Read SEBR SÕNGO, 1998 Ezekiyɛl 28 Bible Online

Ezekiyɛl 28 - SEBR SÕNGO, 1998 bible

Ezekiyɛl 28

¹Soaala-Wẽnd goma ne maam:

²«Ninsaal biiga, taas Tir dĩma Naaba-Wẽnd sẽn leokd-a bũmb ningã: ‹Fo n yik n gom ne wilg-m-menga n maand tɩ f yaa wẽnde. Wala wẽnde, m zao naam goeel la mogr ne mogre n gũbg goeelã. F yetame tɩ f zema wẽnde, mik fo yaa ninsaal bala, f ka tar wẽnd fɩ.

³Ade, fo tẽedame tɩ f tara yam n yɩɩd a Daniyɛl, tɩ bãngd ka be n zem foom ye, la f tõe n wʋma yel-solgdi wã fãa.

⁴Fo bãngre la f yam yĩnga, fo lebga arzɛk soaba, fo paama sãnem la wanzurf n bĩngi.

⁵Fo talla f minim kãsenga n paas f paoong wʋsgo, la fo maana wilg-m-menga, f arzɛka yĩnga.

⁶Woto wã, kelg m sẽn yet-fo, maam, Naaba-Wẽnde: Fo waa n tẽeme tɩ f yaa wẽnde,

⁷la rẽnd yĩnga, m na n kɩtame tɩ bu-zẽmb wa zab ne-fo. Yaa neb sẽn tar pãng wʋsgo. B na n wa sãama fo sẽn zĩnd n geelg wa yam pidung soab sẽn geendã. B na n sãbsa f ziirã.

⁸B na n tusa foom n lub f yaoogẽ, la f na n kii kũ-toogo, mogr sʋka.

⁹Fo na leb n yeel yɛs tɩ f yaa wẽnde, fo kʋʋdba taoore? Fo kʋʋdba nifẽ, fo yaa ned bala, fo ka wẽnd ye.

¹⁰Fo na ki nin-dẽgd dãmba kũum, tẽn-zẽng rãmb n na n kʋ-fo. Dẽ yaa maam, Naaba-Wẽnd, n yete.› »

¹¹Soaala-Wẽnd le goma ne maam:

¹²«Ezekiyɛl, pʋd kũmkũm yɩɩla, Tir naab yĩnga. Fo na n yeel-a lame tɩ yaa maam, Naaba-Wẽnd, n ning goama f noorẽ. Yeel-a woto: ‹Fo da yaa ned sẽn pid ne sõmblem menga, f yam da waooga wʋsgo, fo neerem da ka be to ye.

¹³Fo ra vɩɩ Eden tẽnga, Wẽnd zẽed pʋga. F fuuga ra tisa ne kug neeb buud ka tɛka: kõod-miuugu, kõod-pespele, kẽeg-toenɛɛga, mosmoomde, wõnog kõbgo, peelgo, pɛɛlg fas, birba, mismiuugu. F gãngãada la f wɩɩsã ra bolga sãnem. Te-neeba la fan-teedo la b sɩd segl f yĩnga, f rogma raare.

¹⁴Mam da yalsa f yĩnga, malɛk gũuda sẽn da ya nin-daoogo. Fo ra bee m tãn-sõnga zugu tɩ f nao tagd kug sẽn yãgd-b-toore.

¹⁵Goaleng ka zĩnd f vɩɩmẽ, f naanega tɛka n tãag wakat ning f wẽnema sẽn waa n yaool n pukã.

¹⁶Fo tolba sẽn waa n paam pãng yĩnga, f lebga ned sẽn mi pãn-tõog la kalwẽdga. Yaa rẽ la m kɩt tɩ f lebg wa neb a taaba la m dig-fo n sik m tãnga zugu. Malɛk gũuda rig-f lame n zãag ne kuga sẽn da yãgd b toorã.

¹⁷F sẽn da paam n ta zĩig ninga kɩtame tɩ f wuk ne wilg-m-menga, f paoonga sẽn da ka paooda kɩtame tɩ f yama menem zãnga. Yaa rẽ yĩng la m gãnegd f tẽnga tɩ dĩm dãmb a taaba na n la-fo.

¹⁸Fo leebga pʋgẽ fo maana zãmbo la f wẽda f taaba. F waa n dẽgma m waoogra zĩiga, la yaa rẽ yĩng la m na n widg tẽnga pʋgẽ bugum ning sẽn na n dɩ-fã. Sẽn na n gesa foo fãa na yãenda m sẽn kɩt tɩ f lebg bug-rɩɩnda bala.

¹⁹Buud ning fãa sẽn mi foo la sẽn yãend f sẽn lebg a soaba na n yɛɛsa wʋsgo, fo na n lebga bũmb sẽn kẽesd rabeem, la m na n menes-f-la daar buud fãa yĩnga.› »

²⁰Soaala-Wẽnd goma ne m woto:

²¹«Ninsaal biiga, kedg n tees Sidõ, la taas a nebã m sẽn yet tɩ b gũus ne yell ning sẽn na n paam-bã.

²²Ad-m sẽn yet-ba, maam, Naaba-Wẽnde: ‹M na n yika ne foo, Sidõ, m na n wilg-f-la m pãnga ne tʋʋm bɛd niyns m sẽn na n tʋma. M sã n wa yik n na n sɩbg-b wala m sẽn kãabã, b fãa na bãng tɩ maam la Soaala, m na wilg-b tɩ maam la Nin-Sõngã.

²³M na n loba bã-longdem tẽngã, soya fãa na n yɩɩ zɩɩm bala. Zabra na n yãnga zĩig fãa la f neb wʋsg na n lʋɩɩ tẽnga pʋga. Dẽ me la b fãa bãngd tɩ maam la Naaba-Wẽnde.› »

²⁴Soaala-Wẽnd n yete: «A Israyɛl yak ba a ye kõn kell n tõog a yaoolg ye. B kõn le yɩ a yĩnga wa gõaaga n kõsdẽ la yorgdẽ ye. Woto b na bãng tɩ maam la Naaba-Wẽnde.»

²⁵Ad Soaala-Wẽnd koɛɛga: «Mam na n tigma a Israyɛl kamba, b sẽn sẽege n be zĩig ning fãa. M na n sʋk-b lame la woto m na wilg tẽns a taabã tɩ maam la Nin-Sõngo. B na n vɩɩnda b tẽngẽ, tẽng ning m sẽn kõ a Zakoob.

²⁶[55†] B na n zĩnda be ne laafi, b na n mee roto, la b sel bugsuntungu. B na n zĩnda ne laafi, tɩ m na n sɩbga a yak ning fãa sẽn na n paoog-a. Woto b na bãng tɩ maam la Naaba-Wẽnde.»