Read SEBR SÕNGO, 1998 Ezekiyɛl 31 Bible Online

Ezekiyɛl 31 - SEBR SÕNGO, 1998 bible

Ezekiyɛl 31

¹Yembda kẽnd yʋʋmd piig la a ye soaba, kiuug a tãab soaba, la kiuuga pipi daare, Soaala-Wẽnd goma ne maam:

²«Ninsaal biiga, ad-f sẽn na n yeel Ezipt dĩma la a soolma rãmba sẽn ka tɛkã: ‹M na n mak-f-la ne bõe, fo sẽn gãe ne pãngã?

³Fo wẽnda Libã kʋk buudu; fo tẽega f wila neere tɩ f maasem ya noogo. F tão-la f zugã, t'a kul sawatẽ.

⁴Tɩɩga ra bɩɩ ne saaga koom, koom sẽn da bund a tẽngre n da bɩɩs-a. Kooma ra tigimda a sɛɛgẽ, n lɛɛg n zoet n babsd pʋta tɩɩs a taaba.

⁵Kooma sẽn da sekd-a wã a tãoome n zʋʋg tɩɩs a taaba. Wila ra paam n tãoome la b ra waoogame.

⁶Luiili buud toor-toore da tʋɩta b tʋgdo a willẽ; tɩ we-rũmsi da wat a tẽngre, n dogd b kamba. Neb wʋsgo da wat n zĩ-la a maasmẽ.

⁷A da yaa tɩ-neere, n tar maasem, n tar zãndlem; a wila sẽn da sud zĩig ninga ra gala ne koom.

⁸ [58†] Eden zẽeda pʋgẽ tɩɩg ba a ye ra ka be n wẽnd-a ye; tɩɩs niyns vãad sẽn ka kʋɩtã, zɩ n tão a wila buud ye. Vã tagda rãmb zɩ n bĩm wa yẽnd ye.

⁹M da sɩd kõ-a-la wil neeba; Eden, Wẽnnaam zẽeda, tɩɩsã da get-a lame la b kũmd sũuri.›

¹⁰Ad-m sẽn le gomda, maam, Naaba-Wẽnde: ‹Kʋka bɩɩme t'a zug tɩ be sawatẽ, t'a na n tũ rẽ n maan wilg-m-menga.

¹¹Yaa rẽ la m dɩk-a n bas tẽng zug dĩm kãsenga nugẽ, t'a na n paoog-a wala a sẽn tog ne paoogr ningã.

¹²Bu-zẽn dãmba toolem sẽn yɩɩd buud a taab rẽnna, kɛɛg-a lame la b bas-a lame n looge. A wil bɛdã, a wil bõonega kaoome n dʋr tãnga zug la bãadẽ. Neb niyns sẽn da vɩ a maasmẽ wã zoe n loogame.

¹³Yĩngri luiili wã fãa dã zao-la a wil sẽn kʋʋse; we-rʋmsa fãa da waa n tabda a wilã.

¹⁴Maana woto tɩ tɩɩg ba a ye sẽn be koom noore, n tɩg koom, da le tõog n zẽk a wilã n ta sawato, tɩ rẽ wa ne a wilg-m-meng ye. Bala tɩɩsa wa ninsaalba, fãa gill yaa kũum n so, fãa gill na n gãanda tẽnga ne sẽn deng-b bʋg-tenga.›

¹⁵Ad-m sẽn yete, maam, Naaba-Wẽnde: ‹Kʋka sẽn sig bʋg-teng daare, mam kɩtame tɩ bũmb fãa kelem a kʋʋre; m paga tẽngr kʋɩlga koom, a ka le zoet ye, ko-nif ba a ye ka le bund ye. A kʋʋra yãbr yĩnga, m pidsa Libã tãmsa ne lika, la m kʋɩɩsa weta tɩɩs fãa.

¹⁶Mam sẽn kɩt tɩ tɩɩga lʋɩ, n kẽng n tɩ naag ne kɩɩmsã, bu-zẽna wʋma a lʋɩɩsã, n yɛɛse, n sɩng rigbu. Sẽn kɩdem-b sũ-noogo yaa bʋg-tẽng rãmba, yaa Eden tɩɩsã, tɩɩs sẽn tar neerem wʋsgo, tɩɩs sẽn tɩg-b koom n yɩɩd fãa, Libã tẽn-peelmẽ.

¹⁷Bãmb me busa tẽnga ne sẽn pa-b zabrẽ, bãmb n da sõngd-a, la b ra vɩ-la a maasmẽ, bu-zẽmba sʋka.

¹⁸Eden tɩɩg ba a ye ka kolg foo ne neerem la bedrem ye. B na n yaool n naaga foom bʋg-tẽnga, tɩ f gãe be ne nin-dẽgdo la sẽn pa-b zabrẽ. Woto n na n yɩ Ezipt dĩma ne a neba pʋɩɩre. Yaa maam, Naaba-Wẽnd, n yete.› »