽ.

³B yetame: ‹Na kaoos tɩ b le me rot ka. Tẽnga yaa wa rʋko la tõnd la nemd n be a pʋgẽ.›

⁴Woto wã, Ezekiyɛl, gom bãngr goama n luk b bãongo.»

⁵Wẽnd pãnga kẽ-m lame la b yeel-m lame tɩ m gom woto. Ad Soaala leokre: «M mi-la y sẽn walemd taaba la m mii tagsg ning sẽn wat y yamẽ, Israyɛl kamba!

⁶Yãmb kʋʋ neb ka tɛka, tẽn-kãnga pʋgẽ, n kɩt tɩ soya fãa rɩg ne kũum.

⁷Rẽ n so tɩ maam, Naaba-Wẽnd, gomd ne-y woto. Tẽnga sɩd wẽnda rʋko la nemda yaa yãmb sẽn kʋ b rãmbã. Sã n ya yãmb mense, m na n dig-y lame n yiisi.

⁸Yãmb sẽn zoet zabr sʋʋgã, yaa zabr la b na n zab ne-yã. Yaa maam, Naaba-Wẽnd, n togsd rẽnna.

⁹M na yiis-y tẽngã n bas-y tɩ y lʋɩ sãamb nusẽ, la m kao y bʋʋdo n paalg yã.

¹⁰M na n tʋma zemsga sẽn dat tɩ m tʋm tʋʋm niynsã a Israyɛl tẽn-peelmẽ la y na n paa zabrẽ, la woto y na bãng tɩ maam la Soaala-Wẽnde.

¹¹Tẽn-kãngã kõn yɩ yãmb rʋk ye, yãmb me kõn yɩ a pʋgẽ nemd ye. Yaool n yaa a Israyɛl soolma pʋgẽ la m na n kao y bʋʋdo n sɩbg yã.

¹²Woto y na bãnge tɩ maam la Soaala-Wẽnde, ned ninga yãmb sẽn pa reeg a soab noya la y pa lak ne a soab sẽn gɩdgã, n yaool n tũud buud niyns sẽn gũbg yãmba rog-n-mikã.»

¹³La maam, a Ezekiyɛl, sẽn waa n taasd gom kãensã, a Benaya biig a Pelatiya, Naaba-Wẽnd sẽn keese, wẽneg n bee kũum. M lʋɩ-la m yãvabga la m kelmame: «M ba-yee, y na n kʋʋ Israyɛl kamba fãa sẽn kelle, Soaala!»

¹⁴Soaala yeel-m lame:

¹⁵«Ninsaal biiga, bãng tɩ Zerizalɛɛm kẽedba sagenda Israyɛl kamba fãa sẽn be pa-weere, fo tẽngen-bi-taase, fo saam-biisi, la b yet-b lame: ‹Zãag-y ne Soaala-Wẽnd tẽngã tɩ ka yẽ bal la b rɩk n kõ tõnd ye.›

¹⁶Woto wã togs b sẽn tall b rãmb n kẽng pa-weerã, tɩ maam a Wẽnd n wilgd-ba: ‹M sẽeg-y-la tẽn-zẽnsẽ, tẽn-sãamsẽ la ne rẽ fãa m be-la y sʋka, wa m do-sõngẽ.›

¹⁷Bɩ f taas-ba maam, Naaba-Wẽnd, sẽn kãab-bã. Taas-b woto: ‹M na n yiis-y-la bu-zẽmba sʋka, n yiis-y tẽns niyns m sẽn da sẽeg yã, n le tall-y n wa kẽes Israyɛl.

¹⁸Y sã n leb be y na menes tʋʋm yooda la wẽn-naandsa waoogre.

¹⁹M na n kõ-la y fãa gilli sũur a ye; y yama me na n lebga yam paale. M na n teka y sũura sẽn kʋɩ wa kugrã tɩ m goama tõog n bʋd a pʋgẽ.

²⁰[24†] Woto y na reeg m noya la y lak ne m sẽn gɩdgã la y na lebg m buudu tɩ m me lebg y Wẽnde,

²¹La sã n ya sẽn waoogd-b nin-naandsã, sẽn tũud-b b sũur daabo la b maand wɩɩbdo, m na sɩbg-b wala b beegra sẽn tog ne. Maam, Naaba-Wẽnd, wilgd-y-la woto.› »

²²Malɛgsa yɛdga b pɩgsã tɩ gʋla me sɩng bilingu. Rẽ t'a Israyɛl Wẽnnaama ziira vẽenem da yãgda bãmb zugẽ.

²³[25†] Dẽ poore Soaala sẽn da lik ne ziira zẽkame n tees tẽnga tẽnsʋka n tɩ yals tãng ning sẽn be Zerizalɛɛm yaanga zugu.

²⁴Wẽnd pãnga koomda maam n tall-ma n kẽng Babilon tẽnga, pa-weta sʋka. Dẽ marsã la m ka le yãend bũmbu.

²⁵Soaala sẽn kɩt tɩ mam yãend bũmb niynsa fãa, m dɩkame n togs pa-wetã.