Read SEBR SÕNGO, 1998 Ezekiyɛl 27 Bible Online

Ezekiyɛl 27 - SEBR SÕNGO, 1998 bible

Ezekiyɛl 27

¹Soaala-Wẽnd goma ne maam:

²«Foom, Ezekiyɛl, pʋd yɩɩlle n yãb Tir.

³Yaa tẽng sẽn be mogra noorẽ la sẽn leebd ne mogra noorẽ dãmb a taaba. Taas-a m koɛɛga, maam, Naaba-Wẽnd, koɛɛga: ‹Tir, yaa foo n da pẽgd f menga, foo n da pẽgd f neerem!

⁴F toaaga tɩ bee mogra sʋka. B mee foo tɩ f wẽnd koom koglgo.

⁵Yaa Senir tɩ-wogda ra-pegdo la b rɩk n ka koglgã la Libã tɩ-wogdã la b kɛɛg yã n maan peen-loetgã.

⁶B rɩka Bazã daoog sẽn ya kɛgenga n pees paklse n tar n dugsd koglgã. Koglga ra-paadsã yaa Kitim ra-kegemse, bãmb zug la b ra samd teeda la laogã, la b maneg n tablga ne bõn-peesdi, ne bũmb sẽn pees ne wobd yẽna.

⁷Ezipt tẽng peend b sẽn manege n buki n da ya peend ninga sobga sẽn tusdi tɩ koglga kẽnd kooma zugã. B miime tɩ yaa foo n wate tɩ f nan ket yɩɩg menga. Peen-moaama la peen-mismiidu, Kitim tẽng pɛɛla n da lut teedã.

⁸Sidõ la Arvad neba n da ya fo ko-rugsdba. Tir ko-rugs-mitba n da wilgd sore tɩ koglga tũudĩ.

⁹Biblos tʋʋm-mitba n da manegd sẽn sãam fãa, koglga pʋgẽ. Koom-kogenda ne b neba sẽn da mi tolbã da yaasda f nengẽ n daad b teedo.

¹⁰Pɛrs, la Lud la Ypt dãmba da bee fo tãb-biisa sʋka, b da yagenda b gãndo la b zug-peto fo meng tãb-sikẽ, la fo yʋʋra ra tũu rẽ n zẽke.

¹¹Arvad rãmba da naaga f tãb-biisã n gilgd lalga zugu tɩ Gamad rãmba gũusd bɛɛba ro-lug-luga zutu. B ra yagenda b gãndã lalsã la rẽ ra yaa bũmb sẽn sakd gesg waare.

¹²Tarsis rãmb da wata f nengẽ n daad teed buud fãa. B da raada f teedã ne wanzurfu, ne kutu, ne waasdo, ne namdo.

¹³Yavã, Tubal la Mesek da maanda leebgo ne foom, B da wata ne yemse la teed sẽn yõg ne zũudu n tekd ne fo sẽn da tõe n koos ne-ba.

¹⁴Rũms n da yit Bɛt-Togarma n wat fo nengẽ: wiidi sẽn tat teedo, wiidi sẽn mi zoeese, la bõn-weese.

¹⁵Dedã rãmba da leebda ne foom. Tẽns wʋsgo da yaa fo raadba. F ra leebda ne tẽn-zãorgẽ dãmba la b ra wata ne wob-yẽna la da-sĩdma.

¹⁶Edomitsa da raada teed wʋsgo la b da wata ne kug sẽn pɩnda, peen-miidu, pɛɛl sẽn gʋl tɩ sakd gesgo, gĩs sẽn ya neere, koomẽ zẽems buud la kug miid sẽn yãgd-b-toore.

¹⁷Zɩɩda la Israyɛl tẽnsa ra leebda ne foom, b da wata ne Minit alkam, ne ki, ne sɩɩdo, ne kaam, la tɩ-sũm sẽn tar yũ-noogo.

¹⁸Damas da yaa fo raada, a ra wat n daada teed buud toor-toore. B ra yaooda foo ne Elbõ rãam n paas Saar pe-kõbdo.

¹⁹Al Uzal tẽnga, Dã la Yavã, da wata ne kut sẽn kudi, ne tɩɩs pagd sẽn tar yũ-noogo, ne kãnkẽ-sɩɩdo.

²⁰Dedã da wata ne fut sẽn tar n famd wiidi.

²¹Fo ra leebda ne Arabi la Kedar nanams fãa, b da yaooda ne pe-bi, pe-raado la bʋʋse.

²²Saba la Ragma toandba da wata fo nengẽ. B da yaooda ne kaam sẽn tar yũ-nood wʋsgo, ne kug neeb buud toor-toore n paas sãnem.

²³Arã, Kane, la Eden, Seba, Asʋr la Kilmad toandba da leebda ne foom.

²⁴B da wata ne fu-neeba, ne fut sẽn ya mismiidu, ne fut sẽn gʋl tɩ ya neer wʋsgo, ne fu-gʋlem-gʋlem, ne wĩ sẽn tar pãnga.

²⁵Tir, fo da tara koom-kogend sẽn wat ne f teedã, f kogenda da pida wʋsgo, wa sẽn tog ne mogr zug kogendo.

²⁶Koom-kogenda rugsdba tall-f lame n ta ko-sʋka. Yaang sob-lebende n wa n sãam f kẽnde mogra sʋka.

²⁷Fo arzɛkã, fo teedã, kogenda zɩɩbã neb niyns fãa sẽn da rugsd koglgã, neb niynsi sẽn be a pʋgẽ n manegd-a wã a sẽn mii n wa sãama, neb niyns sẽn get-b fo tolba yelle, zab-zabdba, la neb niyns fãa sẽn da be koglga pʋgã, bãmb fãa gilli paa koomẽ, tɩ f lisa mogra pʋga.

²⁸B sẽn wʋm ko-rugsdba kɛlenga, mogra noorẽ dãmba digimdame.

²⁹Wakat kãnga, sẽn da rugsda koglgo fãa yii n basa a koglgo b fãa siga tẽnga.

³⁰B ra wiisda fo poorẽ, b ra waasda waas-toodo, n yugd b zut ne tom, n bilimd tompɛglmẽ.

³¹B põngda b zut fo yĩnga, b na n dɩka sũ-pa-noang fut n yeelge. Sũ-sãang pida b sũuri tɩ b na n wiis f yĩnga, tɩ b na n yãb yãb-toogo.

³²B na yɩɩla sũ-sãang yɩɩla b na n kelma f kʋʋre. Tir, fo ra yaa tẽng sẽn ka tar a to ye, la ad fãa sẽn lebg sɩɩ, f tẽn-peelmẽ.

³³F sã n da sik f kogendã, yaa neb ka tɛk n da wat n daadẽ. Fo arzɛka la fo teeda yĩnga fo kɩtame tɩ ãndũni wã nanams lebg arzɛgs rãmba, tɩ f arzɛka la f paoonga da yaa wʋsgo.

³⁴Ade, marsã, ko-wiisa sãama foom, ko-zulunga sʋka la f lis yã. Fo zɩɩbã la f nebã, koom dɩɩ zãnga.

³⁵Sẽn tedg-b mogra noora fãa yɛɛsa yɛɛsg menga. B dĩm dãmba rigdame, b fãa neng gãnemame.

³⁶ [54†] Tẽn-zẽnsa lɛɛbdba da rigda rabeem, fo tiig n lebga pɛlen-yɩk bũmb b yĩnga; fo yell sãama daar buud fãa yĩnga.› »