Read SEBR SÕNGO, 1998 Ezekiyɛl 3 Bible Online

Ezekiyɛl 3 - SEBR SÕNGO, 1998 bible

Ezekiyɛl 3

¹Sẽn da gomda wã yeela maam: «Ninsaal biiga, bũmb ninga b sẽn tees foomã, wãb-a, wãb sebrã m sẽn tees fooma la f kẽng tɩ gom ne Israyɛl buudu.»

²Mam yaaga m noore, la b kɩtame tɩ m wãb sebrã,

³[13†] t'a le yeel maam: «Ninsaal biiga, rɩlg f f menga n tɩge ne sebrã m sẽn kõt fã.» M wãba sebrã la a ra yaa bʋgsgo wa sɩɩdo.

⁴Tɩ b le yeel maam: «Ninsaal biiga, kẽng a Israyɛl buudẽ wã n tɩ togs-b m goama.

⁵Yaa f buuda goama la f na n gome, ka gãgnens nengẽ la m tʋmd-f ye, yaa a Israyɛl buudẽ.

⁶Tõe tɩ m sã n da tʋm-f buud kʋʋng nengẽ, buud goam sẽn ya toore t'a wʋmb me ya toog ne-fo, tõe tɩ b baasẽ n kelg-fo.

⁷La sã n yaa a Israyɛl kambã, ad-b ka na n kelg-f ye, tɩ yaa maam la b pa rat n kelge. Israyɛl neba zʋg yaa zʋg yoogo, zu-kugr soab zʋgo.

⁸Ade, m na n kɩtame tɩ f me kʋɩɩs f sũura wa bãmba. Fo me yubla na n yɩɩ wa bãmb dẽnna, pa girda, pa gõmsde.

⁹M na n kõ-f-la keglem wa kut sẽn yũnugi, n kõ-f keglem sẽn yɩɩd pĩig rẽnna. Woto wã ra zoe rabeem ne b buuda sẽn ya kɩɩsdb buuda ye.»

¹⁰Sẽn da gomda wã yeela maam: «Ezekiyɛl, goam niyns fãa m sẽn na n togs-fã, bĩng-b f sũurẽ, kelg ne f tʋba fãa.

¹¹Kẽng pa-weta nengẽ, f saam-biisa nengẽ, n tɩ gom ne ba. F na yeel-ba: ‹Ad Soaala-Wẽnd koɛɛga.› B nong bɩ b kelge, b nong bɩ b ra kelg ye.»

¹²Wẽnd Vʋʋsma zẽk-m-la yĩngri, la mam poorẽ, m wʋma bʋʋr kãsenga, m wʋma woto: «Soaala paam pẽgre, zĩig ning b sẽn puk b ziiri!»

¹³M wʋma nin-vɩɩsa pɩgsa sẽn da wẽed taaba, la gʋla me sẽn be b sɛɛgẽ wã bʋʋre. Ad-y bʋʋra sɩd yɩɩ kãseng-kãsenga.

¹⁴La Wẽnd Vʋʋsma sẽn da kẽ maama koomd-m lame, n dɩk-m n looge, tɩ m zĩ ne yɛɛsgo la yɩɩre.

¹⁵Mam taa Tel-Abib tẽnga, pa-weta nengẽ, pa-weta sẽn tɩ be Kebar kʋɩlga noora nengẽ. M paa b sʋka rasem a yopoe n ka mi m sẽn maande la m digda.

¹⁶Rasem a yopoe wã poore, Soaala-Wẽnd goma ne maam:

¹⁷«Ninsaal biiga, mam yalsa foom tɩ f lebg ned ninga sẽn na n yeel a Israyɛl t'a maan gũusgu. Fo n na n kelg m koɛɛga n deeg-a n taas Israyɛl.

¹⁸Wala m sã n dat n wilg yel-wẽn-maanda t'a rɩka sor n digd a kũum zĩigẽ tɩ fo ka sak n vẽneg-a t'a teem sore n paam n vɩɩnde, bãng tɩ yel-wẽnda soab na n ki-la a yel-wẽnda yĩnga la fo zug la m na n tʋk a kũuma taale.

¹⁹La fo sã n wilg nin-wẽnga la yẽe n ka tuub a wẽnema n zãag ne-a, a na ki a beegra yĩnga, la foo, f na fãag f yõore.

²⁰D mak marsã tɩ nin-tɩrga n waa n bas zemsgo n kẽ wẽng maanego, dẽ na lebg yel-beed a yĩnga, a na ki. Fo sã n pa wilg-a t'a gũusi, a na n ki-la a yel-wẽnda yĩnga. M kõn le tẽeg a pĩnd yel-sõma ye la yaa fo zug la m na n tʋk a kũuma taale.

²¹La fo sã n wilg nin-tɩrga t'a ra maan wẽnga, t'a sɩd pa maane, a na n vɩɩndame tɩ bala fo n gɩdg-a, la foom, f na fãag f yõore.»

²²Soaala-Wẽnd pãnga le koomd-m lame la b yeel-m lame: «Yik n ta bãoogẽ wã tɩ m gom ne-fo.»

²³Tɩ mam yik n yi n ta bãoogẽ wã; la Soaala-Wẽnd le siga be ne b ziirã wa Kebar kʋɩlga noorã, tɩ mam lʋɩ yãvabga n kɩ m menga tẽnga.

²⁴Soaala-Wẽnd pãnga le kẽe maam n kɩt tɩ m yik n yals yĩngri, la b goma ne maam. B yeel-m lame: «Lɛɛg n tɩ pag f meng f roogẽ.

²⁵Ninsaal biiga, ade, b na n dɩka sẽbdse n sẽb-fo tɩ f pa le tõog n yi n kẽng neba sʋk ye.

²⁶M na n kɩtame tɩ f zelemdã tabend f ragsendaka tɩ f lebg muka, woto fo kõn le tõog n sagl-b ye, tɩ bala b yaa tõatb buudu.

²⁷La m sã n wa tar koɛɛga f sẽn na n deeg n taas-ba, m na wa n yaag f noorã tɩ f gome. F na gom ne-ba, n yeel-ba: ‹Soaala-Wẽnd n gomd ne-yã.› Kẽer na n sak n kelgame, kẽer me na n zãgsa kelgre tɩ buuda yaa bu-tõatga.»