Read SEBR SÕNGO, 1998 Ezekiyɛl 14 Bible Online

Ezekiyɛl 14 - SEBR SÕNGO, 1998 bible

Ezekiyɛl 14

¹Daar n zĩndi tɩ Israyɛl nin-kẽemba kẽere wa maam a Ezekiyɛl nengẽ n na n sok-m bũmbu.

²La Wẽnd taasa maam b koe-kãnga:

³«Ninsaal biiga, nin-bãmba sẽn gãd b yamẽ, yaa b wẽn-naandsa bala. B pʋgd-b lame n ka mi tɩ rẽ n wat ne b yel-wẽnda ye. B ra tẽ tɩ mam na n basame tɩ b sok-m bũmb ye.

⁴Dɩlla wilg-ba maam, Naaba-Wẽnd sẽn leokd-b: ‹Israyɛl ned sã n lebg wẽn-naandsa yamba, a sã n bas tɩ sẽn lubd-a yel-wẽndẽ wã gãd-a, t'a baas n wat n na n sok bãngda, a bãng tɩ yaa mam meng m toore n na n leok-a. M na ges a sẽn pʋgd wẽn-naands niynsa sõor sẽn zem to-to.

⁵M leokra na n yɛɛsa sẽn da zãag b mens ne maam, b wẽnd-naandsa yĩnga.›

⁶To be neere! Yeel a Israyɛl roogã tɩ woto la Soaala gomd ne ba: ‹Teem-y zʋgo, bas-y wẽn-naandsa pʋgbo, gãneg-y y tʋʋm yoodã.›

⁷Israyɛl biig bɩ sãan sẽn zĩ Israyɛl tẽn-peelmẽ sã n sak n lebg a wẽn-naandsa yamba, a sã n bas tɩ sẽn lubd-a yel-wẽndẽ wã gãd-a t'a baas n wat n na n sok bãngda n bãng m leokre, yaa mam menga n na n leok-a m toore.

⁸M na zab ne nin-kãnga la b na gom a yelle la b na maan baobg a poorẽ; m na yiis-a buudẽ la rẽ me na paa y yamẽ tɩ maam la Naaba-Wẽnde.

⁹La bãngd sã n belg a meng n leok a menga toore, yɩta mam meng n daag-a. M pãnga la m na n wilg yẽ soaba la m na n menes-a-la m buud a Israyɛl sʋka.

¹⁰Bãngd a woto buudu la sẽn sok-a yẽ wã, b yiiba fãa tʋka b yel-wẽnda taale n tog ne sɩbgre.

¹¹Woto a Israyɛl dooga kõn leb n zãag ne maam ye, a kõn le rẽgem a menga ne a yel-wẽna sẽn ka tɛka ye. B na n lebga m buudu, tɩ mam lebg b Wẽnde. Woto la m da tar n na n leok-ba, maam, Naaba-Wẽnde.»

¹²Wẽnd goma ne maam n yeel-ma:

¹³«Ninsaal biiga, d mak wala tẽng n beeg maam n bas maam. Ad-y m na n wilga tẽn-kãnga m pãnga, m na n menesa bura a sẽn da kees a meng yĩnga. M na sɩbg-a ne kom, m na menes tẽnga pʋga ninsaalb la rũmsi.

¹⁴Ba neb a tãabo wala a Nowe, a Daniyɛl la a Zoob, sã n da beẽ tẽng kãng pʋga, nin-bãmba a tãabã tũudma na n fãagẽ-la bãmb yõor bala. Ned a to kõn paas ye.

¹⁵Tõe meng tɩ m bas tɩ rũm-toos kẽ tẽngã. Tẽnga na n lebga we-raoogo, tɩ rũmsa na n kʋ neba fãa. Rũmsa rabeem yĩnga ned kõn saag n tag be ye.

¹⁶Ba nin-bãmba b tãaba ra beẽ tẽngẽ wã, bãmb b tãab bal n na n põsẽ. Soaala-Wẽnd n yeele. Tẽnga rãmb kõn tõog n fãag b meng kamb ye, la tẽnga na n lebga zĩ-peen-daaga.

¹⁷Ka rẽnd bɩ m wa ne zabre tẽnga pʋga, n bool tãnsoab a ye ne a tãb-biisi tɩ b wa zɛ tẽngã la b menes a nebã ne a rũmsã.

¹⁸Nin-bãmba b tãabã sã da beẽ tẽn-kãng pʋga, yaa bãmb bal n na n põsẽ. Wa m sẽn vɩ wã, maam, Naaba-Wẽnd n togsd rẽnna, b kõn tõog n fãag b meng kamb ye.

¹⁹Ka rẽnd bɩ m tʋm bã-longdem, n wilg m sũura sẽn puugã ne bãag sẽn na n kʋ tẽnga neb la a rũmsi.

²⁰Ba a Nowe, a Daniyɛl ne a Zoob sã n da beẽ tẽn-kãng pʋga, b tũudma na n fãagẽ la bãmb yõor bala. Maam, Naaba-Wẽnde, Wẽnd vɩɩgã, n yete, b kõn tõog n fãag b meng kamb ye.»

²¹ [29†] Soaala-Wẽnd yeel-m lame: «M sɩbga Zerizalɛɛm ne yel-beed a naase: zabre, kom, we-rũmsi la bã-longdem, sẽn na n yɩlẽ n menes a nebã la a rũmsã.

²²Neb kẽer pam n põsame, pagb la rapa. B kɩtame tɩ b yi tẽnga pʋga. Ad-y bãmb na n bʋʋga yãmb pa-weere. Y sã n wa yãend b sẽn vɩ to-to, Y sã n wa yãend b tʋʋm wẽna, y na bãng tɩ sɩbgr ning m sẽn sɩbg Zerizalɛɛma da yaa bũmb sẽn segde.

²³Y sũur na sig bilfu, tɩ y sã n wa yãend-ba y na bãnge tɩ m da tara bʋʋm m sɩbg-b wa m sẽn maana. Maam, Naaba-Wẽnd n yete.»