Read SEBR SÕNGO, 1998 Ezekiyɛl 37 Bible Online

Ezekiyɛl 37 - SEBR SÕNGO, 1998 bible

Ezekiyɛl 37

¹Soaala-Wẽnd nug tika maam, tɩ b pãnga tall maam n tɩ sik bãg-faag a yembrẽ. Bãg-faaga ra yaa yalenga, n da pid ne kõaba.

²Soaala kɩtame tɩ m kẽne n gilg kõabã, bãg-faagẽ wã. Kõaba ra yaa wʋsg-wʋsgo, la b da kʋɩ n pelga fas.

³Soaala waa n sok-m lame: «Ezekiyɛl, kõab-kãensa rãmb tõe n le vɩɩndame bi?» Tɩ mam leoke: «Soaala-Wẽnde, yaa yãmb n mi.»

⁴Tɩ b le yeele: «Gom ne kõabã, la fo na n yeel-b lame: ‹Kõab koeemse, kelg-y!

⁵Ad Soaala-Wẽnd sẽn taasd-y koɛɛg ninga: m na n le fʋʋsa y zugu la y naa n le vɩɩndame.

⁶Mam na n kõo yãmb gĩini, n le tablg yãmb nemdo, la yĩn-gãongo; m na n kõo yãmb vʋʋsem, la yãmb na n vɩɩndame. La boto y na bãng tɩ mam la Naaba-Wẽnde.› »

⁷Mam goma ne kõab koeemsã wa Soaala sẽn da kõ maam noorã. La ade, mam sẽn da wa n gomdã, bʋrg n wãge. Tẽnga digimdame, la kõaba ra kolgda taaba, sũgdug woo sũgdug.

⁸Mam gesame, la m yãenda gĩin la nemdo, la gãong sẽn lud-ba, vʋʋsem bal la b rag n nan ka vʋʋsde.

⁹Soaala yeela maam: «Ninsaal biiga, fo na n goma ne pemsem ning neba sẽn vʋʋsd a soabã n yeel-a: ‹Vɩɩm pemsem, ad Soaala-Wẽnd n kõt-f noor tɩ f yi ween-vɩɩs a naasã n wa wẽ kũuma tɩ b le vʋʋge.› »

¹⁰ [66†] Mam maana wala b sẽn kõ maam noorã la vʋʋsem waa n wẽe kũuma la b paama vɩɩm n yik n yals yĩngri, b nao zutu. Yɩ tãb-biisi ne tãb-biisi.

¹¹Soaala kell n paasame: «Fo ne-la, Ezekiyɛl, kõaba makda a Israyɛl. A Israyɛl neba yetame: ‹Tõnd wẽnda kõab sẽn kʋɩ, saagr buud fãa sɛ-la d nengẽ, d ka ne d sẽn tõe n le yɩ bũmb ning ye.›

¹²Yaa rẽ yĩnga la fo na n taas-ba maam, Naaba-Wẽnde, sẽn kãabd-b bũmb ningã: ‹M na n pagsa y yaadã n yiis yã, yãmba, m buuda neba, la m na n tɩ kẽes-y-la Israyɛl, y tẽn-peelmẽ.

¹³M sã n wa pags y yaadã n yiis yã, y na reeg tɩ maam la Naaba-Wẽnde.

¹⁴M sã n kɩt tɩ pemsem vʋʋsdga wẽ-y tɩ y le vɩɩnde, m sã n le kẽes-y y tẽn-peelmẽ, y na reeg tɩ maam la Soaala-Wẽnde, la m na n pidsa m sẽn kãabe. Yaa maam, Naaba-Wẽnd, n yeele.› »

¹⁵Soaala-Wẽnd goma ne maam:

¹⁶«La foom, Ezekiyɛl, dɩk ra-peoko n gʋls a zugu: ‹Zɩɩda ne Israyɛl pa-weto.› Dɩk ra-peok a to la f gʋls a zugu: ‹A Zozɛf, bɩ a Efrayim, la Israyɛl kẽedba.›

¹⁷Kolg ra-pegda taaba tɩ b yɩ wa bũmb a ye, f nugẽ.

¹⁸Fo buuda kamba na n kos-f lame tɩ f wilg-b rẽ võore.

¹⁹Fo na yeel-ba tɩ maam, Naaba-Wẽnd, yet-b-la woto: ‹M na n dɩka ra-peok ning sẽn gʋls a Zozɛf la Israyɛl pa-wetã, n tɩ yegl ra-peok ning sẽn gʋls Zɩɩda kẽedbã, la mam nugẽ b na n lebga rĩung a ye.›

²⁰Foom a Ezekiyɛl, fo na n zãa ra-pegdã sẽn gʋlsã, f nugẽ, tɩ neba fãa ne-ba.

²¹F na taas-b maam, Naaba-Wẽnd, sẽn yet-ba: ‹Israyɛl dãmba, ad-m na n yiis-y-la y sẽn da be bu-zẽmb niyns sʋkã, la m na n tigim-y, n le tall-y n wa Zɩɩda.

²²M na lagem-y ne taaba, la y na n lebga buud a ye, Israyɛl tãmsa zutu. Dĩm a ye n na n dɩ naam y zugu, y kõn le welg buud a yi la rĩund a yi bada.

²³Y ka na n le rẽgem y mense ne wẽn-naandsa pʋgb ye. Y ka na n le tʋm tʋʋm yoodo, y ka na n le maan yel-wẽnd buug ye. M na zãag-y ne tõdgr buud fãa. M na n pek-y lame, y na n yɩɩ m buudu tɩ mam yɩ y Wẽnde.

²⁴[67†] Mam biiga a Daviid n na n dɩ naam yãmb zugu, yẽnda a ye bala n na n yɩ y pe-kɩɩma. Y na reeg la y tũ m sẽn wilg-y bũmb ningã.

²⁵Y na n zĩnda tẽng ning mam sẽn kõ m biig a Zakoob. Y ba rãmb sẽn zĩnd tẽng ning pʋgã la yãmb me na n zĩndi. Y na n zĩnda beene, daar fãa yĩnga, yãmba, y kamba la y yagense. Mam biiga a Daviid n na n yɩ yãmb dĩma, daar fãa.

²⁶Mam na n kãab-y-la laafi daar fãa. M na n maneg n zĩndg-y-la y tẽngẽ n paas y neba sõore. M na n yalsa m wẽnd dooga yãmb sʋka, daar fãa yĩnga.

²⁷[68†] Mam na n yɩɩ yãmb Wẽnnaam, yãmb na n yɩɩ mam neba.

²⁸La buud a taaba na bãnge tɩ mam la Naaba-Wẽnde la m welga a Israyɛl toore. Yẽ n na n yɩ m sõgne, m wẽnd dooga sã wa yɛs y sʋka, daar fãa yĩnga.› »