Read SEBR SÕNGO, 1998 Ezekiyɛl 32 Bible Online

Ezekiyɛl 32 - SEBR SÕNGO, 1998 bible

Ezekiyɛl 32

¹Pa-weera kẽnd yʋʋmd piig la a yiib soaba, kiuug piig la a yiibu soaba, kiuuga pipi daare, Soaala-Wẽnd goma ne maam:

²«Ezekiyɛl, maan kũmkũm yɩɩlle Ezipt dĩma yĩnga. Ad maam, Naaba-Wẽnd, sẽn yete: ‹Fo bee bu-zẽmba sʋka wa bõnyẽ-bila, la wakat kẽer me f manesma wẽnda wag-bãnda manesem; tɩ f be kʋɩlga naoorẽ n deemnẽ, tɩ f nao wã dẽgemd kooma, tɩ f bendgd kooma ne f ko-wiisi.›

³Kelg maam, Naaba-Wẽnd, sẽn yete: ‹M gũudame tɩ neba wa tigim zembala, tɩ m lob m zulungã n yaag-fo n dɩgl kʋɩlga noore.

⁴M na n basa foom yɩnga, m na n kɩtame tɩ yĩngr luiili wã fãa wa zõm f zugu, m na n kɩtame tɩ we-rũmsa fãa wa wãb foom.

⁵M na n ninga fo nemdã sẽn keesã la sẽn lebg yũugã tãms zutu, m na n ning-b-la bãg-faasẽ.

⁶Tẽnga na n yũ-la f zɩɩma; zɩɩma na mada tãmsã, n mad f sudsã.

⁷ [59†] Fo sã n wa ki, m na n luda saaga, la m na n kɩtame tɩ ãds sobe, m na n luda wĩndga ne sawato, la kiuug ka na n le kõ a vẽenem ye.

⁸Fo yĩnga m na n kiisa yĩngr vẽenem fãa. Tẽnga gill na n paa likẽ. Yaa maam, Naaba-Wẽnde, n togsde.

⁹Buud wʋsgo fo sẽn ka mi menga sũur na sãame, f wãaba kibar sã n ta-ba.

¹⁰M sẽn na n kɩt tɩ f nams namsg ninga na n kẽesa neb wʋsgo rabeem kãsenga. B nanams pɛleng na n yɩka wʋsgo tɩ b digimdi, mam sã n wa dĩms m sʋʋga bãmb zutu. Fo lʋɩɩs daare, b na n diga rabeem, daara tõre, ned kam fãa zĩi n bʋʋda a yõore.›

¹¹Ad Soaala-Wẽnd sẽn paasde: ‹Babilon dĩma tãb-biis na n pʋg-f lame.

¹²Mam na n kɩtame tɩ tãb-biisi sẽn ya toos wʋsgo wa kʋ f neb ka tɛkã. Tãb-biisa na wãa Ezipt sẽn pid ne wilg-m-menga n pa kees ned ye.

¹³M na n kʋla a rũmsa fãa sẽn yelgd Nil kʋɩlga noore. Ninsaal bɩ rũng nao kõn leb n bendg a koom ye.

¹⁴Mam na bas Nil kooma tɩ tisgi; kʋɩlga na zoe wala kaam n ka tar bʋʋr ye. Yaa maam, Naaba-Wẽnd, n gomd boto.

¹⁵M na kɩtame tɩ Ezipt lebg zĩ-peen-daaga; b na n looga ne a laoga fãa, a neba fãa na n loogame. Woto la b bãngda tɩ maam la Naaba-Wẽnde.›

¹⁶Yaa sũ-sãang yɩɩl kãnga, la tẽnsa fãa pagb na n yɩɩle. B na yɩɩl-a-la Ezipt la a zãma wã yĩnga. Maam, Naaba-Wẽnd, n wilgd rẽnna.»

¹⁷Pa-weera kẽnd yʋʋmd piig la a yiib soaba, kiuug piig la a yiib soaba, kiuuga piig la a nu raare, Soaala goma ne maam:

¹⁸«Ninsaal biiga, yãb Ezipt zãma wã; bɩ f kũmkũma tus yẽnda la bu-zẽmba gilli tɩ b lʋɩ bog zulung ninga kɩɩmsa sẽn dabdẽ wã.

