Read SEBR SÕNGO, 1998 Ezekiyɛl 33 Bible Online

Ezekiyɛl 33 - SEBR SÕNGO, 1998 bible

Ezekiyɛl 33

¹Soaala-Wẽnd goma ne maam:

²«Ezekiyɛl, gom ne m buuda kamba. Tẽeg-b sẽm maand bũmb ninga, zabr sã n wa yik tẽngẽ. Tẽnga rãmb yãkda bãmb nin-yende t'a yɩ gũusda.

³A sã yãend tɩ bɛɛb wata, a peebda baorgo tɩ neb bãng tiiri.

⁴Sẽn wʋma baorga peebgo, n maan wa a toog ka be ye tɩ b yõk-a n kʋ, yẽ soab zɩɩm daagr taale be-la a meng zugu.

⁵A wʋma baorga peebgo, la a maana wa a ka wʋm ye. A zɩɩma daagre lʋɩta a zugu. A sã n da ka maanẽ wa a toog kaẽ, a põsdẽ lame.

⁶La b sẽn yãk a soab t'a gũusdẽ wã, sã n yãe tɩ bɛɛb wata, t'a yaool n ka peeb baorga tɩ neb bãng tiiri, sʋʋgã sã n wa kʋ bãmb nin-yende, ya gũusda yelle, yaa yẽ zug la taala lʋɩta.

⁷Foo, Ezekiyɛl, yaa foo la m yãk yã, tɩ f yɩ gũusda a Israyɛl yĩnga. Fo na n kelga m goama, fo na n taasa Israyɛl dãmb m sẽn yet tɩ b gũus ne bũmb ningã.

⁸Mam sã n dat tɩ yel-wẽn-maand bãng t'a rɩka a kũum sore tɩ fo pa yeel-a t'a tedg vɩɩm, nin-kãng na n ki-la a sẽn maan wẽnga yĩnga la yaa foo n na n dɩ a kũuma taale.

⁹Marsã fo sã n pĩnd n wilg nin-wẽngã, t'a bas a wẽnema, n tek a zʋgo, t'a pa sake, a na n ki-la a sẽn maan wẽnga yĩnga la taal ka gũusda zug ye, f fãaga f yõore.»

¹⁰«Foom, Ezekiyɛl, yeel a Israyɛl doogo: ‹Yãmb gomdame tɩ y tʋʋm-wẽna la y yel-wẽna tʋk-y-la zɩɩb sẽn na n kʋ yãmba la y ka mi y sẽn na n maan bũmb ning n põs ye.›

¹¹Ad maam, Naaba-Wẽnd, Vɩɩm Naaba sẽn leokde: ‹Mam pa nong nin-wẽnsa kũum ye, mam sẽn date, yaa b teem zʋgo n paam n vɩɩnde. M kot-y lame, Israyɛl kamba, tɩ y bas wẽnem. Bõe yĩng la y na n tʋlg kũum?›

¹²Ninsaal biiga, yeel f buuda kamba: ‹Nin-tɩrg sã n yik n maand wẽnga, neer ning a sẽn maan pĩnda kõn sõng-a t'a põs yel-beed ninga sẽn gũud-a wã ye. La nin-wẽng sã n teem vɩɩm, a pĩnd yel-wẽnda ka na n le wa ne a kũum ye. La nin-sõng sã n sɩng wẽng maanego, ad-a kõn põse, a pĩnd vɩɩma yĩng ye.

¹³Mam sã n yeel nin-tɩrga t'a na n vɩɩndame, a ra tẽ t'a pĩnd sõmblema sekame t'a na n yik marsã n maan wẽng ye. M na n yĩma a tʋʋm sõma wã la a tʋʋm wẽnsa na n waa ne a kũum.

¹⁴La mam sã n yeel nin-wẽnga t'a toga ne kũum, t'a yik n bas a wẽnema n lebg nin-tɩrga, n lebg zemsg soaba, ad-a kõn ki ye.

¹⁵A sã n peng bũmb n deeg bobelle la a lebsa a sẽn deegã, bɩ a lebsa a wagdema bũmbu, a sã n ka le maand wẽnga la a reegd noy-niyns fãa sẽn kõt vɩɩm, sɩda a kõn ki ye, a na n vɩɩndame.

