Read SEBR SÕNGO, 1998 Ezekiyɛl 18 Bible Online

Ezekiyɛl 18 - SEBR SÕNGO, 1998 bible

Ezekiyɛl 18

¹Naaba-Wẽnd koɛɛgã taa maam n yetẽ:

²[31†] «Bõe yĩng la yãmb ket n wẽed yelbũnd kãnga Israyɛl soolma pʋgẽ: Ba rãmba wãba sib kãse tɩ kamb yẽn deeg n zãabdẽ.

³Ad-y maam, Naaba-Wẽnde, Vɩɩm Naaba, n wilgd-y tɩ b kõn le wẽ yelbũnd kãnga Israyɛl tẽng ye.

⁴Ade, yõor fãa yaa maam n so: ba rẽnna, biig rẽnna. Sẽn maana yel-wẽnde, yẽ bal yõore n yãkde.

⁵D dɩk makre: nin-kãnga yaa nin-tɩrga, n tũud sɩd la zemsgo.

⁶A ka rɩt maanda rɩɩb tãmsa zut ye; a toog ka be ne Israyɛl wẽn-naandsã, a bõn-dẽgdã ye; a ka baood a to paga, la a yõgda a menga a pag kiuug wakato.

⁷A kẽes tʋʋmde, a na yao; a kõn dɩk a to bũmb ye; ned sã n bobl-a bũmbu, a lebsda a soaba; kom sã n tar neda a kõt-a-la rɩɩbo, la a yeelgda sẽn kẽnd-a a bɩlgemde.

⁸A ka pengd ligdi n na n dok yõodo ne zãmb ye; a pʋs n ka rat kegre baa bilfu, n bʋʋd bʋʋd tɩrse; a togsda-sɩda.

⁹[32†] A reegda m noya la a gũusda a meng ne mam sẽn kisi, a tʋʋm yaa pʋ-peelem tʋʋma. Ade, maam a Naaba-Wẽnde, m yetame tɩ ned a woto buud sɩd yaa nin-tɩrga la a na vɩɩnde.

¹⁰D mak tɩ ned a woto buud roga bi-bɛɛga; a fãadame, a kʋʋdame, wẽng ka be a sẽn gɩdg a meng ye.

¹¹A ka rɩk a ba nao, la a rʋʋda tãmsa zutu n dɩt maand dɩɩbo, bɩ n yõgd a to paga,

¹²bɩ n wẽt naong rãmba la a ka-neng rãmba, bɩ n zuud a taaba, n pa lebsd b sẽn bobl-a bũmb ning ye. A wɩɩbdame n kʋʋd wẽn-naandsa maando.

¹³A pengda ligdi n dokd yõod ne zãmbo. Ned a woto buud tog n vɩɩndame sɩda? M pa tẽed ye, t'a tʋma tʋʋm yoodo, a na n kiime la a kũuma taal lʋɩta a zugu.

¹⁴La d mak marsã tɩ ned a woto buud roga biiga. Biiga yãenda a ba wã sẽn tʋm tʋʋm dẽgdã la a pa saag n dɩk a ba nao ye.

¹⁵A ka rɩt tãmsa zutu, a toog ka ne Israyɛl wẽn-naandsã, a ka yõgd a to pag ye.

¹⁶A ka wẽgd a taaba, a ka reegd bobelle, a kõta kom sẽn tar a soaba a buri, a yeelgda sẽn ka tar-a fuugu.

¹⁷A yaa zemsg soaba, a ka pengd ligdi n dok yõod ne zãmb ye. A sakda m noya, n gɩdgda a meng ne m sẽn gɩdge. Ad-y nin-kãnga kõn ki a ba wã beegra yĩng ye. A na n vɩɩndame.

¹⁸Ad-y yaa a ba wã sẽn maan kegrã, n maan wagdem, la a ka maan neere m neba sʋka, ad-y yẽ n na ki, a toorẽ yel-wẽna yĩnga.

¹⁹Tɩ yãmb zĩ tẽngr n sokdẽ tɩ yaa bõe yĩng la ba wã yel-wẽnd ka rɩt biigã? Yaa biiga sẽn tũ sɩda la zemsgã, a reega m noya fãa n tũ-b zãnga; rẽ wã, a tog n vɩɩndame.

²⁰[33†] Sẽn maan-a yel-wẽnde, yẽ soab bal n kiidi! Biig kõn deeg a ba yel-wẽnd taal a zug ye. La ba me kõn deeg biig yel-wẽnd taal a zugu ye. B na n pila nin-sõng a sõmblem fuugu, n yeelg nin-wẽng a wẽnem fuugu.

²¹Nin-wẽng sã n tuub yel-wẽn niyns fãa a sẽn maana, a sã n deegd m noya fãa la a tũud sɩd la zemsgo, a na n vɩɩndame, a kõn ki ye.

²²B kõn leb n tẽeg a sẽn maan yel-wẽn niyns yell ye, a na vɩɩnde, a zemsg tʋʋma yĩnga.

²³Mam yam la nin-wẽng kũum bɩ? Maam n yete, maam, Naaba-Wẽnde, m daaba yaa a bas a zʋg wẽngã la a paam n vɩɩnde.

²⁴La nin-tɩrg sẽn bas burkĩndlem, n tʋm wẽnga, n dɩk nin-wẽng nao, yãmb tẽed t'a na vɩɩnd bi? M pa tẽed ye. B na yĩm tʋʋm sõma niyns a sẽn tʋma. A sẽn beege n kɩɩs noorã n maan yel-wẽndã, rẽ bal n na n wa ne a kũum.

²⁵Tɩ yãmb yetẽ: ‹Ad Soaala manesma ka zems ye.› Israyɛl dãmba kelg-y wɛ. Yaa mam manesma n ka zems sɩda? Ka yãmb zʋgã n ya wẽng bi?

²⁶Ad-y nin-tɩrg sã n bas zemsgo n maan yel-wẽnde tɩ rẽ wa ne a kũum, yaa yel-wẽndã a sẽn maana yĩng la a ki yã.

²⁷La nin-vẽng sã n bas wẽng sore n tũ sɩda la zemsgo, yẽ togame n vɩɩnde.

²⁸A sẽn tuub a yel-wẽna fãa a sẽn maana, ya tɩlɛ t'a vɩɩnde, a kõn ki ye.

²⁹Dẽ la a Israyɛl roog rãmba zĩ tɩ Soaal manesmã n ka zemse. Israyɛl dãmba, yaa mam manesmã n ka zems sɩda? Ka yãmb zʋgã n ya wẽng bi?

³⁰Israyɛl roog rãmba, yaa rẽ la m na n bʋ ned kam fãa n zems a manesem. Maam n togsd boto, maam, Naaba-Wẽnde. Teem-y zʋgo la y tuub y yel-wẽna fãa, modg-y tɩ yel-wẽnd ba a ye ra wa ne y kũum ye.

³¹Fugumd-y yel-wẽn niyns fãa y sẽn maana, la bao-y sũ-paalle la yam paalle. Bõe tɩ f rat kũum, Israyɛl roogo?

³²Ned ba a ye kũum ka noogd m sũur ye. Zãag-y y meng ne wẽng la y vɩɩnde. Yaa maam a Wẽnd n togsd rẽnna.»