Read SEBR SÕNGO, 1998 Ezekiyɛl 26 Bible Online

Ezekiyɛl 26 - SEBR SÕNGO, 1998 bible

Ezekiyɛl 26

¹ [50†] Pa-weera kẽnd yʋʋmd piig la a yembr soaba, kiuuga pipi daare, Soaala-Wẽnd goma ne maam n yeel:

²«Ezekiyɛl, ad Tir dãmba laada Zerizalɛɛm dãmba n yetẽ: ‹N-faa, n-faa! B wãa tẽng ning sẽn da ya na-tẽn-kãsenga. Tõnd n na n deeg a zĩiga. D na n lebga arzɛk rãmb n yɩɩd pĩnda, tɩ Zerizalɛɛm wãame.›

³Dẽ yĩnga, ad-m sẽn yete, maam, Naaba-Wẽnde: ‹M na n yika ne foo, Tir tẽnga. M na n kɩtame tɩ neb wʋsgo wa zab ne-fo. B na n wa fão-f lame wa mogr ko-wiis.

⁴B na n wãa Tir lal-bɛdã, b na n tusa b do-lug-lugã n lubi, b na n pɩɩsa a toma n kees pĩig a nare.

⁵Sẽn na n keese yaa tẽng sẽn puk mogr sʋka, n zems zĩm-loabdba na yɛdg b zulumsi. Dẽ yaa maam, Naaba-Wẽnd n yete. Nin-zẽmb na n wa zɛɛ Tir,

⁶n paas tẽns sẽn pẽ ne-a n tong mogra noore. Woto y na bãng tɩ yaa maam la Naaba-Wẽnde.›

⁷Maam, Naaba-Wẽnd, n le yet woto: ‹M na n zaba ne foo, Tir. Ade, mam na n talla dĩm a yembre, sẽn yit goabga, a Nabikodonozor, Babilon dĩma, dĩm dãmba dĩma; a na n waa ne wiidi, ne bilim-bilm, ne wed-dʋʋdba, la tãb-biisi sẽn ka be tɛka.

⁸A Nabikodonozor na n zɛɛ tẽns niyns sẽn be mogra noore. Dẽ poore, tãb-biisa na n tuu bogdo la b sam tãndo n gilg-fo. Gãnd me la b na n sel n gilgi n kok f pɛɛma zãnga.

⁹A na n waa ne zab teedo, ra-bɛdã a sẽn tar n tãad dotã la a na n tus-f lalsã n lubi; a na n siiga f ro-lug-luga ne somse.

¹⁰Wĩida sõor na n yɩɩ wʋsgo; b wubsgu na n bui-f-la zãnga. Lalsa na n dĩmsa ne wed-dʋʋdba la bilim-bilma bʋʋre. Tãb-biisa na n tũ f dignoya n kẽ; b na n kẽe tẽnga naana-naana wala b sẽn tũud lal-wãoongo n kẽedẽ.

¹¹B na n tũu f soya fãa n loog ne b wiidi, b na n kʋʋ fo neba ne sʋʋga, b na n tusa f lal-gilsã sẽn ya bɛd-bɛdã n lubi.

¹²B na n wʋka f arzɛgsã n sooge, b na n deesa fo bõn-koosma; b na n wãa f lalsã, fo ro-neebã, b na n wã-b lame, b na loba b kuga la b raada mogrẽ.

¹³[51†] M na n kɩtame tɩ b ra leb n wʋm f yɩɩla yɛs ye, b kõn le wʋm kʋnd dãamd ye.

¹⁴M sẽn na n kees-fo, yaa f zu-koeella bala, yaa f pĩiga bala, sẽn na n lebg zulums yɛdgr zĩiga, la b kõn leb n me-f n yik ye. Yaa maam, Naaba-Wẽnd, koɛɛg la woto.›

¹⁵Ad-m koɛɛg yɛs ne Tir dãmba: ‹Tẽnsa sẽn tedg kooma noor n zãagã na n sɩnga rigbu b sã n wa wʋm fo lʋɩɩse, n wʋm sẽn pogl b rãmb waasgo.

¹⁶Mogra noorẽ nanams fãa na n siga b naam goeel zugu, b na n piida b naama futu, b na yeesa b fu-neeba. Dabeem kãseng na n yõk-b lame; b na n zĩi tẽnga n tar digbu, fo lʋɩɩsa sẽn yɛɛs-b wʋsga yĩnga.

¹⁷B na yɩɩla sũ-sãang yɩɩla, fo poorẽ, la b na n yeel-f lame: Wao! Tẽng ninga yʋʋr sẽn da yi wʋsgã tɩ mogra pʋgẽ dãmba da tar a pãnga kasetã, tɩ neba fãa da yɛɛsd a naama, tẽn-kãng wãa zãnga!

¹⁸ [52†] Marsã tẽns niyns sẽn be-b mogra noore zĩi ne yɩɩre, fo lʋɩɩsa poore. Sẽn tedg-b kooma noor n zãagã wʋma f wãab n tar digb bala.›

¹⁹N-ye! Maam n gomde, maam, Naaba-Wẽnde: ‹M na kɩt tɩ f lebg raboogo tɩ ned ka le be f pʋgẽ ye, m na kɩtame tɩ mogra koom fudg n dɩ-fo.

²⁰Mam na n tus-f lame n lub tɩ f babs sẽn sig-b bʋg-tẽnga al tẽn-kʋdem-dãmb wẽndẽ. M na n kɩtame tɩ f sig ne pĩnd kɩɩmsã. F Kõn le tõog n wa bõn-vɩɩs sʋk, tẽng zug ka ye.

²¹[53†] F sẽn lebg a soaba na n yɛɛsa ãndũni rãmba, tɩ f na n wãa zãnga. B na n bao-la f zĩiga la ned kõn le yãend-a bada. Yaa woto la m gomda, maam, Naaba-Wẽnde.› »