¹⁶B ka na n le tẽeg yel-wẽn-niynsi fãa a sẽn maana ye. A tũu noore la zemsg sẽn dat bũmb ninga, a na n vɩɩndame.›

¹⁷Fo buuda kamba yetame tɩ maam sẽn maanda yaa n looga toogo. M sok n gese sãnd ka bãmb n ka bʋʋm?

¹⁸Nin-tɩrga sã n bas neer maanego n maand wẽnga, a na ki rẽnd yĩnga.

¹⁹La nin-wẽnga sã n basd a wẽnem, n na n tũ noore la zemsgo sẽn dat a soabã, yẽ me na vɩɩnd rẽnd yĩnga.

²⁰La yãmb yetame tɩ mam dẽnna n loog toogo, bãng-y tɩ m na n kaoo yãmb bʋʋdo n tũ ned kam fãa manesem.»

²¹ [60†] Pa-weera kẽnd yʋʋmd piig la a ye soaba, kiuug piig soaba, kiuuga daar a nu soaba, nin-yende, sẽn põs Zerizalɛɛm wãaba raare, n waa n yeele: «Tẽnga lʋɩɩme!»

²²Zaabre, a waoonga ket tɩ beoogo, Naaba-Wẽnd wilga maam b pãnga n kɩt tɩ m tõe n gome. Sẽn põsa wã sẽn ta m nengẽ, m da tõe n gomame, m da ka le ya muk ye.

²³Soaala-Wẽnd goma ne maam:

²⁴«Ninsaal biiga, yaa woto la neb niyns sẽn pa Israyɛl tẽn-wãanda pʋs gomda: ‹A Abraam yɩ-la a ye la yẽ n da so tẽn-kãnga gilli. Tõnd sẽn lebg ka tɛkã yaa vẽeneg t'a tog n yɩ-la d soolem.›

²⁵Woto wã! Togs-ba, maam, Naaba-Wẽnd, sẽn leokd-ba: ‹Yãmb wãbda rũng sẽn ka kodg nemdo, yãmb zẽkda y nini n get wẽn-naandse, yãmb daagda zɩɩm, n yaool n zĩ be n gomd tɩ tẽnga yaa yãmb n so?

²⁶Yãmb teega y sʋʋs bala, yãmb tʋmda tʋʋm yoodo, yamb dooda taaba pagba, n yaool n zĩ be n gomd tɩ tẽnga yaa yãmb n so?›

²⁷Taas-b woto: ‹Ad maam, Naaba-Wẽnde, Vɩɩm Naaba, n wilgdi tɩ b na kʋʋ neb niyns sẽn pa-b raboodẽ wã, sẽn be-b wetẽ, wã we-rũms n na wãb bãmba; sẽn solg-b tãmsa zutã la tãmsa bogdẽ, bã-longdma n na n kʋ bãmba.

²⁸M na n wãa tẽngã n kɩt t'a lebg zĩ-peen-daaga. A ra teega a pãng n maand wilg-m-menga. Israyɛl tãmsã kõn le yãend ned sẽn na n saag n dʋ be ye.

²⁹M sã n wa tedg tẽnga neng zãnga t'a lebg we-raoogo n sɩbg tẽnga rãmb tʋʋm yoodã, b na bãng marsã tɩ maam la Naaba-Wẽnde.›

³⁰La foom, ninsaal biiga, fo yems-taasã tara goam tẽnga lals seese la b rot kʋɩlens noore. B gomda fo poorẽ n yet taaba: ‹D kẽng n tɩ kelg Soaala-Wẽnd koɛɛga.›

³¹La woto m neba wata wʋsgo fo nengẽ, n na n kelg-fo. B kelgda f goama la b pa maand f sẽn yet ye. B maanda wa b sẽn date, n baood sẽn nafd bãmba.

³²Ade, bãmb nengẽ fo wẽnda yʋʋma sẽn tar koe noogo la sẽn zodgd noogo. B kelgda f saglsã la b pa tũud ye.

³³B bãng tɩ fo sẽn bilgda sã n wa pidsi, la kõn le kaoos ye, b na reeg tɩ bãngd n da be b sʋka.»