Read SEBR SÕNGO, 1998 Ezekiyɛl 20 Bible Online

Ezekiyɛl 20 - SEBR SÕNGO, 1998 bible

Ezekiyɛl 20

¹Pa-weera kẽnd yʋʋmd a yopoe soaba, kiuug a nu soaba, kiuuga piig daare, a Israyɛl nin-kẽems kẽer wa m taoore n bõs Wẽnd vẽnegre.

²Soaala-Wẽnd goma ne maam woto:

³«Ezekiyɛl, togs Israyɛl kamba maam, Naaba-Wẽnd, sẽn yet tɩ f taas-ba: ‹Yãmb waa n sokame n na n bãng m daabo la ad maam, Naaba-Wẽnde, Vɩɩm Naaba sẽn leokde: m kõn bas-y tɩ y sok-m ye!›

⁴Foo, Ezekiyɛl, foo n na n kao b bʋʋdo, la ra zãgs b bʋʋda kaoob ye. Sõng tɩ b tẽeg b ba rãmba wɩɩbda zãnga.

⁵Taas-b koees niyns maam, Naaba-Wẽnd, sẽn leokdã: ‹M sẽn waa n yãk a Israyɛl, yɩɩ buuda fãa taoor la m wẽen yã. M lika m meng bãmb Ezipt tẽnga la m wẽename tɩ m na yɩɩ bãmb Soaal la b Wẽnnaam.

⁶[34†] Baraare, m zẽka m nug n wẽen tɩ b na yi Ezipt tẽnga n tɩ kẽ tẽng ning m sẽn da yãk n bĩng-ba; tẽng sẽn bund bĩisim la sɩɩdo, tẽng sẽn ya sõmb n yɩɩd tẽns a taaba.

⁷M yeel-b lame: zãag-y y meng ne bũmb niyns fãa gesg yamleoog sẽn tar yã. Da rẽgem-y y mens ne Ezipt wẽnd-naandsa ye, tɩ maam, Naaba-Wẽnd, la yãmb Wẽnde.

⁸La b yika zabre ne maam, n pa le tʋlg n kelg m ye. Ba a ye ka bas bũmb niyns yãeeb yamleoog sẽn da tar-a ye. B ka zãag b mens ne Ezipt wẽnd-naandsa ye, tɩ m da yet tɩ m na bas m sũura t'a fudg n waag-ba, tɩ m na bas m sũ-puura t'a rɩ-b Ezipt tẽng menga.

⁹La m gesa m yʋʋra sõmblem, n pa tʋlg tɩ b sãam-a bu-zẽmba sʋk ye. M da zoe n gomame tɩ bu-zẽmba wʋm, tɩ m na n yiis-b-la Ezipt tẽnga.

¹⁰Ya rẽ yĩng la m sẽn yiis-b Ezipt n tall-ba n kẽng zĩ-peen-daagẽ.

¹¹[35†] M kõ-b-la m noya, m wilg-b-la sor ning b sẽn tog n tũ n paam n vɩɩnde wa m noya sẽn date.

¹²[36†] M tol n kõ-b-la vʋʋsg raare tɩ yɩ b kaseto, maam ne bãmb sʋka, tɩ b bãng tɩ maam n wat ne sõmblem.

¹³La a Israyɛl rooga yika ne maam zĩ-peen-daagẽ wã. B ka tũ m noya ye. B sãbs-b lame la bãmb deegre n yaool n da wat ne vɩɩm. B sãama m sũur wʋsgo n ka tũ vʋʋsga raar noya ye. M yeelame tɩ m na n basa m sũ-puurã t'a fudg n waag-ba, zĩ-peen-daagẽ wã tɩ b ki zãnga.

¹⁴La m gesa m yʋʋra sõmblem, m pa tʋlg t'a sãam bu-zẽmb sʋk ye tɩ b bãngame tɩ maam n yiis-b Ezipt tẽnga.

