Read SEBR SÕNGO, 1998 Ezekiyɛl 35 Bible Online

Ezekiyɛl 35 - SEBR SÕNGO, 1998 bible

Ezekiyɛl 35

¹Soaala-Wẽnd goma woto:

²«Ezekiyɛl, kedg n tees Seyir la f pĩnd n togs woto a poorẽ.

³Yeel-b tɩ b kelg m sẽn yete, maam, Naaba-Wẽnde. M na n yika ne yãmba, M na n wilg-y-la m pãnga, Edom, m na n wã-f lame, la f na n lebga zĩ-peen-daaga.

⁴M na n wã-la f tẽn-bɛdã, f tẽnga gill na n lebga raboogo la f na bãng tɩ maam la Wẽnde.

⁵Fo zɩ n vʋʋs ne Israyɛl dãmba kisgu ye. M sẽn waa n tʋlg n sɛɛs b wẽnema n dɩk-ba n bas b bɛɛba nugẽ, fo varg-b la ne f sʋʋga.

⁶Dẽ yĩnga, sɩd ne sɩda, maam, Naaba-Wẽnde, Vɩɩm Naaba, n yete: ‹M na n daaga f zɩɩm la m yõog-f ne bugum tɩ zɩɩm ninga fo sẽn daagã n dat zɩɩm n lebse. Fo sẽn pa zoe f taab kũuma, fo me na n kiime.

⁷Mam na n kɩtame tɩ Seyir tãnga lebg zĩ-peen-daaga la m na n kʋ ned ning fãa sẽn na n pɩʋʋg be.

⁸M na n pidsa f tãmsa zut ne kũum. Zabra sʋʋg na n gãnega kũum f kunkuba zutu, f bãadẽ, la f tãmsa bogdẽ wã fãa.

⁹Yaa daar fãa yĩnga la f tẽnga na n lebg zĩ-peen-daaga, la ned kõn le kẽ f tẽngẽ ye. La woto f na bãng tɩ maam la Naaba-Wẽnde.

¹⁰Fo saag n yeelame: m na n pãb n sooga Israyɛl la Zɩɩda rĩundu, Soaala sẽn maan b yamleoog tẽnsã.

¹¹Ade, maam, Naaba-Wẽnde, Vɩɩm Naaba, m na n zã-f lame wala fo sẽn zã bãmba la bãng tɩ f maan-b-la pãn-tõogo, f maana sũ-kiir ne-ba, f kisg-b lame. M na wilg-b mam sẽn yaa a soaba ne sɩbgr ning m sẽn na n sɩbg fooma.

¹²Rẽnda marsã la f bãngda tɩ maam, Naaba-Wẽnd, wʋma f tɩtaam goama, f sẽn waa n maanẽ tɩ Israyɛl tãmsa yaa foom n so-b, n maanẽ tɩ f wã-b lame la b lebga f soolem.

¹³Fo paooga maam al wʋsgo. M pa yĩm f tɩtaam goama ye.›

¹⁴Ad-m sẽn yete, maam, Naaba-Wẽnde: ‹M na n wã-f-la zãnga n pids f yagsa ne sũ-noogo.

¹⁵[64†] Fo nooga f sũuri ne m buud a Israyɛl wãabã. Fo me na n wãa wa yẽnda; f tãmsa gilli, f tẽn-peelma zãnga, fãa na n wãame. La woto la neba fãa bãngda tɩ maam la Naaba-Wẽnde.› »