Read SEBR SÕNGO, 1998 Ezekiyɛl 30 Bible Online

Ezekiyɛl 30 - SEBR SÕNGO, 1998 bible

Ezekiyɛl 30

¹Soaala-Wẽnd le goma ne maam:

²«Ezekiyɛl, gom bãngr goama, taas neba maam, Naaba-Wẽnd sẽn yet tɩ f taas-b koees niynsã: ‹Yãb-y tɩ yel-beed n wat y zugu!

³Ade, daara kolgdame, Naaba-Wẽnd daara zoe n taame tɩ m sũura na n fudgi. Badaare sawat na n zĩnda wʋsgo, sawat sẽn kẽesd rabeem. Na n yɩɩ baraare la m na n dok m sũur ne bu-zẽmbã.

⁴Sʋʋg na n varga Ezipt rãmba, la Kus rãmb na n diga rabeem. B na n kooda Ezipt rãmba gilli, n zɛ b laoga fãa, tɩ b tẽnga lebg raboogo.

⁵Kus, Ypt la Lud, Arabi tẽng ne Libi n paas Israyɛl kamb kẽere, fãa na n paa zabrẽ.

⁶Maam n yete, maam, Naaba-Wẽnde, tɩ al Migdol sẽn be nug goabga n tãag Asuwã sẽn be nug rɩtgo, Ezipt tẽng sõangdba na n paa zabrẽ. A sẽn da tar pãng m maand wilg-m-mengã, ad-a na n lʋɩɩme. Yaa maam, Naaba-Wẽnd, n togsd rẽnna.

⁷Tẽnga na n lebga zĩ-peen-daaga zĩ-peen-daasa sʋka. B sẽn da kẽed tẽns niynsa na n lebga raboodo.

⁸B na bãng tɩ maam la Naaba-Wẽnde daar ning m sẽn na n yõog Ezipt bugum n daag a kamba zɩɩm la m menes a sõangdba fãa gilli.

⁹Ezipt wãab daare, m na yiis neb ne koom-kogendo tɩ b tɩ wilg Kus rãmba tɩ b maan dabeem, la b na n sɩnga yɛɛsgo la rigbu. Ad-y daara kolgame!›

¹⁰Ad-m sẽn yete, maam, Naaba-Wẽnde: ‹M na n kɩtame tɩ Babilon dĩm, a Nabikodonozor, kʋ Ezipt zãma wã.

¹¹Yẽ ne a neba, nin-toos menga, na n wãa tẽngã. B na n wõoga b sʋʋse n kʋ Ezipt tẽng rãmba, la tẽngã na n pida ne kũum bala.

¹²M na n kɩtame tɩ Nil kʋɩ, la m na n basa Ezipt rãmba nin-toos nugẽ. M na n kɩtame tɩ tẽn-zẽng neba wa sãam-a la b loog ne a laoga fãa. Dẽ yaa maam, Naaba-Wẽnd, n yete.›

¹³Ad-m sẽn paasde, maam, Naaba-Wẽnde: ‹M na n wãa Memfis wẽn-naandsa fãa ne b togsendo. Dĩm ba a ye kõn le rɩ naam Ezipt tẽng ye. M na n pidsa tẽnga ne rabeem.

¹⁴M na n wãa Patros, m na n yõoga Soã bugum, m na n pidsa m kãab-beeda ne No.

¹⁵Mam na kɩt tɩ wʋm Sin, Ezipt tãnsoben-doogã la m na n kʋʋ No zãma wã.

¹⁶M na n daaga Ezipt rãmb zɩɩm la m ning b tẽnga bugum. Sin tẽng rãmb na n yɛɛsame. No lalsa na n wurame tɩ koom dɩ tẽngã.

¹⁷On la Pi-Besɛt kom-bɩɩba na n paa zabrẽ, tɩ b tall sẽn ketã n loog yembdo.

¹⁸Tapanɛs tẽnga kõn le yãend wĩntooga vẽenem ye, Ezipt wãab raare, a kõn le tõog n yɩ a zu-zẽkre la a faong ye. Sawad sabelle n na n lud-a, la b na n talla a nebã n kẽng yembdo.

¹⁹M na pidsa kãab-beed ning m sẽn kãab Ezipt tẽnga la b na bãng tɩ maam la Naaba-Wẽnde.› »

²⁰Yembda kẽnd yʋʋmd piig la a ye soaba, pipi kiuugã, a daar a yopoe soaba, Soaala-Wẽnd goma ne maam:

²¹«Ezekiyɛl, mam wooga Ezipt tẽng dĩma pãnga, m kaooga a kanga la ned ba a ye ka wa ne tɩɩm, bɩ pɛɛla, ned ba a ye ka vil a kanga t'a leb n paam pãnga n tõog n gãd sʋʋg ye.

²²Yaa rẽ me la m leokda, maam, Naaba-Wẽnde: ‹M na n yika ne Ezipt dĩma. Kang ninga sẽn ket n tar-a pãngã na kaoogame n paase tɩ yɩ kams a yiiba fãa. A sʋʋga na n lʋɩ-la a nugẽ.

²³M na n sẽega Ezipt tẽns a taab pʋgẽ, m na n sẽeg-a-la tẽn-zẽnsa pʋsẽ.

²⁴Mam na n paasa Babilon dĩma pãnga, la m na n ninga m meng sʋʋg a nugẽ. Ezipt dĩma kamsa sẽn kao yĩnga, a na n wa yãbdame la a kiid a bɛ taoore.

²⁵N-ye! Ezipt dĩma kamsa na n luunda woto, n ka tar pãng ye tɩ m yaool n na n paas Babilon dĩma rẽnna. M na n dɩka m meng sʋʋg n ning a nugẽ la a na n zẽk-a-la Ezipt dĩma zugu, la neba fãa na bãng tɩ maam la Naaba-Wẽnde.

²⁶M na n sẽega Ezipt tẽns a taab pʋgẽ, m na n sẽeg-a-la tẽn-zẽnsa pʋsẽ. Dẽ la b bãngd tɩ maam la Naaba-Wẽnde.› »