¹⁵[37†] Yɩɩd rẽ, m wa n kong n zẽka m nug we-raoogẽ wã n wẽen tɩ m kõn tall-ba n kẽes b tẽngẽ ye, tẽng ning m sẽn da bao b yĩngã, tẽng sẽn bund bĩisim la sɩɩdo, tẽng sẽn ya sõmb n yɩɩd a taab fãa.

¹⁶Bãng-y tɩ m sẽn wẽen woto wã yaa b sẽn zãgs tɩ b kõn deeg m noya, n zãgs n tũud soy niyns m sẽn gɩdge, n zãgs vʋʋsga raar noora reegre, b yama sẽn da kẽ b wẽn-naandsa yĩnga.

¹⁷La m zoe-la b nimbãanega n pa tʋlg n sãam-b ye la m sɩd ka menes-b zĩ-peen-daagẽ wã ye.

¹⁸M yeela b kamba zĩ-peen-daagẽ wã: Da tũ-y y ba rãmb nao ye. Da tũ-y b manesma ye, da rẽgem-y y mens ne b rẽgdã, ne b wẽn-naandsa ye.

¹⁹Maam, Naaba-Wẽnd, la yãmb Wẽnnaam! Tũ-y m noya, deeg-y dog-n-mik ning m sẽn kõ yã la y tũ-a.

²⁰Deeg-y m kibs-ramba noya, tɩ b yɩ kaset, maam ne yãmb sʋka, n wilg tɩ maam, Naaba-Wẽnde, la yãmb Wẽnnaam.

²¹Kamba me yika ne maam, b pa reeg m noya ye, b pa tũ dog-n-mika ye, b pa tũ soy niyns sẽn wat ne vɩɩm ye, b raaga vʋʋsga raar noor n base la m me yeelame tɩ m na n bas m sũ-puurã t'a fudg n waag-b zĩ-peen-daagẽ.

²²La m tar n leba poorẽ, m gesa m yʋʋra sõmblem n pa tʋlg n sãam m sẽn da yiis b rãmb Ezipt tẽng tɩ bu-zẽmba zĩi n getẽ wã ye.

²³M le zẽka m nug zĩ-peen-daagẽ n wẽen tɩ m na n sẽeg-b-la bu-zẽn-dãmb sʋka.

²⁴B ra ka tũ rog-n-mika ye, b ra zãgsa m noya n bas vʋʋsga raare n pʋgd b ba rãmba wẽn-naandse.

²⁵B tol n tagsame tɩ m kõ-b-la noya sẽn pa sõmbe la rog-n-mikã sẽn pa kõt vɩɩm.

²⁶M basame tɩ b rẽgem b mens ne kũun niyns b sẽn kõt b wẽn-naandsã, n bas b tɩ b kood b kom-rẽemsã fãa. La rẽ yɩɩ sẽn na n yɩlẽ tɩ b yama waa n laka ne b mense, la b bãng tɩ maam la Naaba-Wẽnde.›

²⁷Yaa rẽnd yĩnga, la m yet-fo, Ezekiyɛl, taas a Israyɛl roogo, maam, Naaba-Wẽnd, koeesã. Y ba rãmba sẽn le beeg-m ne bũmb ninga, yaa b sẽn ka sak n pa m nonglma pʋgẽ.

²⁸M da tall-b lame n taas tẽng ning m sẽn da kãab tɩ m na n kõ-b lame. Beelẽ b yãenda kunkuba zutu tɩɩs sẽn tar maasem tɩ b rʋ n sɩng b maanda kʋʋbo. B yika m sũuri ne b sẽn yiis kũun niyns n kõ wẽn-naandsã. B rɩgla maand sẽn tũnug ne b kũuni, ne tɩdare sẽn tar yũ-noogo n maagd sũuri, n paas rãam.

²⁹Dẽ la m sok-ba: ‹Y kũud n na n tɩ rooga yɛ?› Tɩ b leoke tɩ kunkuba zutu. Dẽ la b ket n boond ne rũnna tɩ Bama, waoogr zĩisi.

