Read SEBR SÕNGO, 1998 Ezekiyɛl 17 Bible Online

Ezekiyɛl 17 - SEBR SÕNGO, 1998 bible

Ezekiyɛl 17

¹Naaba-Wẽnd koɛɛg taa maam:

²«Ninsaal biiga, bao yelbũndi n tão Israyɛl kamba. Kõ-b kibare,

³la wilg-ba tɩ yaa maam, Naaba-Wẽnd n tãood-b solemde. Ad solemdã. Sɩl-kẽenga, sɩlg ne pɩgs sẽn yalme, sɩlg sẽn labs waare, t'a kõbdã ya pẽrem-pẽrem, n wa Libã tẽnga, n sig tɩ kãseng a ye zug tẽnsʋka.

⁴Sɩlga kʋʋga will ning sẽn da luga n yɩɩd a taabã n tall n loog a tẽngẽ, toandb tẽnga, n wa tɩ bas-a lɛɛbdb tẽngẽ.

⁵A yaoolame n dɩk tẽn-kãng tɩɩg bulli n tɩ maneg zĩiga n bʋd-a, kʋɩl-kãseng noore.

⁶La bulla tobame n lebg bugsuntung buud sẽn wesd la yɛdgd tẽnga. Bugsuntunga wil ra tãoodame n teesd sɩlgã, la yẽ maasmẽ la a ra sut a yẽgna. Bugsuntunga wesame, a tãoo vãad, n tão wila.

⁷Bãng-y tɩ sɩl-kẽeng a to me n wa. A pɩgsa ra yaa bɛd-bɛda t'a kõbda ya zʋʋ. Bãng-y tɩ bugsuntunga wẽnemda tao-tao n tees sɩl-kãnga, n kos t'a zãgs-a koom, n zãgs a wila wala a yẽgna. Mik a sẽn tar tãoobo a waa n londga toaaga.

⁸B yaool n da sel-a-la kʋɩl-kãseng noore la a pʋʋga ra sakda koodo t'a ra togẽ n wese la a wom biisi, la a yɩ bugsuntung sõng menga.

⁹Sokre la maam, Naaba-Wẽnd, sokda: Na yɩ sɩda, bugsuntunga na tõog n wom biis n yɩɩge? Pipi sɩlga ka na n pãs a yẽgna, la a fãs a biisã la a kʋɩɩs a vã-miinim, la a võ a yẽgna tɩ pa tũ ne toogo, tɩ pa tũ ne neb kʋʋng sõngre bɩ?

¹⁰Bugsuntunga keta pʋʋg pʋga, yaa sɩda, la a kõn tõog n wom ye. Yaang sobgã sã n yiki, a kõn kʋɩ zãng sɩda? Ad-y zĩig ninga a sẽn da rat n yɛdgã la a na n wẽneg n kʋɩ.»

¹¹Soaala-Wẽnd koɛɛga taa maam:

¹²«Sok nin-bãmba sẽn ya tõatbã n gese b ka wʋmd solemda võore. Ade, Babilon dĩma kẽ Zerizalɛɛm. A yõka Zerizalɛɛm dĩma ne a kug-zĩidba n tall n loog a tẽngẽ.

¹³A baoo rĩm-biig a ye n yõg zood ne-a, n modg-a t'a kãabe tɩ b zĩnen-taar na yɩ noogo. Rẽ t'a yõga tẽngã nin-bẽdã n zãage.

¹⁴A maana woto tɩ tẽnga rãmb pãng woog tɩ b ra wa tʋlg n zẽk b zug ye, n kell n yɩ sakdba.

¹⁵[30†] Ad-y nin-kãng yik n yeelame t'a kõn sak tɩ ned a to soog a tẽng ye. Woto a tʋma neb Ezipt tẽnga tɩ b tɩ bao wiidi la b bao tãb-biis wʋsgo sẽn na n wa sõng-a n zabe. Woto na tõoge? Ned ninga sẽn maana woto wã na tõoge n yiis a meng yellẽ? A sãama zoodã n geend t'a na tõoge?

¹⁶M wẽend ne m menga, Soaala-Wẽnd n yete: ‹Yaa naab ninga sẽn kõ a yẽ naamã tẽngẽ la a na n ki, yẽ sẽn ka pids a sẽn kãabã, la a sãam zooda. Yaa na-kãng tẽngẽ la a na n ki, yaa Babilon tẽn-peelma pʋgẽ la a na n ki.

¹⁷Ezipt dĩma ne a tãb-biisã, a tãb-biis ka tɛka, kõn tõoge n zab n fãag-a Babilon dĩma nugẽ ye. Babilon dĩma na n wa sama tãndo la a tuk bok n gilg Zerizalɛɛm la a na n paam n kʋʋ neb ka tɛka.

¹⁸Rĩm paalga sẽn pa sakã, n maan wa a toog ka wã, n ka pids a sẽn kãabã, a bãng t'a sãama a meng yelle.›

¹⁹Dɩlla ya woto la maam, Naaba-Wẽnde, Wẽnd vɩɩga gomda: ‹Israyɛl dĩma zãgsame t'a kõn pids a sẽn da kãab-m bũmb ninga ye. Bãng-y t'a na reeg a sɩbgre.

²⁰M na n bẽd-a lame n yõk-a ne bẽdgo, m tall-a n kẽng Babilon tẽnga n tɩ sɩbg-a, a sẽn ka pids a kãabgã ne maama yĩnga.

²¹A tãb-biisã, a gãndaada fãa, sʋʋg n na n kʋ-ba la sẽn põs-ba, m na sẽeg-b zĩis fãa.› Woto la b bãngda, tɩ maam n gome, maam, Naaba-Wẽnde.

²²Ad Soaala-Wẽnd koɛɛga: ‹M na n yãka tɩ-kãsenga zugẽ will poll a ye n sel-a m toore, tãn-lug-lug zugu.

²³Israyɛl tãn-lug-lug a ye zug la m na n sel-a. A na n tobame n yɩ tɩ-kãsenga, n wom biisi, n lebg tɩ-neere. Luiili wã buuda toor-toore, na n wa ninga b tʋgdo a maasmẽ.

²⁴La weooga tɩɩs fãa na bãnge tɩ maam la Soaala-Wẽnde, n tõe n lub tɩ-kẽenga la m kɩt tɩ tɩ-bil tobe, maam n tõe n kʋɩɩs tɩɩg me vãado, la m kɩt tɩ tɩ-koɛɛng tobe. Yaa maam, Naaba-Wẽnd, n gome la m na pids m sẽn yeele.› »