Read SEBR SÕNGO, 1998 Ezekiyɛl 24 Bible Online

Ezekiyɛl 24 - SEBR SÕNGO, 1998 bible

Ezekiyɛl 24

¹Pa-weera kẽnd yʋʋmd a wɛ soaba, kiuug piig soaba, kiuuga piig daare, Naaba-Wẽnd goma ne m woto:

²[45†] «Ezekiyɛl, dɩk sebre n gʋls dũnna daarã a zugu, tɩ yaa rũnna raarã la Babilon dĩma na n gũbg Zerizalɛɛm.

³Gom ne m buudã sẽn ya tõatã, gom-a ne yelbũndi, la f wilg-a tɩ yaa maam, Naaba-Wẽnd, n kõ-f noor tɩ f gome. Segl rʋko, ning koom a pʋgẽ.

⁴Los nemdo, los nem-sõma, gere, la bãoko, pids rʋka ne kõb-sɩɩlem.

⁵Yãk pe-nobdsa nemdo, ning raad rʋka tẽngre. Sõng tɩ fãa kɛ sõma, tɩ kõaba fãa bɩ neere.

⁶Ad-m sẽn yete, maam, Naaba-Wẽnde: Kato nin-kʋʋdb tẽnga! Fo wẽnda rʋk sẽn kẽ piisem, t'a pekr lebg toogo. M na n yiisa f nebã a yeyn-ye tɩ tẽnga wa lebg vɩʋʋgo, f ka le ya m tẽn-nongr ye.

⁷Zɩɩma sẽn daagã ket n dɩga tẽnga pʋga. Zɩɩma raaga pĩig zugu, a pa raag tomẽ ye la ned me ka lob tom n bus-a ye.

⁸Mam me na n basa zɩɩma sẽn madg kugrã n ka bao tom n bus-a ye, m basd-a lame t'a yãng m sũuri, tɩ m sɩbg nebã n dok m sũuri.

⁹N-ye! Maam n yete, maam, Naaba-Wẽnde, tɩ nin-kʋʋdb tẽnga na n sega bʋk ne bʋko. Ade yaa bugum la m na n widgi na yɩɩ bug-kãsenga.

¹⁰Sam daado, ning bugum, rʋg nemdã, lebg-a n le rʋge, ning noosdo tɩ wʋme, los kõab-raada bugmẽ tɩ rɩ zãnga.

¹¹Vaag rʋkã n bas vɩʋʋgo, dogl-a bug-saal zugu, t'a mooge, woto f na menes rẽgda fãa sẽn ket a pʋgẽ. Daare piisma na sʋʋge.

¹²Piisma waa ne tʋʋm toogo. Bugma ka na n tõog piisma naana ye, a ra kẽe rʋka wʋsg-wʋsgoo.

¹³Ad ka bũmb a to n dẽgem-fo n zʋʋg f yooba ye. M maana fãa n tẽed tɩ f na peke la f sẽn zãgs pekrã, m na kong n bas m sũura t'a fudgi n bas-a t'a fudg zãng n dɩ-fo.

¹⁴Maam n gome, maam, Naaba-Wẽnde, la m gomda na n pidsame. M kõn bas tɩ bũmb pa ye nimbãan-zoeer ka ye, sugr ka ye. Bʋʋda na n bʋʋme n tũ f tʋʋm yoodã. Maam, Naaba-Wẽnde, n togse!»

¹⁵Soaala-Wẽnd goma ne m woto:

¹⁶«Ezekiyɛl, vugr bala, m na n looga ne f yam sẽn kẽe a soabã, ne f pagã. La f kõn kelma a kʋʋre, f kõn yãbe, f nintãm kõn dʋʋg ye.

¹⁷Waas f sũurẽ bala, da yeelg kʋʋr fut ye, vil peend f zugu, wid f neoda, da teeg peend f lemd ye, da reeg rɩɩb f yags sẽn na n wa kõ-f ye.»

¹⁸Yibeoogo m sõsa ne zãma wã, la zaabr sẽn ta m paga kiime, la beoog sẽn vẽege m maana wala b sẽn da wilg-ma.

¹⁹Dẽ la zãma wã sok ma: «F kõn wilg tõnd f manesma võor bi?»

²⁰Tɩ m yeel-ba: «Ad Soaala sẽn togs-m yãmb yĩnga:

²¹‹Wilg a Israyɛl roogo, tɩ maam, Naaba-Wẽnd, n yete: M meng m toore n na n wã m do-sõngã, yãmb sẽn get ne zu-zẽkrã, y nin sẽn get ne yamleoogã, y yam sẽn loe a soaba. Y sẽn loog n bas y kom-dibli la y kom-pugli niynsã na n yɩɩ sʋʋg noor dɩɩbo.

²²La yãmb me na n maana wa maam. Y pa na n teeg lemd ye, y pa na n dɩ kʋʋr dɩɩb ye.

²³Da lood-y pɛɛla sẽn vil y zuta ye, da woob-y y neooda ye, da kelem-y ye, da yãb-y ye. Sẽn be yaa d faage, d tʋʋm yood waolgẽ, la d kũm taaba.

²⁴A Ezekiyɛl sẽn maan bũmb ningã, yaa woto la yãmb me na n maane. La rẽ sã n wa taase y na reeg tɩ maam la Naaba-Wẽnde.› »

²⁵Dẽn poore Soaala yeel-m lame: «Gese, Ezekiyɛl, m na n zãag-b-la ne ro-sõngã sẽn ya b soondg zĩiga, b nin yamleoog bũmbu, b zu-zẽkre la b saagre. M na n looga ne b kom-dibli la b kom-pugli.

²⁶Yella sã n wa maane ned n na n põse n zoe n wa togs foom.

²⁷Baraare f kõn le yɩ muk ye. F na n le tõog n gomame, f na n tõog n sõsa ne sẽn põs-a n wa ne kibarã. Fo sãoogra na n yɩɩ kaset b yĩnga, la b kõn le sãmb tɩ maam la Naaba-Wẽnd ye.»