³⁰Sẽn ya woto wã, taas a Israyɛl doogã, maam, Naaba-Wẽnd, sẽn leok bũmb ning yell kãnga poorẽ. Yãmb yɩ-la a wãna n dɩk y yaab rãmb nao, n dẽgemd y mense ne b rẽgdã, ne b wẽn-naandsa waoogre n yaool n lakd n basd maam?

³¹Ba ne rũnna yãmb ket n pʋgda b wẽn-naandsã n dẽgemd y menga ne y kũuni, ne y kamb kʋʋbo. Yãmb yɩta a wãna, Israyɛl kamba, n tẽed tɩ m na bas tɩ y sok-ma?

³²Yãmb ninga y memg yamẽ tɩ y tõeeme, wa bu-zẽmbã, n waoogd tɩɩse la kuga tɩ m sĩnda. Ad-y rẽ ka tõe ye!

³³Maam la Naaba-Wẽnde, Vɩɩm Naaba, m na n tʋma m pãn-tʋʋma; m na n basa m sũura t'a fudg n waal yã tɩ m kell n tõog n dɩ naam y zutu.

³⁴M na yiis-y-la bu-zẽmba sʋka, n yiis-y m sẽn da sẽeg-y zĩis niynsã. M na puuga m sũuri la m wilg m pãnga n tigs-y zĩ yɛnga.

³⁵M na n tall-y lame n kẽng we-raoogẽ, n zãag-y ne buud a taaba la m na bool-y-la bʋʋdo.

³⁶Wala m sẽn paalg y ba rãmba bʋʋdo Ezipt we-raoogẽ, woto m na paalg yãmb me. Yaa maam, Naaba-Wẽnd, n gomd boto.

³⁷M na modg-y n kẽes m bãgrẽ, tɩ y tũ d sẽn sed ne taabã.

³⁸M na n kẽe yãmb sʋka la m na n sʋkame n bas kɛɛnga sẽn zẽk b zut ne maam la sẽn tõdg-b maama. M na n yiis-b-la b sẽn be zĩig ning marsã wã la b kõn leb Israyɛl tẽng ye. La woto y na bãng tɩ maam la Naaba-Wẽnde.

³⁹Ad beoog yella sẽn na n yɩ a soaba tɩ m wilgd-y, maam, Naaba-Wẽnde. Ned kam fãa tõe n pʋga a rẽgdo, a wẽn-naandse, la m wẽend tɩ wakat n wate, y na kelg-ma, y kõn le sãam m yʋʋr sẽn ya sõngã ne maandã la y wẽnd-naandsã pʋgb ye.

⁴⁰Yaa m tãn-sõnga zugu, tãn-woka zugu la a Israyɛl na wa waoog-ma. Yaa be la m na n deeg-y ne sũ-noogo la m kos-y tɩ y wa ne y sẽn segl m yĩnga la sẽn ya sõng zãngã, y maanda ne b sẽn tũnugd bũmb ningã.

⁴¹M na reeg-y wa tɩdar yũ-noogo sẽn maagd sũuri, y sã n wa yi bu-zẽmba sʋka. Y sã n wa paam tɩ m bool-y n tigs zĩ-yɛnga. Woto neba na yãend m sẽn zãad-y to-to la b na bãng tɩ maam la Nin-Sõngo, yãmb Wẽnde.

⁴²Yãmb me na bãng tɩ maam la Naaba-Wẽnde, m sã n wa taas yã a Israyɛl tẽn-peelmẽ, tẽng ning m sẽn da kãab y yaab rãmba.

⁴³Beelẽ y na tags y vɩɩma sẽn yɩ a soab pĩnda. La y sã n tags bũmb ning sẽn da rẽgemd yãmbã, y sũura na yaale ne y menga, y tʋʋm wẽna yĩnga.

⁴⁴La y na bãnge, Israyɛl roogo, tɩ maam la Naaba-Wẽnde, m sã n zoe m yʋʋr sãoongo n ka sɩbg-y wala y wẽnema sẽn da tog ne a soabã, wala y vɩɩm yookã sẽn da tog ne a sobã. Yaa woto la m da tar n na n wilg yã, maam, y Naaba-Wẽnde.»