¹⁹Sok-y-b woto: ‹Yãmb yẽ tẽedame tɩ y na põs la? Loog-y n tɩ gãand-y ne bu-zẽmb a taaba sẽn pa zabrẽ.›

²⁰Sɩda Ezipt rãmba na n kii zabrẽ. Bɩ sʋʋsa sẽn yiis b wʋʋgẽ wã kʋ Ezipt tãb-biisa fãa!

²¹Gãndaad menga, Ezipt zo-rãmba, n na n zĩnd bʋg-tẽngẽ n yeele: ‹Ad-y b watame, ad-y nin-dẽgda sẽn ki zabrẽ wã watame n na n gãand tõnd sʋka.›

²²Ad-a Asʋr, ad-a tãb-biis fãa sẽn lʋɩ zabrẽ wã yaad sẽn gũbg a rẽnna.

²³Bʋg-tẽng boka sẽn tɩ zulmẽ wã la b tu b yaado n gũbg b rĩma rẽnda. Zabr sʋʋg n kood b fãa gilli. Bãmb n yaool n da yɛɛsd ãndũni rãmba.

²⁴Ad-a Elam, ad-a tãb-biis yaad sẽn gũbg a yaoogo; b fãa lʋɩɩme, fãa yaa sʋʋg n koode. Nin-dẽgd bãmba n da yɛɛsd ãndũni rãmba, la ad-b sẽn bus tẽnga. B naagame n sig bʋg-tẽng ne yãnde tɩ b kii wa neb a taaba.

²⁵N-ye! Elam dĩma tʋɩ-la a gãaga, a tãb-biis sʋka. A tãb-biisa yaad gũbga a rẽnna. Nin-dẽgd bãmba fãa kii zabrẽ; bãmb n yaool n da yɛɛsd ãndũni rãmba la ad-b sẽn gãe marsã ne yãnde, ne neb sẽn ki zabrẽ wa bãmba.

²⁶Ad Mezek, ad Tubal dĩm dãmba ne b tãb-biisã. B yaada gũbga ne b tãb-biisa rẽnna. Nin-dẽgd bãmba fãa lʋɩ zabrẽ. Bãmb n yaool n da yɛɛsd ãndũni rãmba.

²⁷B ka naag ne gãndaad niyns sẽn lʋɩ b pĩnda ye, gãndaad niyns sẽn da yɛɛsd-b ãndũni rãmba, la sẽn sig bʋg-tẽng ne b zab-teedo, n dɩk b zug n kʋgl b sʋʋga, n dɩk b gãndo n pil b yĩnga ye.

²⁸Yãmb me Ezipt rãmba, y me na n kiime la b na n mum-y-la ne nin-dẽgdo sẽn lʋɩ zabrẽ.

²⁹Ad-a Edom, ad-a dĩm damba ne a na-biisi. Ne b raooda sẽn pa yɩ bilfã, b muma bãmb me wa sẽn pa-b zabrẽ. Bãmb me gãnega bʋg-tẽng ne nin-dẽgdã sẽn deng-b bãmba.

³⁰Ad nug goabg dĩm dãmba, bãmb me bee ka ne Sidõ rãmba fãa sẽn gãe ne kɩɩmse. Yɩɩ gãndaad sẽn da yɛɛsd ãndũni rãmba, la marsã nin-dẽgd bãmba gãe ne yãnde ne sẽn ki-b zabrẽ wa bãmba. Bãmb me gãe ne yãnde.

³¹Ezipt dĩma na n yãenda a tãb-biisã la yẽ nengẽ wã na sãoog bilfu, tɩ yẽ naag-b lame n ki zabrẽ. Yaa maam, Naaba-Wẽnd n yet rẽnna.

³²M basa Ezipt dĩma t'a yɛɛs ãndũni rãmba. Marsã, yẽ ne a tãb-biisa fãa na n naagame n mum ne nin-dẽgdo sẽn pa zabrẽ. Maam, Naaba-Wẽnd n gome.»