Read SEBR SÕNGO, 1998 Ezekiyɛl 38 Bible Online

Ezekiyɛl 38 - SEBR SÕNGO, 1998 bible

Ezekiyɛl 38

¹Naaba-Wẽnd goma ne maam n yeel-ma:

²[69†] «Ezekiyɛl, kedg f neng n ges a Gog. Yẽnda la Tubal la Mesɛk rãmb dĩma, Magog tẽn-peelmẽ. Yeel-a t'a maan gũusgu.

³Ad-m sẽn yet-a, maam, Naaba-Wẽnde: ‹M na n yika ne foo, Gog, Mesɛk la Tubal dãmb dĩma.

⁴M na po-la f yɛga n sog wĩiri n ta-f ne pãnga. M na n modg-f lame tɩ f yi f tẽngẽ, foo ne f tãb-biisa fãa. F wiida ne b fan-teedo, f wed-dʋʋdba ne b fan-teedo, me f tãb-biis ka tɛk sẽn zãad gãndo la sʋʋse.

⁵Pɛrs, Kus la Ypt tãb-biisa na n yii ne foo, n zãad b gãndo la b fõgneg b kut zug-peto.

⁶Gomɛr tẽng zab-zabdba, ne zab-zabdb sẽn yi nug goabg sẽnẽ, Bɛt-Togarma rãmb, na n waa ne foo. B na n yɩɩ ka tɛka; buud a taab sõor sẽn ka tɛk na n wa paas-f lame.

⁷Maneg n segl f meng neere, tɩ f lebga zãma kãseng tãnsoabã.

⁸Sã n maan yʋʋm a wãna, m na kõ-f noore tɩ f wã Israyɛl tẽnga. Dẽ wakatã tɩ sẽn põs-b zabr sʋʋgã paam n yii b sẽn da sẽeg tẽns niynsã n lɛɛg n wa tigim Israyɛl tãmsa zutu. Tãmsa sẽn da lebg vɩɩdo, yʋʋm wɛɛla, waa n le paama kẽedba. B ra vɩɩ ne laafi, tɩ b ra paam n zãaga ne buud a taaba.

⁹Gog, foo ne tãb-biisã, la f zo-rãmb ka tɛkã, na n boba zabre, y na n tiiga Israyɛl tẽnsã wa sob-kãsenga, y na n yɩɩ wala sawad kãsenga sẽn waa n lud b tẽnga vugri.

¹⁰Maam n yete, maam, Naaba-Wẽnde, tɩ wakat kãng sã n wa ta, tags wẽns wʋsgo n na n wa f yamẽ tɩ f na n yik n maan wa f sẽn tagsã.

¹¹Fo meng n na n yik n sɩng zabre ne neb sẽn ka baood zabr ye, neb sẽn vɩ ne laafi la sẽn kẽed tẽns sẽn nan ka tar lal-gũbr ye, tẽns sẽn ka tar kʋɩlens ne sogds meng ye.

¹²F na n wa zɛɛme la f sãame, f na n wa zaba ne neb sẽn nan kẽ paalem-paalem tẽns sẽn da ya raboodo. Tẽnga neb yi pa-weere n lɛɛg n wa ne rũmsi la arzɛka la b vɩɩ dũni wã tẽnsʋka.

¹³Saba la Dedã nebã, Tarsis ne a tẽn-toosa toandba na n sok-f lame: Fo tãpa bobame n na wa zɛ la f sãam bi? F wat n na n deega wanzurf la sãnem bɩ? F wat n na n zɛɛme n paas f rũms sõor la f laog bɩ?›

¹⁴Dẽ yĩnga, Ezekiyɛl, gom n wilg sẽn wat beoogo. Wilg a Gog, maam, Naaba-Wẽnd, sẽn yete: ‹Wakat ning m buud a Israyɛl sẽn na n wa vɩ ne laafi, fo na n yika ne-a.

¹⁵Fo na n yi-la f tẽngẽ, nug goabg sẽnẽ, n wa ne tãb-biis sẽn yit ween-vɩɩs a naasã. Na n yɩɩ wed-dʋʋdb gilli, na n yɩɩ tãp sẽn tar pãnga.

¹⁶Fo na n sega mam nebã, a Israyɛl, fo na n yɩɩ wala sawadgo sẽn waa n lud m tẽngã. Kõn yɩ mars-marsã ye, la yaa foo, Gog, la m na tʋm tɩ f wa wẽ m tẽngã la f wilg bu-zẽmba tɩ maam la Na-Sõng a Wẽnde. Yaa rẽ la m na n wilg-ba ne tʋʋmd ning m sẽn kõ fooma.›

¹⁷Ad-m sẽn yet-fo, maam, Naaba-Wẽnde: ‹Yaa fo yell la m gom al daar zãra. M da waa n yeela Israyɛl bãngdba, mam tʋʋm-tʋmdbã, m da waa n yeel-b-la al daar sẽn vẽsge, tɩ b wilg tɩ m na n tʋma ned t'a wa zab ne-ba.

¹⁸La ade, Gog, badaare, m sũura na n puugame. Yaa maam, Naaba-Wẽnd, n yet rẽnna.

¹⁹Mam sũura sẽn puug wʋsga yĩnga, m wẽendame tɩ baraare, tẽnga na n miima miim bãnde, Israyɛl tẽn-peelmẽ.

²⁰Wẽnd kãnga, mogra zĩma, yĩngri luiili, we-rũmsi, bõn-yood sẽn vuud tẽnga, ninsaalba, fãa na n diga rabeem m taoore. Tãmsa na n siigame, kunkuba na sudame, tẽnsa lals na n dʋʋga tẽnga.

²¹M na n yɛɛs-f-la yɛɛsg buud fãa. Yaa maam, Naaba-Wẽnd, n yet rẽnna. F tãb-biisa na n lɛɛg n kʋʋ taaba.

²²Mam na n sɩbg-f-la ne bã-longdem la ne sʋʋga. Mam na n kɩtame tɩ sa-kãseng nag foo ne tãb-biisã la f zo-rãmb ka tɛkã saag sẽn naag ne sapɩlem ne bugum la kidbri.

²³Woto m na wilg bu-zẽmba fãa tɩ maam la Pãng soaba la Nin-Sõngã. B na bãng tɩ maam la Soaala.› »