Read SEBR SÕNGO, 1998 Ezekiyɛl 23 Bible Online

Ezekiyɛl 23 - SEBR SÕNGO, 1998 bible

Ezekiyɛl 23

²«Ezekiyɛl, pagb a yiib n zĩndi, n ya ma a ye kamba.

³B ra ket n yaa pʋg-sɛdba la b lebga yoaadba Ezipt tẽnga. Be la b salem b yãoogo la b wẽbs b pʋg-sadem-bĩsa.

⁴Ad-b yʋy: kãsma la a Oola, yao wã, a Ooliba. Kãsma makda Samari, tɩ yao wã makd Zerizalɛɛm. M maana kãadem ne maam la b roga kom-dibli la kom-pugli n kõ-ma.

⁵A Oola maana yoodem ne a sẽn da yaa m pagã. A yo-la a yooba ne a roellse, Asʋr dãmba.

⁶Yaa tãb-biis sẽn yer n kẽnd wa saag-pag a Ninanina, n paas tẽnga kombɛɛmba, yaa kom-poala, ra-sãmb bɛɛlaa, la wed-dʋʋd mitba.

⁷A Oola yam waa n kẽe Asʋr nin-bɛdã, la a sẽn pʋg bãmbã, a pʋga b wẽn-naandsã gilli.

⁸A le sɩnga vɩɩm yoog ninga a sẽn da vɩ Ezipt tẽnga tɩ Ezipt rãmb sɩnga a gãaga la a bĩsa wẽbsgo t'a nan paooda.

⁹Yaa rẽ yĩng la m bas-a t'a lʋɩ Asʋr rãmba nugẽ, a ra-sãmba nugẽ.

¹⁰Bãmb bas-a-la a zaala, n loog ne a kom-dibli la a kom-pugli. B kodga yẽ menga ne sʋʋga. A yʋʋr yii pagba sʋka, a wa n lebga neba fãa kisgu.

¹¹Pʋg-kãng yao, a Ooliba, nif rɩɩ dẽ fãa kaseto, la bãng-y tɩ yẽ n yɩɩg ne wẽnem a yooba pʋgẽ.

¹²Yẽ me yam waa n kẽe Asʋr kombɛɛmba, taoor dãmba, a tãb-biis sẽn da yer fu-neeba, n dʋʋd wiidi sõmb-sõmbo, kom-poala la ra-sãmba.

¹³Yẽ me basame t'a wẽnema sãam-a zãnga. M gesame la m bãngame tɩ neb a yiiba zʋg ra yaa a ye.

¹⁴Bãng-y t'a Ooliba yooba n wa n tɩ zʋʋg ne wẽnem. Daar a ye a yãee b sẽn gʋl miid-miidu, lalg zugu, raop sẽn wẽnd Babilon dãmba.

¹⁵B ra ninga sẽbds b sɛɛgẽ, n vil b zut ne zu-vindsi. Da yaa zab-zabdb sẽn nand b menga. Sɩd da wẽnda Babilon tẽng neba Kalde tẽn-peelmẽ la b rog yã.

¹⁶A Ooliba sẽn yãend gʋlba bala, a yam kẽ-b lame, t'a tʋm neb Kalde tẽnga.

¹⁷La Babilon dãmba babs-a lame n wa gãand ne-a n dẽgem-a. La a sẽn yaal ne bãmba n tɩge, a yam laka ne-ba, lebga beem menga.

¹⁸La yẽ me sẽn yɩ yoaad neba fãa nifẽ, n yals a zaal neba fãa taoorã, ma me sũura wa n yaanda ne-a wala a sẽn da yaal ne a kẽema.

¹⁹A yooba paasame, a yooba wẽnem wa n yɩɩga a pʋg-sademdẽ rẽnna, wa n yɩɩga Ezipt rẽnna.

²⁰A yama ra waa n kẽe yoaadba sẽn mi yõgbo la sẽn tar pãng wala bõeense, wala wiidi.

²¹Gese, Ooliba, fo le sɩngame n maand wala f pʋg-sademdẽ f sẽn da basd tɩ Ezipt rãmba salemd f yãoog la b wẽbsd f bĩsa.

²²Yaa rẽ me la m yet-fo, maam, Naaba-Wẽnde, tɩ m na n kɩtame tɩ f zo-rãmba yik ne-fo. Fo sẽn yɛ ne b marsã wã, m na kɩt tɩ b yi zĩig zãng n wa zab ne-fo.

²³M na n boola Babilon dãmba, Kalde rãmba, Pekod, Soa la Koa rãmba, Asiri dãmba. M na n tigma kom-poala, ra-sãmba, kombɛɛmba la bʋ-kaoodba, zab-zabdba, neb sẽn dʋʋd wiidi sõmb-sõmbo.

²⁴B na n wa taka zabr ne foo la b na n yii goabga sẽnẽ. B na n waa ne bilim-bilm, bɛd la bõonego, la tãb-biis ka tɛka. B tara gãndo la b fõgnega kut zug-peto la b na n gũbg-f lame. M na wilg-b-la fo sẽn maane la b na n bʋ-la f bʋʋdo wa sẽn zems ne bãmb me noya.

²⁵M sũura sẽn puug ne foom yĩnga m na bas tɩ b maan-f pãnga. B na wõrga f yõor la f tʋba, n wa baas-f ne b sʋʋse. B na n looga ne f kom-dibli la f kom-pugli, la b na n yõoga sẽn keta bugum.

²⁶B na yeesa f futu la b loog ne f fan-teedo.

²⁷M na n sɛɛsa f yoobã la f saabã sẽn sɩng Ezipt tẽnga. F kõn le tʋlg ned ba a ye, f kõn le tẽeg Ezipt rãmba yell ye.

²⁸Maam n yet-fo, maam, Naaba-Wẽnde, tɩ m na n bas-f-la f sẽn kis b rãmba nugẽ, sẽn yaand-b fo sũur marsã wã.

²⁹B ka na n zã-f neer ye, b na n looga ne f tʋʋma yõodo. B na n basa foo zaala tɩ neba fãa get-f wala b sẽn maand ne pʋg-yoaada. Yaa f wẽnema la f yoobã,

³⁰n na n wa ne rẽ. Fo yoo ne tẽn-zẽng rãmba la f waooga b wẽn-dẽgdã n dẽgem f menga.

³¹Fo vɩɩma wẽnega f kẽema rẽnna. A sẽn deeg sɩbgr ninga buudu n na n yɩ f rẽnna.

³²Woto yaa Soaala-Wẽnd n yete: F na yũ tooga wamde f kẽema sẽn zoe n yũ wã. Yaa wam-yalengo, wam-pogbre! A sẽn labs yĩnga, a yũ zãng wata ne laado la yĩgsgu.

³³Wamda na n tɩgs-f-la ne sũ-beedo, na n yũudame la f rigda n yũud la f waasd toogo, tɩ yaa f kẽema Samari wamde.

³⁴F na yũ-a, f na yũ-a zãnga, n yaool n wa rũm-a n wã peese, t'a peesa sɩ f yãoogã. Maam n yete, maam, Naaba-Wẽnde!

³⁵Sẽn ya woto wã, Wẽnd n gomde, f sẽn yĩm m yella yĩnga, f sẽn tud maam f kãare, tʋk f zugẽ f yooba ne a rẽgdã taale.»

³⁶La Soaala-Wẽnd paasame: «Ninsaal biiga, segl bʋʋdo, a Oola la a Ooliba bʋʋdo. Ypk b tʋʋm wẽna.

³⁷B zãmb-m-la ne b yoobã, b nug mooga ne zɩɩm. B rẽgma b meng ne wẽn-naandsa waoogre. B sẽn da rog kamb niyns m n kõ-ma, b yõog-b-la bugum tɩ bugma rɩ-b zãnga.

³⁸Ad-b sẽn maan bũmb ning n paase tɩ m zabdẽ: b rẽgma m doogo n sãbs vʋʋsga raare.

³⁹Bãng-y tɩ raar ninga b sẽn yõog b kamb bugum, baraar la b kẽ m doogẽ wã n dẽgem-a. B saaga woto fãa mam doogẽ.

⁴⁰Yɩɩd rẽ menga, b sẽn bool b rãmb tɩ b yi yɩɩg n wa wã, sɩd wa-la b nengẽ. Tɩ b so koom, n ning kɩrʋ, n ning b muizãana,

⁴¹n gãand gãn-bʋgsg zugu, n dɩk tɩdarã la yũ-noog kaama m sẽn da kõ-bã, n dogl te-roagendg a ye zugu n wisd b menga.

⁴²Sẽn wa-ba yɩɩ wʋsgo. Koɛɛg n da sãte, ya neb ka tɛka sẽn zɩ ne yɩɩr koɛɛga. Neb ka tɛka n da yi zĩ-peen-daagẽ n wa. B pida kamb a yiiba zũi, la naam pugl neeba la b fõgneg b zugu.

⁴³M da yeta m menga: ges-y laado, yoob sẽn kʋʋl pag la bala, t'a ket n baood dapa!

⁴⁴Rapa wata b nengẽ. B ra ket n pʋgda a Oola la a Ooliba, n le sãam n paas, pagb neerem sẽn sãam zãnga.

⁴⁵Nin-tɩrs n na n kao pʋg bãmba bʋʋdo. B na n deega yoaadba la nin-kʋʋdba sɩbgre, tɩ sɩda b yoome la b nus mooga ne zɩɩm.»

⁴⁶«Ad-m sẽn yet bũmb ninga maam, Naaba-Wẽnde: ‹Tigim-y nebã b sɛɛgẽ, n yɛɛs-ba, n fã-ba.

⁴⁷Lab-y-b ne kuga, la b bees-b ne sʋʋga. Kʋ-y b kom-dibli la b kom-pugli la yõog-y b roto.

⁴⁸Mam meng n na n sɛɛs b yoobã tẽnga pʋga. Woto pagb a taab yam na neke la b kõn dɩk tãop a yiiba nao ye.

⁴⁹Bãmb n na n dɩ b tʋʋm yooda taale, bãmb n na n tʋk b wẽnema b zugẽ, bãmb sẽn waoog wẽn-naandsa yĩnga. Woto la y bãngda tɩ maam la Naaba-Wẽnde.› »